HIKAYAT NABI MUSA (KEUNEUBAH AWAI ) BAGIAN ( 1 )

=======================================

Dengoen Bismillah , lon mula kalam
Ngon nama Tuhan,  nyang Maha Suci
Alhamdulillah,  telheueh nibak nyan
Lon pujoe , Tuhan sidroe Ilahi

Bermula pujoe , dum seukalian
Milek di Tuhan , Po ku Rabbi
Tuhan yang peujeuet,  sigala alam
Jen deungon insane,  langet ngoen bumi

Bandum lat batat,  asoe  lam alam
Sidroe Tuhan , dum  peujadi
Wajeb ateueh,  dum ssekalian
Akan Tuhan , bek meu ungki

Teuleueh lon pujoe , Allah nyang ahad
Lon ba Seulaweuet,  akan nabi
Seulaweuet saleuem , keu Muhammad
Pangulee umat , geunaseh Rabbi

Ya Tuhanku , neutamah rahmat
Ateueh Muhammad,  pangulee kami
Ateueh wareh , seureuta sahabat
Bandum umat , nyang ikot Nabi

Agam inoeng , dum beuhabeh
Sinoe sideh,  umat Islami
Neubri iman , dum beukhaleh
Amai tuleh, dalam kaibi

Lon muhon tuloeng,  bak hadarat
Nyoe hikayat,  lon keumeung rawi
Beu Tuhan bri , troeh ban hajat
Beuek tamat , kisah nabi

Ya Allah , Wahidol kahar
Ya ghafur , Tuhanku Rabbi
Neubri hate , lon trang teubuka
Lon meurika , beu ek menjadi

Uroe malam , lon muminta
Ya Rabbana , beusampe neubri
Beureukat Nabi , Saidil Ambia
Lom seureuta,  sigala Nabi 

Beureukat intu , Nabi Adam
Beureukat tuan, Hawa Siti
Beureukat guree , di lon tuan
Seureuta lom,  ma ngoen abi

Neubri sihat,  lom ngon badan
Trang pikiran, dalam kalbi
Beu ek hase , ulon karang
Nyoe khabaran,  kisah Nabi

Beuget pakhoek , antok kalam
Beu ek dendam,  nyang deungo sri
Beugoet tabeuet , wahe tolan
Bek na wayang , deungon cakri

Beuna takzim , wahe sahbat
Tahorumat,  kisah Nabi
Tuhan neubri,  limpah rahmat
Meungna horumat,  wahe akhi

Seureuta tatueng , dum ibarat
Pahla le that , Tuhan neubri
Hikayat nyoe,  kon han meupat
Dalam kitab , ulon rawi

Sinan asai , nibak kitab
Lon hikayat , teuma lagi
Kon ngon rancak , ulon surat
Bukon sahbat , ulon meucakri

Qisasul Anbiya , nama kitab
Sinan meuhat,  mula asli
SUBHANALLAH , WAL HAMDULILLAH
Deungoe Ion kisah,  haba anbia

Maha suci , Po ku Tuhan
Jinoe karangan , ulon mula
Lon tueng beureukat , nibak guree
Lon tueng tarajee , bak ulama

Lon peu Aceh , nyoe habaran
Harap bak Tuhan , ampon desya
Supaya muphom,  sigala umat
Beureukat Muhammad,  pangulee kita

Ngon mukjizat , pangulee Nabi
Beu Tuhan bri , iman seumporeuna
Kalam Tuhan , beu ek lon seuon
Hingga ajai lon , hilang nyawa

Ngon beureukat,  kalam Allah
La ilaha illallah , beuroh lon baca
Watee seukreuet , beu seulamat
Beu taingat , kalimat mulia

Neubri beu roh lon , seubut kalimat
Seuneuleueh nafah , ya Rabbana
Amma bakdu,  he boh hate
Nanggroe Meuse , lon calitra

Nyoe  lon peugah , nanggroe Meuse
Masa Nabi , mat neuraca
Masa keurajeuen , Nabi Yusuf
Nyang geumakruf , indah rupa

Wafeuet Yusuf,  teuma dudoe
Neugantoe , uleh Yahuda
Aduen Yusuf,  nyang samlakoe
Gobnyan dudoe , mat neuraca

Yahuda nyang,  peutimang nanggroe
Badai adoe , Yusuf muda
Mat keurajeuen,  nanggroe Meuse
Hukom ade , hana tara

Padum lawet , hingga akhe
Ngon takeudi , Po Nyang Esa
Di Yahuda, troeh peurintah
Keuheundak Allah , ka troh masa

Sampoe  janji , ajai sudah
Habeh langkah , dalam donya
Keumbali , keu rahmat Allah
Alhamdulillah,  ka troeh masa

Inna lillahi ,wa inna ilaihi rajiun
Woe bak Tuhan,  ajai teuka
Bak masanyan , nanggroe Meuse
Meugantoe le , laen raja

 

Raja Maksib , teuma dudoe
Nyang geunantoe , raja Yahuda
Maksib aneuk , Malik Rayyan
Nyan Sulotan,  dudoe teuma

Nyang keurajeuen , nanggroe Meuse
Hukom ade , hana tara
Padum lawet , dudoe akhe
Teuma boh hate,  lon calitra

Uleh iblih , teuma dudoe
Jipeuwawoe , Maksib raja
Jitipee le,  iblih pindoe
Hingga sampoe, darohaka

Jeuedtkeu kafe , laknat Allah
Nyang seumbah , patong beurhala
Deungon rakyat , dum bahrollah
Bandum sudah , balek agama

Habeh bandum, jeuet keu asi
Nyang meu ungki , keu Rabbana
Meulaenkan , Bani Israil
Turonan Nabi , meunyang hana

Keuturonan,  Yakub Nabi
Bani Israil,  geukheun nama
Seugala kawom , Bani Israil
Teutap suci , bak agama

Teutap nibak,  agama Islam
Hana roh nyang , seumbah berhala
Bak islam, dum  seukalian
Agama Tuhan , nyang that sibeuna

Laen bandum , rakyat Meuse
Jeuet keu kafe , sumuanya
Raja Maksib , deungon kawom
Habeh bandum , seumbah berhala

Maksib keurajeuen , dua reutoh thon
Dumnan zaman,  lama masa
Mat keurajeuen,  nanggroe Meuse
Teuma lahe , sidroe hamba

 

Lahe sidroe , ureueng lakoe
Hana bagoe , that peurkasa
Raya panyang,  that seureuloe
Kulet asoe,  hitam sukla

Nibak bangsa, nyan  biek Kubti
Hitam nahi , miseue baja
Nyan keuh Waled,  dan geurasi
Hana sakri , that ceulaka

Sangat teuga , lom beurani
Jireubot le , nanggroe raja
Hingga sampoe, teuma akhe
Nanggore Meuse,  jih keuraja

Ka keuh mate , raja Maksit
Nyan keuh Waled,  jinoe raja
Nanggroe Meuse,  masa keurajeuen
Droe jiyue kheun,  laen nama

Dilee Waled , nama geukheun
Jinoe Firaun , nan jituka
Teutap Firaun , keurajeuen nanggroe
Jikrah meuntroe,  ngon panglima

Jikrah rakyat,  dalam nanggroe
Dum sinaroe,  yue seumula
Yue teumajok,  ladom meugoe
Ulah bagoe , jiyue pula

Jipeugot blang , deungon gampong
Peugot duson , dum sigala
Jibri pangkai , Ie Firaun
Rakyat bandum , yue keurija

Hingga sampoe , lhee reutoh thon
Raja Firaun , maken kaya
Hareuta Ie that,  han peue peugah
Kaya leupah,  hana tara

Jiyue peugoet , saboh meuligoe
Hana bagoe , indah rupa
Lagi manyang , that seureuloe
Jeueb-jeueb nanggroe , leumah nyata

 

Nibak samat,  teungoh meuligoe
Jipeugoet riyoe , saboh geuta
Lom ngon tingkap,  indah han bagoe
Pucoek jih nyoe , that meucahya

