Pages


Senin, 06 Mei 2013

"Nazam ilmu Tauhid amal"



===============================
Alhamdulillah , pujoe keu Tuhan
Yang bri kurninya , tentang Ma’rifah
Seulaweut salam,  akan janjungan
Rasul Pilihan , dari Potallah

Salah saboeh tanda,  Mumat ‘amalan
Kureung harapan, wate na salah
Oh watei ta’at , goet peurasaan
Disisi Tuhan , meurumpoek balah

Oh wate kaya , hatee lam seunang
Oh teuka gasien , sabee lam sosah
Karena hate , kon mat bak Tuhan
Sabab tan meuphoem,  tentang ma’rifah

Ucap bak babah , mumat bak Tuhan
Hatee di dalam , la-en jikisah
Gohloem meusaboeh,  hatee ngoen lisan
Mantoeng didalam , I’ktikeut salah

Pandangan tasawuf , ngoen ketauhidan
Hanjeut hai rakan ,  lagee nyan langkah
Ureung ma’rifah,  kepada Tuhan
Saban hai rakan,  seunang dan sosah

Manusia udep , na lhee bagian
Nyang saboeh macam,  deuh amai leumah
Keu dua harap , kurninya Tuhan
Oh nikmat datang , geu syukur bagah

Sabab geurasa , na meu amalan
Harap limpahan , ubak potallah
Menyoe lagee nyan , wahai eu rakan
Mantoeng lam badan,  seula-en Allah

Bagou nyang keu Ihee , mumat bak tuhan
Kana bagian , masa keu leupah
Sabee seurah drou,  ka nibak Tuhan
Hate lam seunang , Peu bri potallah

Menyan keuh hamba , tan mat ‘amalan
Bahagia bak Tuhan, geubri meunalah
Sabab ka beutoei , peusidrou Tuhan
Tanna meubayang , na-‘amaliyah

Hatee that ridha , keu qadar Tuhan
Sabee lam seunang , peu bri Patallah
Hatee ji rasa , keu esa Tuhan
Peu nyang troeh datang , Alhamdulillah

Pangkai men-amal,  taturi Tuhan
Ureung iseulam , nyan phoen geugagah
Han geutueng amai, ka uleeh Tuhan
Meutan I’tikeut,  tentang Ma’rifah

Meurunoe fikah , keusah ‘amalan
Taturi Tuhan , tan geuboeh batas
Menyan keuh cara , na ridha Tuhan
Seulamat iman , donya takeubah

Seubab ma’rifah , neu bri lee Tuhan
Kadang bak badan , saket bri Allah
Na ladoem geubri, dalam sosahan
Ladom ka hilang,  aneuk meutuah

Geupeungoet rumoeh , ke hamba Tuhan
Nyang na meu iman,  akan potallah
Keu ubong rumoh , udeep gundahan
Meularat pageue , neubri lee Allah

Untuk jeut buka , pageue yang meunan
Saba yue Tuhan,  gata geupeugah
Allah neubantu , ureung sabaran
Di uroe dudoe,  neu hisab bagah

Tanda bahgia , ureung meu-iman
Sosah dan seunang , Alhamdulillah
Mameh dengan pheit , lam penghidupan
Tanda tan keukai , neubri lee Allah

Cari raseuki , neubri lee Tuhan
Tapi bek tingai,  peurintah Allah
Su-ai raseuki , kana jaminan
Meunan hai rakan , peuneugah Allah

Bek that-that sunggoeh,  wahee e-rakan
Peurentah tuhan , sampoe takeubah
Meunyoe terjadi , cara lagei nyan
Hatee meu-iman , neutoep lee Allah

Meunyoe kageutoep , hate meu-iman
Takoet hai rakan, hana geupeuhah
Oh wate mate , neubri lee Tuhan
Suil khatimah , kadang bri Allah

Meunyoe oh mate , hana le iman
Keukai jahannam,  neubri lee Allah
Neumou neu ba-e,  beu keukai iman
Joek droe hai rakan , ubak potallah

Neu harap ridha , ka nibak Tuban
Beu jroeh seuneu-lheuh , neubri lee Allah
Husnul Khatimah , di penghabisan
Seunang hai rakan , disisi Allah

Beuna ma’rifah , bak permulaan
Nyan keuh hai taulan , lakei bak Allah
Bak akhee umu , beumantoeng iman
Harap bak tuhan,  kawoem meutuah

Uleeh sebab nyan,  wahee hai rakan
Taubat beurijang,  menyoe na salah
Allah geutanyoe,  taufur rahman
Bandum neusayang , taubat bak salah

Wate ta taubat , hai hamba Tuhan
Yoeh goeh troeh jawoeng,  ubak ghargharah
Yoeh mata uroe,  mantong lagei nyan
Taubat beurijang , pat pat na salah

Meuka di barat , teuka uroe nyan
Pintoe tataubat , neutoep lee Allah
Meunan cit teungku , sangat loen peusan
Meuka troek jawoeng,  ubak ghargharah

Meutan tataubat,  bak keusalahan
Tamoe  hai rakan , ie mata darah
Yoeh goeh tatamoeng , nuraka Tuhan
Tamoe wate nyan , cukoep that teulah

E-ya Tuhan ku,  khaliqul ‘alam
Neubri  e Tuhan , kamoe bek teulah
Neubri kurninya , keu kamoe rijang
Gata hai Tuhan , kuasa leupah

Kamoe tan daya , ngoen keusanggupan
Meulainkan Tuhan, sidroe yang gagah
Soe yang geu kheundak , lam keumeunangan
Kuasa Tuhan , hana soe  bantah

