HIKAYAT KROPSI

Oleh : SULAIMAN.A.GANI

=============================

Alhamdulillah , Pujoe Ilahi

Seulaweut  keu nabi,  saidil ambiya

Salamalaikom , saleum ulon bri

Karong ngon wali , duson ngon banda

Neubri ya allah,  beutroek hajati

Keu soal kropsi,  ulon calitra

Dumnoe ka bala,  neubri tsunami

Matong sit kropsi,  meurajalela

Rata jeut sagoe , tadeungoe kropsi

Lage sang sang hi , saboh budaya

Tamoeng keurija,  peugawe neugri

Tamoeng polisi , atawa teuntra

Sinan na jatah,  peujabat tinggi

Tamoeng famili,  atau beulanja

Sogok meunyogok , sinan terjadi

Han pue lon kheun , kri konle rasia

Yang leupah lucu , jinoe terjadi

Wate jibagi,  subsidi desa

Teken lhee juta,  dijok lhee tali

Bak kwitansi , yue cap bak desa

Nibak tingkat sa , phon phon terjadi

Lakee kumisi,  yue bagi tiga

Oh troek bak camat , deungon bupati

Administrasi , keunoeng biaya

Hanale teumpat,  yang hana kropsi

Han kecuali , tamoeng sikula

Bak bagi jadup,  jatah peungungsi

Sinan pih kropsi , meurajalela

Bak bagi rumoh , barak peungungsi

Sinan  hai  akhi , pih saboh gura

Sogok menyogok,  sinan terjadi

Supaya jibri , dua boh muka

Nibak bagi breuh,  ngon teupong kanji

Jatah peungungsi , bantuan lua

Untuk saudara,  jok dua guni

Untuk peungungsi , sep saboh saja

Padahai saban , korban tsunami

Pakon bak bagi , jatah meubeda

Hana amanah , ureung yang bagi

Meunyan pih kropsi,  wahe saudara

Bak peugot surat,  kanto polisi

Bak desa jibri,  surat pengantar

Bak urus izin,  kanto bupati

Camat keutahui,  syarat jih beuna

Haroh tasurung,  rata kurusi

Beulanja tabri,  beurata meja

Meuhan han teubiet , rekomendasi

Izin han jibri,  meutan belanja

Di pak kontraktor,  pih laen lagi

Ilah dicari , beuna keurija

Mita proyek , tender yue bagi

Disinan  kropsi , meurajalela

Buet gohlom teunte , tender goh jadi

Intat kurusi,  rumoh kepala

U rumoh pimpro,  yue intat tv

Intat visidi , waki keupala

Meunyoe menang lon,  PT. Tsunami

Negoisasi , lon jok beulanja

Siploh persen , keu pimpro lon bri

Tiket ek haji,  inong keupala

Oh troek bawasda,  KPK lagi

Dijak kumisi , deungon pareksa

Jok saboh amplop , ka teuhing gusi

Yue jak kembali,  han pue pareksa

Meunan keuh bagoe,  jinoe terjadi

Maka jeut kropsi , meurajalela

Keu peungadilan , jinoe lon kheun kri

Disinan kropsi , pih saboh gura

Pancuri manok , hukuman mati

Peujabat kropsi,  kalheuh u lua

Meunoe ji puta , meudeh jiputie

Hansep bukeuti,  alasan jiba

Peunutut umum,  ngon hakim tinggi

Negoisasi , deungon terdakwa

Ngoen peungacara,  yue ikat janji

Padum ek jibri,  meunyoe lon bela

Hana jitupeu , hukuman kropsi

Hukom ilahi , tamong nuraka

Kupue guna le,  peng hasil kropsi

Watee tamate,  hana sit taba

Gafan lhee lapeh , meunyang na taba

Papeun keureunda,  labang lhee inci

Harta tatinggai,  sinoe didonya

Ditung pusaka , aneuk ngon wali

Tak kala mate , sidroe droe ureueng

Peut hoe geubulung , harta pusaka

Di ulat asoe , di bumoe tuleung

Teuma di ureueng , jitueng pusaka

Nyawong  geupulang , milek Potollah

Meudi gata sah , hana sapue na

Malingkan yang na , amal ibadah

Seudeukah jariah,  masa lam donya

(Tgk Diyueb Bruek, 21/07/2008 )