Deuh jikalon,  jeueb-jeueb nanggroe
Jiduek sinoe , ateueh geuta
Peugot diwan , batee beurani
Hana sakri , indah rupa

Saboh tahta , lom jipeugot
Jeuneh nibak,  beusoe meulila
Hana tameh , nibak bumoe
Meugantung,  keudroe di udara

Dumnan nikmat , raja laknat
Meugah jithat,  dalam donya
Sinan jiduek,  raja laknat
Nibak teumpat,  ateueh geuta

Nibak janggot raja firaun
Meugantung dum intan meutia
Cahya limpah hana lawan
Macam-macam dum peurmata

Maken kaya,  raja laknat
Maken got that , syeetan daya
Teukabo that , hana bagoe
Peuraya droe , po ceulaka

Han jithee na,  baranggasoe
Ban galak droe,  jikeurija
Nyan keuh raja , iblih peulale
Geunab uroe , jiboeh daya

Padum lawet,  teuma dudoe
Rakyat nanggroe,  jiseuranta
Jikrah rakyat , banda duson
Habeh jitron,  tuha muda

Habeh keunan , dum meuhimpon
Bak Firaun,  raja raya
Wazi meuntroe , uleebalang
Panglima prang,  dum sineunâ

 

Geusyik waki , bentara biang
Dum sibarang , gasien kaya
Habeh yoeh nyan , dum meusapat
Timu barat , habeh teuka

Ka meuhimpon , ubak deelat
Dumna rakyat , tuha muda
Oh ka habeh , dum sinaroe
Angkat jaroe , di jeumala

Deelat ampon , payong nanggroe
Keupeue kamoe , neuseuranta
Keupeue tuanku , pangge kamoe
Neukheun jinoe,  po meukuta

Troen le sabda,  raja Firaun
Jibri maklum,  meunoe haba
Wahe rakyat,  banda duson
Seumbah ulon , bandum gata

Bek le gata , seumbah patoeng
Jinoe  ulon , tuhan gata
Hana laen,  tuhan jinoe
Nyoe keuh lonnyoe , nyang sibeuna

Beuta tupeue,  dum sinaroe
Ulon teunyoe , tuhan gata
Meunan jikheun , raja pindoe
Yue seumbah droe , po ceulaka

Ka jidawa , droe jih tuhan
Kaphe jahanam , darohaka
Rakyat deungo , meunan jikheun
Yohnyan bandum , sujud sigra

Ka jiseumbah,  raja Firaun
Uleh ureueng,  dum sineuna
Masa Firaun , kheun droe tuhan
Bak sikalian , dum rakyat na

le sungoe Nil,  nanggroe Meuse
Cit teudoeng le , laju sigra
Laju teudoeng,  hana ile
Hireuen hate , rakyat dumna

 

jikalön ie,  hana ile
Jitanyoeng Ie , ubak raja
Deelat ampon,  syahi alam
Di yueb kadam , nyang mulia

Meunyo raja , sabet tuhan
Cuba kaman , yue le gata
Ie sungoe Nel,  nyan beu ek kreueh
Jeuet di ateueh , pasang kuda

Beujeued kamoe , jak di ateueh
Cuba peukreueh,  uleh gata
Firaun deungoe,  meunan ulah
Jijak pantah , yoehnyan sigra

Bak sungoe Nil,  sampoe langkah
Rakyat barollah , dum sireuta
Teuma jijak,  raja Firaun
U dalam krueng , sidroe saja

Lam sungoe Nil,  laju jibloeh
Na keuh jeuoh , saboeh sangga
Yoh nyan jinoem , u dalam krueng
Ka meuteumeung,  saboeh guha

Deuh jikalon,  saboh ruhueng
Raja Firaun , tamoeng sigra
Ija sikrak,  nibak takue
Laen sapeue , hana jiba

Oh sare troeh , jih u dalam
U bak tuhan , muhon pinta
Jisujud le,  meureundah diri
U bak rabbi,  zat Nyang Esa

Meunoe seumbah , raja asi
HE YA RABBI YA MAULANA
Bahwa ulon , sah tupue trang
Gata tuhan , nyang sibeuna

Nyang peujeuet , sigala alam
Jen ngon insan , sibarang na
Teuma jinoe,  ulon muhon
Akan ulon,  neukarunia

 

Neubri Keu lon,  keubeusaran
Keuleubehan,  dalam donya
Keubeusaran,  lam donya nyoe
Neubri keu kamoe , ya rabbana

Bahwa ulon , han le harap
Akan nikmat , dudoe teuma
Keubeusaran , di akhirat
Han le hajat , ya rabbana

Meunan seumbah,  raja Firaun
Troeh le ureueng , sidroe teuka
Nibak yoeh nyan , sidroe ureueng
Nibak ruhueng , dalam guha

Teuma marit , ureueng lakoe
Tanyoeng meunoe,  ubak raja
Hai Firaun,  peugah beutrang
Pakri nyang ban , nafsu gata

Meunan tanyoeng , ureueng lakoe
Raja pindoe , seuot sigra
Jinoe maksud , ulon tuan
Uleh Tuhan , neukarunia

Ie sungoe Nil,  jipateh lon
Ban nyang lon kheun,  jitem rida
Beujituroti , peurintah lon
Ulon muhon , bak rabbana

Teuma seuot,  ureueng lakoe
Neukheun meunoe,  ubak  raja
Neukarunia , uleh Tuhan
Pakri nyang ban,  maksud gata

Ban nyang hajat , Tuhan nyang bri
Akan teutapi,  wahe raja
Tameujanji , deungon kamoe
Supaya sampoe , hajat gata

Seuot Firaun , jikheun na'am
Bahle lon tem,  ban kheun gata
Asai sampoe,  nafsu ulon
Ban nyang takheun,  ulon rila

 

Teuma seuot , ureueng lakoe
Janji kamoe , deungon gata
Pajan-pajan , teuma datang
Peusuroh Tuhan,  keunoe teuka

Beuta ikot ban , nyang geukheun
Wahe Firaun,  uleh gata
Meuhan tapateh , Rasul Tuhan
Sinoe karam, teuma gata

Dalam krueng , nyoe gata mate
Nyan keuh janji,  wahe raja
Jinoe peugo, saboh surat
Tatiken cap,  jaroe gata

Seuot Firaun, pakri padan
Keureutah tan , daweuet hana
Ureueng lakoe , coek le yoh nyan
Keureutah ngon , daweuet sigra

Raja Firaun , peugot surat
Tiken leugat , janji nyang ka
Jijoek ubak , ureueng lakoe
Neukeubah jinoe , dalam guha

Ureueng lakoe,  lon peugah kri
Mangat meuri, meusoe nama
Malaikat , nan Jibrail
Pham hai akhi,  dum beurata

Neucoek surat,  le Jibrail
Neukeubah le , dalam guha
Hingga troeh bak,  janji Firaun
Bak masa nyan,  neucoek teuma

Neupeuleumah,  bak Firaun
Meunan geukheun , lam calitra
Teulheueh nibak nyan,  raja Firaun
Di dalam krueng , teungoeh sigra

le sungoe Nil,  nanggroe Meuse
Pi ka ile miseue , nyang ka
Ban nyang jikheun,  le Fir aun
le dalam krueng,  turoet dumna

 

Oh jiyue doeng , le Firaun
le dalam krueng , teudong sigra
Meunan cit oh , jiyue mudek
Laju jiek,  hana dakwa

Ban peurintah,  raja Firaun
le dalam krueng , ikot lança
Dumnan neubri , uleh Tuhan
Keubeusaran , dalam donya

Teuma jiyue , yohnyan beukreueh
Jeuet di ateueh , pasang guda
Sireutoh ribee , jiyue ureueng
Ateueh ie krueng,  jak ngon guda

Ateueh ie krueng,  yoeh nyan jijak
Na keuh jarah , tujoh singka
Yoh nyan sabda,  raja Firaun
Ubak kawoem,  dum sineuna

Hai sigala , rakyat bandum
Nyan takaloen , uleh gata
Hana laen , wahe kawoem
Nyoe keuh ulon , Tuhan gata

