SAMBOET THOEN BARO

Oleh : SULAIMAN.A.GANI
==================================
Alhamdulillah ,loen Pujoe Tuhan
Yang peujeut Alam ,langet ngon Donya
Yang peujeut laot ,deungan Daratan
Yang Peujeut Insan .Agam ngoen Dara

Seulawuet saleum .Ateuh Janjongan
Pang ule Alam, Saidil Mustafa
Yang buka pintoe, Mimbar Iseulam
Yang mat Pimpimpinan, ban sigoem Donya

Salam a”laikoem Saleum loen tuan
Keubandum rakan, tuha ngoen muda
Samboet saleum loen, sion karangan
Thoen baro rakan, hajat loen rika

Samboet thoen baro , umat iseulam
Satu Muharram , Geuseuboet nama
Saboeh pondasi ,patoek iseulam
Seujak disinan,Mimbar geubuka

Meu thoen Hijrah , Pang Ule Alam
Ka Nibak thoen nyan ,meuphoen bilueng sa
Phoen dari makkah , pinah Madinah
Peurintah ALLAH ,Nabi yue bungka

Hijrah Nabi,nanggroe Madinah
Peurintah Allah ,Keubang Agama
Kuat Agama ,Bandum Jazirah
Sampoe meuluah, ban sigoen Donya

Tacoek Meukeusud, Makna Hijrah
Peurintah Allah, Luah That Makna
Miseu Tatinggai, Bandum Buet Salah
Geutanyoe Minah, Pubuet Yang Beuna

Miseu Keu Aceh, Bacut Loen Peugah
Ban Lheuh Musibah, Tsunami Geumpa
Mate Ngoen Ureung, Subahanallah
Seuramoe Mekkah, Neupeutroen Bala

Mungken Nyoe Saboeh, Teuguran Allah
Neuyue Hijrah, Geutanyoe Dumna
Seubab Geutanyoe, Tuwoe Keu Allah
Neuyue Hijrah, Taubat Nasuha

Meunyoe Baroekoen, Maksiet Keu Allah
Jinoe Hijrah, Bak Jalan Beuna
Bekle Tapubuet, Yang Larang Allah
Gisa Beu Bagah, Jalan Agama

Rata Jeut Gampoeng, Peutroek Amanah
Peurintah Allah, Yue Taat Beuna
Tapubuet Suroeh, Peujeuoh Teugah
Seuramoe Meukkah, Mangat Seujahtra

Mangat Lage Nan, Seuramoe Meukkah
Dile Koen Meugah, Kuat Agama
Iskandar Muda, Yang Mat Peurintah
Acehnyoe Meugah, sampoe Malaka

Meumada Ohnoe, Haba loen Kisah
Keu Thoen Hijrah, Tatueng Pusaka
Aceh Lhe Sagoe, Tapuwoe Tuah
Seuramoe Meukkah, Mangat Seujahtra
(Tgk Diyueb Bruek/Sulaiman.A.Gani)
Tanggal 14 Nov 2012 1 Muharram 1434