Pages


Sabtu, 04 Mei 2013

BEK DAKWA – DAKWI



Oleh : Akhbar Al-Mutawassila
=======================
Alhamdulillah, wabihamdihi
Haba Awwali, pujoe Rabbana
Seulaweut Saleum, 'oh lheuh nyan lagi
Keupada Nabi,  khatam ambiya

Assalamua'laikum, saleum ulon bri
Bek neupeuleupi, wahee syedara
Seu'ot saleum lon, akhi ngon ukhti
Meu shilaturrahmi, tanyoe lam do'a

Keude Kuta Blang, teudeng meuriti
Bireuen hai ukhti, Teudoeng  meubanja
Teuntang MOLOD, uroe lahee Nabi
Ulon neuk rawi, atoe lam banja

Tanyoe di Aceh, ka tamaklumi
Molod di Nabi, ka meu-budaya
Rabi'ul Awwal, nyan phoen mulai
Jumadits Tsani, beurakhe teuma

Di ureueng Aceh, geupeuringati
Uroe lahee Nabi, chiet ka geujaga
Cuma lawet nyoe, na dakwa dakwi
Meusoe khanduri,  bid'ah nama

Nyang peu bid'ah, acara maulidi
Alasan geubri, dali jih hana
Meutan geupubuet, oleh rasuli
Keupu ta a'mali, dali jih hana

Teuma 'oh tapikee, wahee e akhi
Beu tasadari, lee tanyoe semua
Lee pekerjaan, jinoe hai ukhti
Tan peubuet Nabi, tanyoe keurija

Nyoe saboh contoeh, ulon peumeuri
Didalam rawi, kon haba peusuna
Nabi Muhammad, tan geu-e TiVi
Tanyoe meuriti, dirumoh kana

  Meukeupue teuma, juets dakwa dakwi
Nyang meukhanduri, katrep reuncana
Bek gara-gara Molot, peugoet keu Nabi Nabi
Ka bicah kongsi, putoeh syedara

Meumada 'oh noe, haba lam rawi
Mantong mubtadi, ureung nyang rika
Meupat na salah, beuneu maklumi
Sihari-hari, kon nyoe keurija
Lhokseumawe, 18 Januari 2013
÷÷÷÷÷÷÷÷÷÷÷÷÷÷÷÷÷÷÷÷÷÷÷



0 komentar:

Posting Komentar

Komentar FB :