Ie sungoe Nil,  Lon nyang hukom
Ban titah Ion,  han jidakwa
Soe na Tuhan,  laen nibak Ion
Ie dalam krueng,  Ion kuasa

Kuasa that , ulon sidroe
Ban galak droe , Ion keurija
Beutatupeue,  dum sinaroe
Nyoe keuh kamoe , Tuhan gâta

Rakyat deungoe,  meunan bagoe
Ka jipujoe , si ceulaka
Kamoe pateh,  tuanku droe
Gata sidroe,  that kuasa

Raja Firaun , teuma jiwoe
U meuligoe , ka jigisa
Ainussyamsi , nan meuligoe
Hana bagoe , indah rupa

 

Teubiet mata ie , yueb meuligoe
Ile keudroe,  jroeh lagoena
Lam ruweueng batee , jiteubiet ie
Sangat leupie,  sijuek raya

Jiyue peugoet , tameh peuet boh
Balet ngon meuh,  Seumuanya
Saloran ie , peugot di ateueh
Jeuneh nibak meuh,  dum seumua

Jilalu ie , roet saloran
Troen lam padang,  ile lanja
Ka jisiram , dum tanaman
Deungon ie nyan,  dum sineuna

Deungon izin , Khaükul alam
Dum tanaman, subur raya
Hudep tanaman , hana peue kheun
That ijo on , hana tara

Jimuboeh le , dum tanaman
Makmu hanban,  dum sigala
Jipeugoet le ,meunyeuk zaiton
Hana peue kheun, jai lagoena

Peugoet ubat , le Firaun
Meunyeuk zaiton,  mustajab raya
Baranggasoe,  saket tuboeh
Sare jiboeh , puleh sigra

Ban jigeusok, nibak badan
Puleh rijang, sikleb mata
Kheun Firaun , ubak kawoem
Nyan takalon,  bandum gata

Lon tuhan , nyang kuasa that
Peu nyang hajat , lon keurija
Soe nyang saket , lon boh ubat
Puleh leugat , sikleb mata

Dumnan nikmat , raja laknat
Meugah jih that, dalam donya
Lurong tuhan , asoe jahannam
Troh bak ie krueng , jipeuhamba

 

'Oh jirasa , dumnan nikmat
Maken sangat,  teukabo raya
Hingga meugah,  timu barat
Meusyeuhu that,  si ceulaka

Habeh meugah,  jeueb-jeueb nanggroe
Jiyue kheun droe , tuhan Esa
Ka jidakwa , droe jih tuhan
Kafe jahannam,  asoe neuraka

Meusyeuhu ban , saboeh alam
Droe jih tuhan, jiyue kata
Ie sungoe Nel,  jih peurintah
Meusyeuhurah,  jeueb-jeueb donya

Laen nibak nyan , meunyeuk zaiton
Puleh ureueng , ube nyang na
Padum lawet , teuma dudoe
Deungo jinoe,  lon calitra

Bak simalam,  raja pindoe
Teu eh keudroe, ateueh geuta
Bak malam nyan , leumah lumpoe
Jikalon nyoe , bak deulima

Bak deulima , ramphak han soe
Jiek keudroe , dalam hawa
Jiek laju , sangat manyang
Raja pandang,  lam rahsia

Tiba-tiba , jitroen rijang
Dalam padang , teudong sigra
Sangat ramphak,  hana lawan
Reului padang , ube nyang na

Meuhimpon le , dumna makhluk
Ka jijak duek , yueb deulima
Habeh keunan,  dum jijak duek
Dumna mahluk , tuha muda |

That sukaan , bandum mahluk
Jiduek diyueb , kayee raya
Raja Firaun , ka teukeujoet
That teumakoet , hana tara

 

Bak masa nyan , that teumakoet
Leungo atoet,  miseue geumpa
Jieu kayee,  sangat hebat
Teumakoet that,  si ceulaka

Hingga teuma , beungoh uroe
Jikrah jinoe , nujum dumna
Sigala nujum , deungon sihe
Meuhimpon le , keunan teuka

Peu ek seumbah , ahlun nujum
Bak Firaun , raja raya
Deelat ampon , syahi alam
Nyang meugeugam , alam donya

Keupeue tuanku,  pangge kamoe
Neukheun jinoe , po meukuta
Troen le sabda , raja Firaun
Wahe nujum , deungoe  hamba

Nyang lon pangge , gata keunoe
Cuba jinoe , taboeh makna
Raja Firaun,  laju peugah
Ban nyang leumah,  lam rahsia

'Oh ka habeh , dum jipeugah
Peu ek seumbah,  nujum dumna
Deelat ampon,  syahi  alam
Di yueb kadam,  nyang mulia

Di sinoe , lam nanggroe Meuse
Akan lahe , sidroe hamba
Nibak kawoen , Bani Israil
Hana sakri,  that peurkasa

Nyang peutalo , tuanku droe
Jih nyan dudoe , jeuet keu raja
That beurani , lagi gagah
Nyan nyang ubah , agama gata

Firaun deungo,  dum peuneugah
Yoh nyan susah,  hana tara
Teuma tanyoeng , raja Firaun
Ubak nujum , lom pareksa

 

Peue ka lahe , lam donya nyoe
Cuba jinoe,  tacalitra
Peu ek seumbah,  ahlun nujum
Jibri maklum,  ubak raja

Goh lom lahe,  tuanku droe
Goh sampoe lam , kandong bunda
Goh lom troh , lam kandong ibu
Mantong bak du , goh keulua

Lam buleuen nyoe , he Sulotan
Rhoet u dalam , kandong bunda
Raja Firaun,  deungo meunan
Jikrah yoeh nyan , balatantra

Sigala kawoem,  Bani Israil
Jiyue peucre,  ngon judonya
Han jibri rab,  lakoe binoe
Ban sinaroe , kawoem dumna

Jilarang Ie,  yoeh nyan pantaih
Ban peurintah,  nibak raja
Hana sidroe,  jijeuet bantah
Ban peurintah,  si ceulaka

Teutap jitham , dum sinaroe
Jeueb-jeueb sagoe , jiyue jaga
Padum lawet,  teuma dudoe
Kheundak sidroe,  po Nyang Esa

Ban nyang kheudak,  tuhan sidroe
Baranggasoe , han ek sangga
Sidroe kawom,  Bam' Israil
Nyang geurasi , sImran nama

Biduanda,  raja Firaun
Imran geukheun , aneuk lawa
Lawa aneuk , Nabi Yakub
Meunan teuseubut , lam calitra

Imran kawon , Bani Israil
Nyang isteri , Hail nama
Saboeh riwayat , geukheun Bukhaet
Meunan sabet,  lam calitra

 

Nama aneuk , na dua droe
Ureueng lakoe , Harun nama
Sidroe inong, nan Maryam
Aneuk Imran , nyan ban dua

Takeudi Allah , bak simalam
Deungo teelan,  lon calitra
Ban nyang kheudak,  nibak rabbi
Meusti jadi,  han, jeuet hana

Hail neujak , bak malam nyan
Ubak Imran , di istana
Keureuna sangat , rindu deundam
Akan Imran , nyang judonya

Ureueng kawai,  raja Firaun
Yohnyan bandum,  teungeut indra
Panyoet po len , yohnyan bandum
Hail tamoeng,  pantaih sigra

Sigala pintoe,  habeh teuhah
Tamoeng pantaih,  lam istana
Meunan teukeudi,  nibak Allah
Hail leupah , tamoeng lanja

Hingga sampoe , ubak Imran
Sinan sajan,  deungon raja
Raja Firaun,  teungeut pingsan
Sidroe Imran , nyang na jaga

Tatkala nyan,  meungsi tuboh
Meusyen manyoeh , hana tara
Bak ulee eh , raja Firaun
Raja bajeueng , jithee hana

Sidroe ureueng,  jitupeue tan
Jimak Imran , ngon judonya
Malam nyan keuh,  kheudak makbud
Pinah Zuriat,  Nabi Musa

Nibak ayah,  ubak umi
Kheundak rabbi,  po Nyang Esa
Teulheueh nyan Hail,  laku neuwoe
U rumoh droe , pantaih sigra

 

