Pages


Sabtu, 04 Mei 2013

“ SAMBOET RAMADHAN “-2



  OLEH : SULAIMAN.A.GANI
=========================================
Alhamdulillah, lon pujoe  tuhan
Yang peujuet alam, ban sigom donya
Yang peujuet langet, hana  meutiang
Yang peujuet insan, lat batat  dumna

 lhuehnyan, seulawuet  akan janjongan
Pang ule alam, rasul Mustafa
Seureuta sahabat, keluarga  gobnyan
Yang ka berjuang,  peudoeng  Agama

Teuma  saleum  lon, keu bandum rakan
Umat  iseulam, Ban sigom donya
Saboeh  Akidah, peu  Esa  Tuhan
Meunyang  laen  tan, syarikat  hana

Samboet saleum lon, samboeh  karangan
Samboet  ramadhan, hajat  lon rika
Oh  habeh  ra’kjab, jitamoeng  sya’ban
Lhuehnyan Ramadhan, troek uroe  Raya

Nyan buluen  ra’kjab, meukhuen janjongan
Nyan  buluen Tuhan, Azawajalla
Keupada  Nabi, Aulia  Tuhan
Nyan  buluen sya’ban,  jatah  Aulia

Nyan buluen  umat, sabda  janjongan
Buluen Ramadhan,  jatah  keu  Hamba
Saboeh  tapubuet,  tujoh ploh  balasan
Dan Troen Quruan, peutunyoek  hamba

Maka bagi lhe, buluen  Ramadhan ( Rahmat,Maqfirah& ittakun minannar )
Pahla bak Tuhan, meulipat  ganda
Geuhapus Dosa, geubri  Ampunan
Tanda  geusayang, buluen  keu  Hamba

“Sahlan Wa Sahlan, Marhaban  Ya  Ramadhan”

Sibeurang kasoe, samboet  Ramadhan
Yang hate seunang,  ikeulas  beuna
Tuhan bri fahla, raya hanaban
Hana  bandingan, deungan ta peusa

Talake meuah, bandum  salahan
Ka nibak rakan, ubena  Dosa
Nibak urueng  syik, inoeng ngoen Agam
Guree  ohlhuehnyan, meubek  talupa

Meunyoe hanale,  ka woe  Tuhan
Urueng syik  Agam, atawa  Bunda
Keudeh bak kubu, neujak le rijang
Lake maaffan, sira  meudoa

Keu  anuek  yatim, neubri  santunan
Tamoeng ramadhan, bek dalam duka
Bek dalam  seudeh, samboet  Ramadhan
Meunan janjongan, ka neumeusabda

 Lagenyan cara, samboet Ramadhan
Neubri le Tuhan, Rayeuk that Fahla
Meusoe ibadat, dalam buleunnyan
Neukheun le Tuhan, Neu ampon Dosa

Fahla Tuhan bri , Dalam buleunnyan
Hana Bandengan, Meulipat Ganda
Sibeurangkasoe, Samboet Ramadhan
Ngoen Dasar Iman, seurta Taqwa

Tuhan Peu Hareum , Nuraka Jahnam
Tuboeh Uruengnyan , Tuhan Peulara
Pue loem Tapubuet, Lage yue Tuhan
Sunat Kerjakan , Wajeb Geukira

Geutanyoe Jinoe , ka laen macam
Oh troek Ramadhan , Katoe Puasa
Sang sang roet laot, jitroen Ramadhan
Inoeng ngoen Agam, jak pesta pora

Bak bineh pante , jak preh Ramadhan
Uroe ngoen malam, jak meudiwana
Deungon buet maksiet, samboet Ramadhan
Inoeng ngoen Agam, meusuka ria

Jipeuduek kibot ,Dansa ngoen goyang
Dijep minuman, Pesta Narkoba
Jak manoe laot, Inoeng ngoen Agam
Sang sang lagenyan, Samboet Puasa

Male That Aceh , Syariat Iseulam
Meunyoe Lagenyan, Samboet Puasa
Seuramo Meukah, Pane Lagenyan
Urueng Iseulam, kon meunan cara

Padahai Nabi, kalheuh neupeusan
Samboet Ramadhan, koen meunan cara
Tapeugleh hate, Deungki ngoen deundam
Bandum salahan, yue meu ah Dosa

Supaya ngat gleh , Dosa ngoen Tuhan
Seubab buleunnyan, Cukop Mulia
Dosa ngoen Hamba, bek jeut halangan
Ridha bak Tuhan, geutanyoe mita

Jinoe takaloen, oh troeh Ramadhan
Inoeng ngoen Agam, jak mita dosa
Mulai thoennyoe , bekle Lagenyan
Samboet Ramadhan, tabalek cara
(TGk Diyueb Bruek ) tgl 14 Juli 2012






0 komentar:

Posting Komentar

Komentar FB :