Uleh seubab nyan , wahe e-rakan
Joek drou bak Tuhan , jinoe beu bagah
Ngoen puteh hate , dalam tauhidan
Bek na meubayang , seulain Allah

Lailahaillallah
Ucap bak babah , yoeh na kuasa
Meunyoe  han ek lee , takheun ngoen lidah
Ingat meutuah , didalam dada

Meunyoe  lage nyan , sikap hai rakan
Mudah-mudahan , rahmat bak Allah
Akan bahagia , disisi Tuhan
Wate geutanyoe,  tawoe bak Allah

Wahee kawoem lon,  dum seukalian
Lakee bak tuhan , ngoen paleut dua blah
Sa’at meudo’a , wahe ya rakan
Sagai bek leumah , na amaliah

Tanda geutanyoe,  harap bak Tuhan
Yang la-en rakan , makhluk Allah
Tapi neuqabul , yang khendak Tuhan
Meukoen hai rakan,  heuet hamba Allah

Uleh seubab nyan , wahai dum insan
Do’a hai rakan,  teurimoeng Allah
Cara teurimoeng , na lhee bahgian
Yang saboeh macam , langsoeng geubalah

Cara keu dua , gantoe lee Tuhan
Ta lakei seunang , neubri lam sosah
Teuma nyang keu lhee , wahei e-rakan
Di urou komdian,  neubri meu nalah

Meukoen lagee nyan , I’ktikeut rakan
Salah pandangan , dalam ma’krifah
Teukeudi tuhan,  kana azalan
Hana meutuka , keuhendak Allah

Wajib I’ktikeut , cara lagei nyan
Soal usaha , syari’at Allah
Hukum syari’at , aturan Tuhan
Hukum I’ktikeut , peusidroe Allah

Bek salah-salah , wahee e rakan
Dalam tauhidan,  kepada Allah
Itulah kunci , ureung iseulam
Seulamat iman,  dalam makrifah

Na ladoem ureung , geubri lee Tuhan
Ibadat seunang,  kepada Allah
Tapi usaha , goeb nyan sapeu tan
Lam penghidupan , tan aloh-alah

Nyan keuh hai teungku , kadar bak Tuhan
Pangkat tajridan , neubri lee Allah
Bek lee neu ubah,  kadar lage nyan
Neuseu-on rakan , yang bri potallah

Tanda bahagia , neubri lee Tuhan
Seubab neusayang , uleh potallah
Menyoe cit neujak-, jak cari makan
Ka neutroen rakan , bak tempat rendàh

Saboeh macam treuk,  neubri lee Tuhan
Jaya usaha , teukeudi Allah
Sebab raseuki , na pencarian
Peurintah Tuhan, hantoem geukeubah

Meunyan keuh ureung,  wahe e taulan
Pangkat asbaban , neujok lee Allah
Meunyoe peuget heut , toek sembah Tuhan
Hingga usaha , bandum ta keubah

Geu-anggap napsu , teusoem lam badan
Jisah lee syetan , mangat ta ubah
Meunyoe  ta ubah , pangkat bak Tuhan
Oh dudou rakan , pasti lam teulah

Karena tan ridha , teukeudi Tuhan
Sabab tan dalam , tentang ma’rifah
Di ureung awam,  bandum lagei nyan
Anggap usaha , yang bri fa-edah

Beu yakin that-that, wahe e rakan
Tentang meu-iman , kepada Allah
Beuthat goet sungguh , perencanaan
Han-ek jireuloeh , yang ka-iradah

Peugoet usaha , lam penghidupan
Koen taneuk ubah , kadla yang sudah
Teuntang usaha , dan ikhtiaran
Ikut suruhan , dari potallah

Yang ka teukkeudi , ka nibak Tuhan
Tetap berjalan,  han ek ta-ilah
Wajib. percaya , cara lageinyan
Ureung meu iman , kepada Allah

Uleh seubab nyan , wahee e rakan
Joek drou bak Tuhan,  bekna meu-ilah
Beuseunang hate,  kepada tuhan
Pue nyang teukeudi , dari potallah

Meunyoe hai kawoem , cara lagei nyan
Seulamat iman , gata meutuah
Meunan geutuntut , lam ketauhidan
Dan peradaban , kepada Allah

Ohno keuh siat , haba peuneusan
Hak ulon tuan , yang hina leupah
Harap peu meu’ah,  jika salahan
Di ulon tuan , peujoek bak Allah

Beujeut keu-amai , keu ulon tuan
Ulon meunazam , peutunjoek Allah
Keu ma dan ku lon , yang ka bak Tuhan
Dan sekalian,  Gurei lon yang sah

Beuluwah kubu , dum sekalian
Seureuta insane,  beena karabah
Beujioh bala , ureung meu-iman
Neubri beutentram , wahe ya allah

Bandum geutanyoe,  neubri beu aman
Neubri beu tentram , wahee potallah
Beuroeh dum kamoe,  lam ridha Tuhan
Neubri ampunan , meunyoe  na salah

Ohnou keuh lon toep , tauhid lam nazam
Meu’ah hai rakan , meunyoe  na salah
Kadang meutajoe,  teukeudi Tuhan
Ampon ya rahman , lon hambá Allah
TGK M. ADAM HASAN, SAMPOYNIET, ACEH UTARA
ALUMNI DAYAH MESJID RAYA SAMALANGA
DAN DAYAH AL-MADINATUL DINIYAH BLANG BLADEH (BIREUEN)
KUTIPAN DARI KITAB HIKAM KARANGAN
= IBNU ATHAILLAH AL-ASKANDARI=

0 komentar:

Posting Komentar

Komentar FB :