Teubiet faja , beungoh uroe
Ban sinaroe,  habeh jaga
Habeh jaga,  asoe meuligoe
Raja pindoe , pi ka jaga

Ban teukeujot , raja Firaun
Ahli nujum,  jihei sigra
Troeh Ie teuka , keunan bandum
Ahli nujum , ngoen sihe dumna

Troen Ie sabda,  raja Firaun
Ubak nujum,  jipareksa
He sigala,  ahli nujum
Cuba kaloen , lam rahsia

Peue ka sampoe,  lam kandongan
Budak nyang,  runtoeh agama
Nyang peuruntoh,  agama lon
Cuba kalon,  lam rahsia

Peu ek seumbah,  ahli nujum
Jibri maklum , ubak raja
Deelat ampon , syahi alam
Ka u dalam , kandoeng bunda

Sudah sampoe , dalam kandong
Deungon hukom,  Allah Taala
Beuklam watee,  teungoh malam
Rhot u dalam, s kandong bunda

Firaun deungo , meunan ulah
Bri peurintah , yoeh nyan sigra
Ureueng inoeng , Bani Israil
Sama seukali , yue pareksa

 

Jipareksa soe,  nyang hame
Jiyue poeh le , aneuk sigra
Ureueng agam , Bani Israil
Sama sikali , jipeunjara

Dalam pageue,  raja Firaun
Keunan bandum,  habeh jiba
Jiyue kawai , bak biek Qubti
Bani Israil , dum sineuna

 

Sigala kawoem , Bani Israil
Biek Qubti , nyang keupala
Seureuta jisie , le Firaun
On geulunyueng,  jisie rata

Macam-macam , seksa jibri
Akan Bani,  Israila
Yakni seupeurti,  firman tuhan
Dalam Quran , nyang mulia

YAZBAHUNA ABNAAKUM WAYASTAHYUNA

NISAAKUM  ZALIKUM BALAUN MIN

 RABBIKUM AZIM
Jikoeh takue , aneuk agam
Sikalian , yoehnyan masa

Jipeuhudep , aneuk inoeng
Umu peuet thon , meunan rupa
Inong hame , pruet jiyue plah
Meunan ulah,  jikeurija

Sampoe peuet thon , Bani Israil
Seuntok sabe,  dukacita
Macam-macam,  seksa jibri
Jipoeh mate , aneuk dumna

Jipoeh mate , aneuk agam
Sangat keujam,  hana tara
Le that mate , han peue peugah
Meulaenkan Allah , thee sibeuna

Nyangkeuh bala,  nibak rabbi
Akan Bani,  Israila
Teuduek 'oh noe , saboh ulah
Meuwoe kisah , keu Hail muda

Laju hame,  po sambinoe
Ho siuroe,  maken raya
Troeh pareksa,  geunap uroe
Peusuroeh nyoe,  nibak raja

Jeueb-jeueb rumoh,  jiek sampoe
Ureueng binoe,  jipareksa
jieu soe na,  nyang meungandong
Aneuk bandum , jipoh sigra

Ubak rumoh , Hail sidroe
Hantom sampoe , troh jiteuka
Hana torn roh,  keunan jijak
Deungon keuheundak,  Allah Taala

Hingga sampoe , sikureueng buleuen
Hantom sinan , troeh jihala
Sikureueng buleuen,  sikureueng uroe
Tan meusidroe , keunan teuka

Ban troeh watee,  buleuen sampoe
Lahe jinoe , Nabi Musa
Deungon rupa,  that peungaroe
Umpama proe,  buleuen purnama

Muka rumeh,  mameh han soe
Baranggasoe , galak suka
Hail kalon,  aneuk badan
That sukaan,  hana tara

Neu eu rupa,  that analan
Tiwah bintang , malam jula
Hingga teuma , bak siuroe
Troeh le sampoe , hamba raja

Hail kalon,  dum peusuroeh
Keunan ka troh , bandum  teuka
bak masa nyan , sangat susah
Pakri  ilah,  kubicara

Meunyo jiek troh u rumoh
Meuhat jipoh aneuk hamba
Ho kujak som bek jitupat
Hail sangat dukacita

Masa nyan , that hate ragu
U bak dapu,  laju geuba
Tayeuen raya,  ateueh dapu
Keunan laju , geutiek Musa

Apui di yueb , raya that hu
le pih kaju , meubura-bura
Geucoek tutoep , geutoep laju
Bek deuh jeu eu , nyan aneukda

Bahle geupoeh , keudroe laju
Bek jibalu , uleh raja
Ngon ie mata,  rhoet meutabu
Sayang ta eu,  hana tara

Nibak jipoeh,  le Firaun
Goet kutaguen, laju sigra
Meunyoe mate,  bak kutaguen
Tinggai tulueng,  kueu rupa

Meunan pike , bungong sumpueng
Tamse ujeuen,  rhoet ie mata
Hamba raja , keunan ka troeh
Dalam rumoeh,  jiek sigra

Ban troeh jiek,  dalam rumoeh
Sare mehmoeh,  jak mumita
Jeueb-jeueb sagoe,  laju jibloeh
Lam-lam iboh , jieu rata

Jipareksa bit that,  sunggoeh
Sampoe katroeh , jiek u para
Meungna bacut , nyang meubungkoeh
Leugat jiploeh , jipareksa

Nyang na leumah,  sinan jieu
Ateueh dapu , tayeuen raya
Apui di yub , raya that hu
Nyan keuh sapeue , tan jibuka

Nyan keuh tayeuen , tan jipeuhah
Laen sudah,  jieu rata
Hail marit , teuma sikrak
Neupeugah bak,  hamba raja

Pane aneuk lam,  rumoeh nyoe
Ureueng lakoe , sinoe hana
Ureueng lakoe,  tan meubayeuen
Bandum geutheun,  ubak raja

Ek na aneuk,  nyang tan lakoe
Gata sidroe,  pungoe  raya
Na tadeungoe,  ureueng binoe
Hana lakoe,  aneuk jih na

Teuma jitroen,  laju jiwoe
Ka seuleusoe , jipareksa
Jinoe keu Hail , Ion hareutoe
'Oh leupah woe, hamba raja

Yoh nyan neumoe , neupoeh-poeh droe
Hana bagoe , dukacita
Ingat aneuk,  nyang samlakoe
Geupasoe lam,  tayeuen raya

Kupeusiblah,  bak Firaun
Kutaguen , lam tayeuen raya
Kupinah bak , babah rimueng
Kusurung , lam babah buya

Hantoem roeh buet,  baranggasoe
Ulah bagoe,  Ion keurija
Meunan pike , po sambinoe
Rhoet meulangoe , ngon ie mata

Bahle kaman , jinoe kurhueng
Kucoek tuleueng,  aneuk hamba
Ngon ie mata , roe meugrum-grum
Tamse ujeuen , 'oh keunong sa

Peurab yoehnyan , ubak dapu
Buka laju , tayeuen raya
'Oh ban sare,  leumah geu eu
Dalam ie ju,  nyan aneukda

Teuduek keudroe , dalam ie j u
Meung sigeutu,  tan binasa
Ngon on kayee , sikrak neumat
Hijo pih that,  ta eu rupa

On kayee nyan,  neupeumeuen
Ngon teukhem-khem,  rumeh muka
Lom  neucoem-coem , on kayee nyan
Nibak tangan , uleh Musa

Meu Hail kalon , aneuk badan
Neucoek rijang,  neucoem neuwa
Mangat hate , hana lawan
Ubak Tuhan , sujud sigra

Ucap syuko , po sambinoe
Tuhan sidroe,  that kuasa
Na sikeujab , teuma dudoe
Deungoe meunoe , deuh suara

Suara gaeb,  neudeungo su
Tabri susu , aneuk gata
Bek teumakoet,  baranggasoe
Tuhan sidroe , nyang peulara

Tayue peugoet,  saboh peutoe
Keunan pasoe,  laju sigra
Lam sungoe Nil,  tapeu ile
Bahle jime , le ie raya

Bek teumakoet,  wahe Siti
Sidroe rabbi , nyang peulara
Aneuk gata,  jadi Nabi
Pangkat tinggi , bak rabbana

