“ ACEH KA MEUBEE BANGA “

   Oleh : SULAIMAN.A.GANI.

==============================

Alhamdulillah, kalam lon puphoen

Lon pujoe Rabboen, Allah taa’la

Yang peujuet donya, hana meububoeng

Rahmat neupeutroen, ban sigoem donya

Ulat lam bate, raski neupeutroen

Dum nan Rabbon, Gaseh keu hamba

Bandum lat batat, kuasa rabbon

Dudoe geuhimpon, Blang padang masya

Seulawuet saleum, keu Muhammadon

Utusan rabbon, Rasul  Mustafa

Yang ba risalah, keu bandum kawoem

Nabi  Akhiron, Atueh rhueng donya

Samboet saleum lon, Assalamu’alaikom

Keu bandum kawoem, Tuha ngoen Muda

Inoeng ngoen Agam, banda ngoen duson

Saleum dari lon, hana lon beda

Meukru seumangat,  rahmat meuhimpon
Ateuh ulee Ion , jaroe bandua
Meu'ah Ion lakee , bak bandum kawoem
Lon keumeung suson, Aceh bee banga

Seuramoe Mekkah ,meugah saboh thon
Jinoe hai kawom ,ka meubee banga
Nanggroe Aceh nyoe ,jinoe hai kawom
Hana le harom,  si bungoeng jeumpa

Rakyat di Aceh, kalileh harom
Karoh lam keubon, pageu jih hana
Rumoh meusigak, na dua tampong
Kayee hiju on, ban si seulingka

Pageu kapatah ,reubah meusinthong
Kayee hijo on, ka leumo seuba
Allahhu Rabbi, pakri keuh untong
Pakon nanggroe lon ,kameunoe rupa

Seuramoe meukah, hanale haroem
Adat ngoen hukoem, hana soe kira
Adat ka jiwoe, bak boeh keutupoeng

Adak di hukoem, ka bak  beulanja

Sabe keudroe droe, jitem meuhukoem

Wali ngoen karoeng, jitem meudawa

===============================