PEMILU

OLEH  SULAIMAN.A.GANI

===========================

Deungoen bismillah, loen mula kalam

Loen pujoe tuhan, sidroe yang esa

Seulaweut saleum, ateuh janjoengan

Panghulei alam, rasul musthafa

Oh lheuh nyan saleum, keu mandum rakan

Inoeng ngoen agam, dusoen ngoen banda

Neusamboet beujroeh, saboeh karangan

Wasiet peuneusan ,saboh mustika

Keu hai pemilu, hajat loen karang

Caleg ngoen partai, hajat loen rika

Taloe ngoen meunang, bak pemilehan

Beik na meu sugang sabei sibangsa

Caleg yang taloe, beuna sabaran

Caleg yang meunang ,beik jeut keu bangga

Pilehan rakyat. ikhlas han ban

Ka kheundak tuhan. lageinyan rupa

Beuna amanah. caleg yang meunang

Neuperhatikan. rakyat jelata

Beik oh ban kajeut. anggota dewan

Rakyat bawahan. tan lei hareuga

Hanlei amanah. lupa daratan

Seubab bak dewan. lethat beulanja

Kijang inova .ngoen kaca itam

Jatah bak dewan .jibrie keu gata

Tuwoe keu rakyat. ureung peujuang

Tuwoe keu tuhan. nyang peujeut gata

Rakyat lam nanggroe. tansoe peutimang

Tansoe peujuang .nasib rakyat ba

Caleg nyan taloe. lam pemileihan

Di gata rakan. bek sakeit jiwa

Beik sampoe seutrees, ulei teuh mumang

Mandum but tuhan, qadha ngoen qadar

Miseu kadang jeut ,anggota dewan

Di gata rakan ,amanah hana

Kadang keu rakyat ,ta peudoli tan

Maka di rakyat han, dipileih gata

Jinoe meu saboh, taloe ngoen meunang

Keu pembangunan, pikei beusama

Pikei keu rakyat, udeip beu seunang

Nanggroe beu aman ,damei seujahtra

Udeip lam makmue, nanggroe lam aman

Beik lei bicah prang, lagei nyang ka ka

Beik lei lam karu, rR.I deungoen gam

Tiep uroe tuhan, kontak seunjata

Pemilu damei, tanyoe hajatkan

Taloe ngoen meunang, beik jeut sengketa

Tundoek ngoen patoeh, lagei atoeran

Taloe ngoen meunang, ikhlas beuna

Mumada ohnoe, haba loen karang

Wasiet peuneusan ,ohno mumada

Menyoena umue, neubrie lei tuhan

Singoeh laen jan ,tasamboeng rika

Banda aceh,  08  april  2009