Nabi musa, Tuhan jadi
Ulul 'azmi , pangkat raya
Bek na susah,  dalam hate
Meuriwang Ie , lom bak gata

Hail neudeungo , suara meunan
Kabul yoeh nyan,  laju sigra
Neubri susu,  laju rijang
Teuleueh nibak nyan , meukeukira

Bak soe Ion yue , peugot peutoe
Ureueng lakoe , sidroe hana
bak masanyan , ureueng lakoe
Ban sinaroe,  theun le raja

Übe kawoem , Bani Israil
Sama sikali , lam peunjara
Hail susah , hana sakri
Troh Jibrail , keunan teuka

Peurupa droe , Bani Israil
Meu Hail Siti , kalon rupa
Hail neukalon,  nyan kawom droe
Neukheun meunoe , pantaih sigra

Wahe aneuk,  deungo kamoe
Tuloeng jinoe,  Ion le gata
Meuhei tukang , sidroe keunoe
Hajat kamoe , sangat raya

Jibrail jak , laju rijang
Siat tukang , katroh teuka
Hail peugah , ubak tukang
Peugot rijang,  peutoe raya

Peugot Keu Ion , saboh peutoe
Ulah bagoe , ban keureunda
Tukang peugoet,  leugat peutoe
Pantaih han soe,  jikeurija

Jipeugot pih,  sangat rapat
Deungon siat,  hase leungka
Teulheueh nyan,  neubri le upah
Tukang pantaih,  le jigisa

Hail neucoek,  aneuk lidah
Susu pantaih,  neubri sigra
Neubri susu,  hingga ngon troe
Dalam peutoe , pasoe lanja

Bak sungai Nil,  neume sampoe
Neutiek jinoe , lam ie raya
Ie mata roe,  han peu peugah
Ile limpah , troh u dada

Wahe aneuk, nyang meutuah
Bak Allah , Ion seurah gata
Gata Ion joek , ubak Allah
Ban peurintah , po Nyang Esa

Bak Jibrail,  neukheun meunoe
Deungo kamoe,  he aneukda
Bek tapeugah,  bak barangsoe
He aneuk droe , nyoe rahsia

Seuot jibrail , insya Allah
Ban nyang titah,  nibak poma
Lheueh nyan Hail , neuwoe pantaih
Sampoe langkah , troh u tangga

Teutap Hail, ka troeh neuwoe
Jinoe peutoe,  Ion calitra
Lam sungoe Nil,  hanyot keudroe
Keudeh keunoe,  ie raya ba

Sungoe Nil nyan , dua simpang
Saboh cabang, yueb istana
Yueb meuligoe,  raja Firaun
Meunan geukheun,  lam calitra

Peutoe neuhue,  le Jibrail
Neupeuile,  yueb istana
Raja Firaun , tatkala nyan
Jidong sinan,  ngoen judonya

Sinan jidoeng , di meuligoe
Deungon putroe , nyang jroh rupa
Tuan putroe,  nan Asiah
Rupa indah , ban meutia

Nyan pih kawom, Bani Israil
Hana sakri , indah rupa
Leumah neueu,  le putroe ti
Peutoe ile,  lam ie raya

Raja Firaun,  yue le rijang
Bak dendayang , yue cok sigra
Dendayang tron , dalam sungoe
Meung coek peutoe,  lam ie raya

'Oh jikeumeung mat , deungon jaroe
Yoh nyan peutoe , jeuoh sigra
Han meuteumeung,  pih meung sidroe
Neutroen putroe , dudoe teuma

Asiah troen,  dalam sungoe
Neucoek putoe , lam ie raya
Neupeuteungoh,  di dalam krueng
Bak Fir’aun,  laju neuba

Raja kalon,  sangat hireuen
Teuma jikheun , meunoe haba
Peue hekeumat , keunoe sampoe
Peue na asoe , didalamnya

Jibuka le , tutoep peutoe
Budak sidroe,  jieu rupa
Elok paras , that peungaroe
Tamse uroe , cahya muka

Kulet tuboh,  lang seumbilang
Siulah sang , bungong jeumpa
Cahya mata , peungeuh bandrang
Han ubah ban , bintang Zahra

Soe nyang kalon , hireuen mandang
Teuka sayang , kaseh mesra
Kaseh hate , soe nyang pandang
Nyuem bek leukang , nibak mata

Raja Firaun , laknat Allah
Yoeh nyan leumah,  dalam dada
Dalam hate , Iblis jisah
Jipeuleuma,  jiboeh daya

Yoeh nyan leumah,  dalam pike
Tapoeh mate,  wahe raja
Nyan keuh budak,  teuma akhe
Nyang peureule , dum agama

Jipoeh gata,  hingga mate
Nanggroe Meuse,  jih kuasa
Meunan leumah,  dalam hate
Jimeungpoh le , yoehnyan sigra

Kheun Asiah , wahe deelat
Pioh siat , dilee saba
Mudah-mudahan , dudoe meuhat
Na meunfaat , wahe raja

Seudang di Ion , ban kupandang
Peungeuh bandrang , cahya mata
Dumnan nikmat,  keubajikan
Keunoe datang,  he meukuta

Pakon tapoeh , wahe deelat
Hana meupat,  keunoe teuka
Nyan keuh tanda,  na meunfaat
Troeh ji intat , le ie raya

Ka troeh jiba,  uleh ie krueng
Bahle tatueng , keu aneukda
Ban jideungoe,  le Firaun
Asiah kheun , meunan haba

Nyuem sang jimoe,  dalam pike
Hate kafe,  dalam dada
Hana jadeh,  jipoeh mate
Ka neutham le,  putroe muda

Aneuk Firaun , keunan jijak
Jicoek budak,  le jiriba
Seubab hate , jih that galak
Ji-eu budak,  indah rupa

Yoeh nyan budak , pih ka neumoe
Rhoet meulangoe,  ngon ie mata
Ie mata roe,  jile keudroe
Keunoeng asoe,  aneuk raja

Aneuk Firaun,  le that kude
Cit puleh le,  deungon sigra
Rhoet  ie mata,  keunoeng kude
Jisampoeh le,  aneuk raja

Habeh puleh , bandum kude
Paroet hanle , luka hana
Kheun Asiah,  bak Firaun
Nyan takaloen,  he meukuta

Na neukalon , he solutan
Keumuliaan,  budak teuka
Aneuk gata , dum meukude
Puleh sare , sikleb mata

Firaun kaloen , hireuen hate
Raja kafe,  gaseh teuka
Jicoek budak , jiriba le
Galak hate,  hana tara

That sukaan,  raja kafe
Jiboeh nan le,  teuma Musa
Nyan keuh Musa , jirasi nan
Jikrah yoeh nyan,  inoeng dumna

Jiyue krah le,  dumna inoeng
Jiyue peumom , Nabi Musa
Dumna inoeng , meuaneuk cut
Jiyue seutoet,  yoeh nyan sigra

Troeh le teuka,  dum meuron-ron
Ka meuhimpon , ubak raja
Peuek seumbah , inoeng bandum
Deelat ampon , po meukuta

Keupeue tuanku,  pangge kamoe
Neukheun jinoe , wahe raja
Troen le sabda , raja Firaun
Jiyue peumom,  Nabi Musa

Gata jinoe,  Ion meunasu
Yue bri susu , aneuk hamba
Aneuk Ion nyoe , tabri susu
Seuot laju,  inoeng dumna

Deelat ampon , han peue salah
Ban nyang titah , po meukuta
Teuma peurab , seun-seun sidroe
Jicoek jimoe , Nabi Musa

Soe-soe nyang coek , leugat neutem
Cit teukhem-khem,  rumeh muka
Jisuet Ie mom , peugleh puteng
Musa paleng,  pantaih sigra

Soe-soe nyang bri , han neutem mom
Hana neutueng,  paleng muka
Teuma peurab , inoeng laen
Peugleh puteng , mom jih sigra

Soe-soe nyang bri , hana neutem
Kaneupaleng,  laju muka
Hingga rata , inoeng bandum
Kheundak peumom,  Nabi Musa

