Pages


Senin, 06 Mei 2013

"DONYA"



==============================
Deungoen Bismillah, loen peu phoen kalam
Hate yang khadam, babah yang baca
Kata lam rika, diteungoeh malam
Saboh peuneusan, seun seun  sibanja

Wate neu baca, beunakeuh neupham
Asoe didalam, tamse loen rika
Na sidroe hamba, hudep lam 'alam
Uroe ngoen malam, sideh lam rimba

Teungoeh get lazzat, hate didalam
Istirahat badan, kahek geu puta
Teuka le singa, cukoep that keujam
Keuneuk jak terkam, insan lam rimba

Meutoet meutoet teuboeh, asoe didalam
Karap rhoet pitam, geu kaloen singa
Geubeudoeh sigra, reu oeh meu bram bram
Geuplueng sep tajam, arah tan le na

Kahek anggota, uroe ngoen malam
Lam rimba Tuhan, geuplueng that teuga
Geupiyoeh sigra, bak saboeh kulam
Disampeng sajan, bak kayee raya

Geukaloen taloe, meutueng tueng  udalam
Lhoek that kulam, ie pih tanna
Laju geumeumat, tamoeng lam kulam
Geumeusom reujang, bek deuh bak singa

Teungoeh meugantung, bak taloe panyang
Mata teurangsang, kaloen buya
Dineuk kap hamba, meunyan binatang
Dipeuhah rahang, gigoe meu cula

Diteuka gundah, seureuta bimbang
Bantuan datang, tikoeh seureuta
Dikap le sigra, taloen yang panyang
Dang bak kadang, dua keurija

Puteh ngoen hitam, hudep meupasang
Tikoeh geurangsang, taloe disuba
Katroe yang puteh, dijih ka teunang
Teuka yang hitam, gantoe keureuja

Sinan lam kulam, hamba meulang lang
Hana teubayang, lagee nyan rupa
Mata meukaca, hate ka bimbang
Meutan soe datang, yang tuloeng hamba

Teungoeh geulisah, seureuta bimbang
Teuka meupasang, unoe seureuta
Diba keuluarga, dipeuget rangkang
Ateuh goe batang, cabeung yang raya

Dititep madu, leumak koen wayang
Cukoep seuteuntang, lam babah hamba
Hate yang sugra, diteuka seunang
Tan le teubayang, jeut umpeun buya

Meunan teujadi, masa yang panyang
Sampe teureupang, taloe yang raya
Meupisah dua, taloe yang panyang
Tuboeh yang malang, jeut umpeun buya

Ceurita ka habeh, rika loen karang
Cukoep that sayang, tuboeh nyan hamba
Hana treb masa, susah ngoen seunang
Pasti troeh datang, tamat ceurita

Bacut loen surah, mangat bek mumang
Bek sampe teubayang, donya seugala
Meutan treb masa, Allah coek pulang
Barang pinjaman, bak teuboeh hamba

Singa yang juah, malaikat datang
Keuneuk coek pulang, nyawoeng bak hamba
Dua buya, meunyan preh reujang
Malaikat yang garang, pareksa hamba

Kulam yang lhoek, loen tamse rangkang
teumpat preh datang, akhirat teuka
Meunyan istana, yang tan teubayang
Sosah ngoen seunang, sinan keuh nyata

Loen tamse masa, taloe yang panyang
Tikoeh meupasang, masa meuputa
madu dirasa, donya peu ayang
Mangat jeut seunang, bak sang han le bla

Ban putoeh taloe, nyawoeng troeh datang
Nikmat seunang, leukang bak hamba
Baroe teurasa, sosah koen wayang
Meutan teubayang, janji troeh teuka
( Agam sidroe )

0 komentar:

Posting Komentar

Komentar FB :