Soe-soe nyang bri , hana neutueng
Raja Firaun,  duka cita
Jiyue pangge , jeueb-jeueb gampong
Pat  na inoeng , aneuk muda

Sigala inoeng,  meu aneuk cut
Jiyue seutoet , peumom Musa
Han cit neutueng , soe-soe nyang bri
Uleh Nabi , yullah Musa

Sidroe bentara,  raja asi
Kawoem Bani , Israila
Peuek seumbah,  bak Firaun
Deelat ampoen,  po meukuta

Sidroe inoeng , di gampong Ion
Le that ie mom,  wahe raja
Ban jideungoe,  le Firaun
Jak leh katueng,  keunoe sigra

Cuba jak tueng , làju rijang
Kadang-kadang,  jitem rila
Jijak tueng Ie , teuma yoh nyan
Jiba keunan , ubak raja

Teukeudirollah , maha suci
Karoeh umi , Nabi Musa
Meunyan keuh Hail,  bunda Nabi
Tan jituri , ureueng dumna

Firaun pih , tan jituri
Bunda Nabi , yullah Musa
Teuma jiyue,  le Firaun
Cuba peumom,  aneuk hamba

Seuot Hail , han peue salah
Ban nyang titah,  po meukuta
Hail neupeurab , laju keunan
Neucok yoehnyan , Nabi Musa

Musa marit,  ngoen isyarat
Dum neupeugah, ubak bunda
Wahe bunda , neungieng keunoe
Ateueh Ion nyoe , hadap muka

Bek peulikoet , ateueh kamoe
Nyoe keuh Ion nyoe , aneuk gata
Ucap syukoe,  he ma badan
Gaseh tuhan , that keugata

Hail pih ka , neuturi le
Aneuk boh hate,  cahya mata
Masa nyan that , seunang hate
Neupeumom le , nyan aneukda

Sare neubri, leugat neutueng
Raja Firaun , suka cita
That sukaan , raja Firaun
Ka na ureueng , peumom Musa

Tatkala nyan , laju jikheun
Aneuk uloen , tapeulara
Tapeutimang , aneuk Ion nyoe
Taduek sinoe , di istana

Bak masa nyan , meuntroe Haman
Na disinan,  sajan raja
Jieu Musa , ka neutem mom
Ka jitanyoeng , jipareksa

Ubak Hail , tanyoeng meunoe
Peue budak nyoe , aneuk gata
Hail neuseuot,  neukheun meunoe
Kon budak nyoe,  aneuk hamba

Ka keuh jitem , ulon peumom
Hana meukon , ka jirila
Ka meunan Hail , jaweueb kalam
Seungab Haman , hanle haba

Ka teutap Hail , neuduek sinan
Neupeutimang,  Nabi Musa
Jibri upah,  le Firaun
Sibuleuen , lhee reutoh dina

Sinan neuduek,  di meuligoe
Sajan putroe , Asiah muda
That sukaan , tuan putroe
Sang aneuk droe , Nabi Musa

Neupeutimang,  jroeh han bagoe
Malam uroe,  na soe jaga
Ngon deundayang,  disinan dum
Cit ka maklum,  rumoh raja

Firaun pih,  that sukaan
Keu Musa nyang,  indah rupa
Sang aneuk droe , dalam badan
Gaseh sayang , hana tara

Hingga teuma , ho siuroe
Rayek keudroe,  Nabi Musa
Ho siuroe,  rayek leugat
Tamse kulat,  ujeuen teuka

Maken rayoek,  Nabi yullah
Maken indah , laju rupa
Meutamah-tamah,  rupa indah
Cahya nubuwwah,  Nabi Musa

Hingga sampoe , jeuet beudoeh doeng
Karab jeuet plueng , han that lanca
Bak siuroe , raja Firaun
Kheudak kaloen,  Nabi Musa

Jiyue ba le , u hadapan
Troh le rijang , keunan teuka
Jicoek Musa,  le Firaun
Dalam lumueng , peuduek sigra

Peuduek Musa , dalam leumueng
Deuh neukaloen , janggot raja
Neueu janggot , raja Firaun
Meugantung,  dumna peurmata

Duman peurmata , nyang indah that
Dum meuikat , bak janggot raja
Meutia , peurmata intan
Lom manikam , that meucahya

Musa mat le , neupeumeuen
Sang-sang ingen , neueu rupa
Neutarek le , yoeh nyan janggoet
That teukeujoet , si ceulaka

Saket jih that , Musa rinthak
Troeh lam utak , jih meurasa
Bak rasa nyuem , jipoe utak
Jiteubiet meuk,  dalam mata

Raja Firaun, beungeh kon le
Kupoeh mate,  jinoe Musa
Yoeh nyan jikheun,  laknatullah
Bak Asiah , jipeuhaba

Bah le kupoeh , Musa jinoe
Seuot putroe,  pantaih sigra
Pakoen raja,  poeh aneuk nyoe
Peugah jinoe,  peue kareuna

Han tatupeue, tuan putroe
Janggoetku nyoe,  ka jihila
Saketku that,  bak jirinthak
Nyum sang utak , ka teupanca

Nyoe keuh budak , teuma akhe
Nyang peureule , dum agama
Nyang jipeugah , uleh nujum
Bak Ion peunyum , nyankeuh Musa

Dudoe teuma,  nanggroe jitueng
Jih keurajeuen , nanggroe hamba
Kheun Asiah , teuma meunoe
Tuanku droe , beubai raya

Jih aneuk miet,  umu baroe
Goeh jitupeue,  geunoe geuna
Keupeue tapoeh,  budak ubit
Jih aneuk miet,  tan bicara

Peue jitupeue, aneuk miet cut
Hana lom jeuet , jih meubida
Nyang jipeugah , uleh nujum
Jibri maklum,  bak meukuta

Aneuk kawoem,  Bani Israil
Nyang poeh duli,  akhe masa
Jih nyan sidroe,  aneuk urueng
Hanyoet lam , krueng ie raya ba

Pane patoet , nanggroe jitueng
Tuanku kheun , nyang koen haba
Meuhan neupateh,  tuanku droe
Cuba jinoe , wahe raja

Yue cok apui , tungoe sikrak
Dalam tabak,  pasoe sigra
Neupasoe meuh , teuma siblah
Nyang sa mirah,  nyan bandua

Peuduek di keue , jih nyan jinoe
Pakri bagoe,  taeu rupa
Meung jicoek meuh , tuanku droe
Tanda jih nyoe , le bicara

Teuma meunyoe,  jicoek tungoe
Tanda jih nyoe,  goeh meubida
Firaun deungoe,  haba putroe
Bah Ion ujoe,  kaman sigra

Jiba le meuh , apui sajan
Peuduek rijang , di keue Musa
Musa kaloen , apui ngoen meuh
Laju beudoeh , neujak raba

Yoeh nyan Musa , keumeung coek meuh
That seumeuloeh,  neueu rupa
Troen Jibrail , keunan sampoe
Tulak jaroe , Nabi Musa

Karoeh neumat , apui teungoe
Meurasa nyoe,  tutoeng raya
Ban meurasa , tutoeng leupah
Sumpom pantaih,  uleh Musa

Peuloeb jaroe,  dalam babah
Tutoeng lidah , meuri tanda
Nyan keuh sabab , Musa tilo
Neumeututo,  troh ngon raya

Nibak jaroe , nyang mat apui
Meung bacut nyoe,  tan binasa
Teuma keudeh,  nibak babah
Ka na beukaih , tutoeng nyata

Marit putroe , ti Asiah
Dum neupeugah,  ubak raja
Nyan neukalon , tuanku droe
Tanda jih nyoe , tan bicara

Jitem jak mat , apui tungoe
Meunyoe jih nyoe,  akai kana
Raja deungoe,  dum haba nyan
Sabet meunan , ban kheun gâta

Teuma peurab , raja Firaun
Ka jicoek lom , Nabi Musa
Sabab hate , han le seuuem
Jireuguem-reuguem,  galak raya

Teuma leumah , jieu babah
Meuri beukaih , tutoeng nyata
Ban jikaloen,  meunan ulah
Ile limpah,  rhoet ie mata

Yoh nyan jimoe , raja Firaun
Sabab tutoeng , babah Musa
Sayang jithat,  hana peue kheun
Ngon meugrum-grum,  rho ie mata

Teuma neucoek , le Asiah
Ubak Allah,  muhon pinta
Putroe muhon,  ubak Allah
Puleh babah , Nabi Musa

Riwayat nyoe , ajaib that
Deungo sahbat,  Ion calitra
Pakoen hana , tutoeng jaroe
Nyang lidah nyoe , tutoeng sigra

Nibak jaroe , nyang mat apui
Hana sapeue,  na binasa
Nyang jeuet hana , tutoeng jaroe
Neutarek nyoe , janggoet raja

Roeh neutarek , janggot Firaun
Tuhan tuloeng , han binasa
Lom neutampa , raja Firaun
Meunan geukheun , dum ulama

Teuma nyang jeuet,  tutoeng lidah
Neukheun ayah,  uleh Musa
Kafe Firaun , neukheun ayah
Nyang jeuet lidah,  tutoeng sigra

Teuma sabeh , hikmat Allah
Na geupeugah , lam calitra
Sabab Musa , neupeu ile
Di ateueh ie , masa ban na

'Oh ban sare, Musa Iahe
Neupeu ile , lam ie raya
Kareuna Musa , Firaun that kreueh
Akan ateueh , kafe dumna

Tuhan peuduek , Nabi geutanyoe
Ateueh bumo, masa ban na
Nabi Muhammad,  'oh ban lahe
Teuhanta le,  ateueh donya

Kareuna sabab,  Nabi Muhammad
Leumah leumboet , peuranguinya
Ateueh sigala , umat Islam
That peunyayang,  hana nyangsa

Tuhan peuduek , ateueh tanoeh
Supaya kreueh , peuranguinya
Ateueh kafe,  sikalian
Meunan teelan,  Ian calitra

Padum lawet , hingga lambat
Rayoek leugat , Nabi Musa
Sampoe umu,  troeh lapan thoen
Bandum ureueng,  peumulia

Sigala rakyat , nanggroe Meuse
Horeumat sare,  akan Musa
Peumulia , hana peue kheun
Uleh ureueng,  dum sineuna

That jitakoet,  bandum ureueng
Musa jikheun , aneuk raja
Bak siuroe , neujak meuen
Hate ingen , nyang mulia

Musa meuen , bak uroe nyan
Disinan , bak pinto kuta
Troeh le teuka , keunan ureueng
Kheundak tamoeng,  ubak raja

Jak meunghadap,  raja Firaun
Ka jikaloen,  sinan Musa
Ji  eu Musa,  meuen sinan
Dum ureueng nyan,  piyoeh sigra

Han le jijeued,  tamoeng u dalam
Jiduek sinan,  hadap Musa
Teuma troeh lom , biek Kubti
Bani Israil , dum sireuta

Kayee apui , dum jigulam
Jiba keunan,  u istana
Sigala kawom , Bani Israil
Biek Kubti , nyang keupala

Kubti jaga,  Bani Israil
Meunan mufti , nibak raja
Biek Samiri,  troeh lom sampoe
Kayee apui , cit dum jiba

Musa tanyoeng ,bak Samiri
Hoe  peureugi, bandum gata
Seuot Samiri , Ion peureugi
Ubak duli , di istana

Ubak raja , nyang khalifah
Nyan keuh ayah , tuan hamba
Musa deungoe,  meunan ulah
Bek tapeugah , meunan haba

Ulon bukoen , aneuk Firaun
Bek le takheun , singoeh lusa
Laen ulon , ngon Firaun
Bukoen du Ion , si ceulaka

Jih nyan kafe , laknat Allah
Bek tapeugah,  meunan haba
Leupah uloen,  nibak Firaun
Meunan neukheun , nyang mulia

Raja Firaun , pih troeh keunan
Jideungoe nyan , tutoe  Musa
Kheun Firaun , yoeh nyan pantaih
Han kuleupah , aneuk gata

Bahwa gata,  aneuk ulon
Yoeh manyak phoen , Ion peulara
Han kupeulheueh,  gata sinoe
Aneuk kamoe,  nyan keuh gata

Musa deungoe,  meunan jikheun
Hate seuuem,  hana nyang sa
Reugam jaroe , tajoe meutreung
Tumboek Firaun , keunoeng dada

Lheueh neutumboek,  laju neuplueng
Laen ureueng,  lom neumita
Neutumboek lom , sidroe Kubti
Hana sakri , beungeh raya

Sigoew tumboek,  ka meugule
Sinan mate,  laju fana
Kubti laen , leugat jiplueng
Habeh bandum,  ka jikuda

Biek Samiri , pih ka jiplueng
Takoet keunoeng,  tumbok Musa
Yoe that hate , han le arwah
Jicoek langkah,  seun lhee deupa

Ladoem bak plueng , sinan reubah
Ladoem patah , meudarah pha
Habeh jiplueng , dum sinaroe
Jiseumpoem droe , lam-lam paya

Na nyang reubah , patah gigoe
Ladoem asoe,  ka meuleua
Ladoem teu eh , keudeh lam krueng
Nyang patah rueng,  han ek kira

Nyang patah pha,  han ek bileueng
Keunoeng ateueng , bak jikuda
Jibeudoeh lom,  laju jiplueng
Tan jitunyuem,  sidumnan ka

Sang-sang Musa,  ka meubayeueng
Nyang jeuet jiplueng,  tan jikira
Rioh subra , hana peu kheun
Nyang hei keumuen , nyang hei apa

Habeh cre bre , han peue peugah
Nabi  yullah,  neuwoe lanja
U rumoeh droe,  neuwoe pantaih
Ubak nangbah , ka neugisa

Ban sare troeh , neudoeng di leuen
Geureuhem siseun,  pura-pura
Jantoeng pisang klat,  putik pisang nu
Soe di leupu,  rumoeh raya

Soe meuhei Ion,  aneuk teungku
Lon deungo su,  sang biula
Na bu ulon , ma teungku droe
Katroh Ion woe , saweue gata

Kru seumangat,  he samlakoe
Taek keunoe , he aneukda
Musa neu ek , pantaih han soe
Seumah jinoe , seuot bunda

Hail  neukalon , aneuk ka woe
Hana bagoe , neucoem neuwa
Teutap sinan , Musa iem droe
Kisah meuwoe , ubak raja

Saket jithat , hana bagoe
Keunoeng bunoe , tumboek Musa
Nibak dada,  Musa tumboek
Nyum sang rusoek,  patah dua

Bak rasa nyuem , ka lham rusoek
Teusuet batoek,  teupet mata
Rasa badan,  sang ka beukah
Nyum aruah,  ka keulua

Meukuboeh kuboeh , ngon ie babah
Saket leupah,  jipeurasa
Bak masa nyan , ka teupike
Kupoeh mate,  jinoe Musa

Meunan leumah,  dalam hate
Jiriwang le , u istana
Teutap raja , di meuligoe
Jipreh-preh woe , Nabi Musa

Dalam hate , sangat seungkoe
Kafe pindoe,  beungeh raya
Kubti bunoe,  nyang ka mate
Neutumbok le , Nabi Musa

Bak masa nyan,  ka jitanoem
Uleh kawom , keuluarganya
Nabi Musa , Ion hareutoe
Neuduek jinoe,  sajan bunda

Ubak raja,  han le neuwoe
Bak siuroe , nyang mulia
Neujak meuen, taloe jalan
Deuh neupandang,  ureueng teuka

Sidroe Samiri,  teuka keunan
Musa tanyoeng,  meunoe haba
Peue buet kajak , keunoe di kah
Cuba peugah , peue kamita

Ban jikaloen , le Samiri
Jieu Nabi ,  yullah Musa
Teumakoet that , hana sakri
Kheudak lari,  pantah sigra

Musa tumboek,  laju pantaih
Sinan reubah,  lalu fana
Ka keuh mate , laju sinan
Neupreh yoeh nyan,  laen teuka

Samiri laen , neupreh lom troeh
Keumeung tumboek , lagee nyang ka
Samiri nyan , nyang ka mate
Jipreh-preh le,  keuluarganya

Jipreh-preh woe , hana troeh woe
Teuma dudoe,  jijak mita
Jijak seutoet , le kawoem droe
Meuteumeung nyoe , sudah fana

Jieu sinan , cit ka mate
Neutumboek le,  Nabi Musa
Musa kaloen,  bak masa nyan
Katroeh keunan,  laen teuka

Neulet laju , han neubri rab
Ka neupagab , uleh Musa
Teuma jikheun,  le Samiri
Ubak Nabi , nyang mulia

Wahe Musa , deungoe kamoe
Gâta sidroe , that enanya
Takeumeung poeh,  bandum kamoe
Pakoen meunoe,  buet di gata

That enanya , lam donya nyoe
Meunan bagoe , takeurija
Ayah gata , raja Firaun
Ade hukoem,  hana tara

Meunyo mate , sidroe ureueng
Sit geuyue tueng , geupoeh bila
Sidroe mate , sidroe geu tueng
Walee kawom,  goet syeedara

Hana pandang,  keudeh keunoe
Baranggasoe , geupoeh bila
Musa deungoe,  kheun Samiri
Ka meunyuem,  gli hate lia

Nyuem teumakoet , po samlakoe
Teuma neuwoe,  pantaih sigra
Musa neuwoe , u rumoh droe
Hingga sampoe , troeh u tangga

Troeh le teuka,  ureueng sidroe
Keunan sampoe,  ubak Musa
Ban sare troeh,  jikheun meunoe
Deungoe kamoe , wahe Musa

Uloen peugah , nyoe nasihat
Lon bri ingat , akan gata
Ubak gata,  Ion amanah
Minah leugat , jinoe sigra

Kareuna sabab,  inseueh sayang
Ulon tuan , akan gata
Gata jinoe , goeb jak seutoet
Jiyue jak droeb , uleh raja

Kareuna seubab , tapoeh Kubti
Ngoen Samiri,  nyan bandua
Ban dua droe,  sampe mate
Laen lagi,  nyang binasa

Le that paloe , bak meuplueng-plueng
Nyang teupluek rueng , nyang patah pha
Nyang meupayeh,  keudeh lam krueng
Keunoeng reuleueng , reuloeh muka

Keudeh keunoe , dum teulinteueng
Ka teuganggeueng , dum teuhanta
Capiek luka,  hana peue kheun
Le that ureueng , nyangka ceudra

Nyang keuh seubab,  jiyue seutoet
Jimakeusud,  yue poeh bila
Gata jinoe , jipoeh mate
Bila Kubti , nyang ka fana

Nyoe keuh ulon,  bri nasihat
Minah leugat , sinoe gata
Bek sinoe , lam nanggroe Meuse
Taminah le,  laju sigra

Nyang peugah nyan , dum habaran
Sikalian , ubak Musa
Aneuk syeedara,  raja Firaun
Meunan geukheun , lam calitra

Musa deungoe,  haba meunan
Bak masanyan , laju bungka
Musa teubiet,  dalam nanggroe
Neujak jinoe , hoe langkah ba

Sidroe ureueng, jitupeue tan
Neubeujalan,  Nabi Musa
Raja Firaun , laknat pindoe
Keudeh keunoe , jiyue mita

Ban saboeh nyan , jiyue seutoet
Jimakeusud , peubinasa
Padumna treb , sabe seutoet
Tan meurumpoek,  deungon Musa

Habeh jijak , jeueb-jeueb gampoeng
Rata dusoen , jijak mita
Nabi Musa , tan jiteumeung
Jeueb-jeueb huteuen , jibloeh rata

Padum lawet , seutoet meunan
Teudoeh yoehnyan,  han le mita
Teutap raja , saboeh ulah
Meuwoe kisah , Nabi Musa

Nabi Musa , neubeujalan
Neupeuseunang,  hoe langkah ba
Ka neu ek gle , neutroen paloeh
Hana pioh,  jak lam rimba

Nibak gaki , pih tan kawoh
Keunan neubloeh , lam beuluka
Nyang baroe kon,  hana teudoeh
Sabe kawoh , bak anggeeta

Uroe malam , hana piyoeh
Sangat sunggoeh , hana tara
Sira neujak,  alaihissalam
Ubak tuhan , muhon pinta

Neumeulakee,  nibak tuhan
Seurta neuleueng , jaroe dua
Ya tuhanku , po dikamoe
Peulara lon nyoe , hamba gata

Neupeulara lon , nibak seutru
Meunan laku , meunan laku ya rabbana
Meunan minta , 'alaihissalam
Seupanyang jalan , jak lam rimba

Deungon kheudak,  khalikul 'alam
Peungeuh jalan , hana tara
Huteuen luah,  lom deungoen trang
Payah pih tan,  neumeurasa

Tujoeh uroe , tujoeh malam
Neubeujalan,  dalam rimba
Hana bacut , rasa payah
Deuek deungon grah , nyan pih hana 

Hate mangat , han peue peugah
Karonya Allah,  po Nyang Esa
Hingga ka troeh,  bak saboeh teumpat
Neu eu rakyat,  rame raya

Ureueng teuka,  ula ili
Jijak cok ie,  bak teulaga
Ureueng geumeubeue , dalam padang
Bri ie kameng , keunan teuka

Han padum treb,  lheueh nibak nyan
Troeh lom keunan,  ureueng dua
Ureueng binoe,  neu eu yohnyan
Teudoeng sinan , rab teulaga

Rupa indah , that analan
Ban buleuen trang,  yoeh purnama
Badan bulat , keuieng seudang
Raya u manyang,  keumang u dada

Kulet puteh , indah han ban
Siulah sang,  bungoeng jeumpa
Ok di ulee , patah manyam
Baho keumang , meukipah cina

Ilok paras , hana lawan
Miseue bintang , cahya mata
Ban dua droe,  that sambinoe
Tamse uroe , cahya muka

Musa kalon , bak masa nyan
Ureueng inoeng , sinan dua
Neupeurab le , teuma keunan
Musa tanyoeng , meunoe haba

Wahe adek,  deungoe kamoe
Peubuet sinoe,  bak teulaga
Seuot siti , nyang sambinoe
Teungoe bunyoe,  mameh raya

Meujak bri ie , kameng kamoe
Nyang jeuet keunoe , kamoe teuka
Meunan Siti , jaweueb neubri
Seuot Nabi, yullah Musa 

Pakoen cit han,  tabri leugat
Lon eu treb that,  katroeh gata
Jaweueb Siti,  nyang sambinoe
Loen preh sampoe,  üroe sinja

Watee seupoet , rab loeb uroe
Rame keunoe , ureueng teuka
Bri ie kameng , bandum keunoe
Jibuka nyoe , tutoep teulaga

Meungna leubeh , bak ureueng nyoe
Baro kamoe , meuteumeung jeumba
Baro na ie , kameng kamoe
Geunap uroe,  meunan rupa

Meunan keu hai , tiep-tiep uroe
Ayah kamoe , pih  ka tuha
Umu tuha,  daif pi that
Hana kuat,  le keureuja

Musa deungoe,  haba meunan
Teuka sayang , hana tara
Teuka inseueh , deungoen sayang
Peurab rijang , bak teulaga

Neu eu teulaga , yoeh nyan teutop
Musa beuot,  le neubuka
Siblah jaroe,  beuot leugat
Sangat kuat , Nabi Musa

Peuduek tutoep , laen teumpat
Neucroeng leugat,  ie teulaga
Musa neukheun,  ubak Siti
Jak tabri ie , kameng gata

Yoeh nyan kameng , ka geubri ie
Uleh Siti , nyan ban dua
Tuan Siti , hireuen sangat
Neu eu kuat , Nabi Musa

Siblah jaroe , ek geu angkat
Sidumnan brat,  tutoep teulaga
Peuet ploh ureueng , beuot tutop nyan
Baroe reunggang,  ngoen lot tima

Meusamboeng ke Bagian ...........................................( 2 )