“ HIKMAH MEUBALOT DALAM MUSIBAH

====================================
Assalammua’laikom, warahmatullak

 Deungan Bisminlah, Allah lon pujoe
Seulaweut-saleum, keu Rasulullah

Nyang ba Risalah, ateuh rhueng bumoe

Manyang meuhalak, punca seulawah
Di sinan leumah, Lam teuba nanggroe
Lon lakee idin, seureuta  meuah
Haba nasehah, lon rika sinoe

Ulon meuhaba, bacut mau'idah
Gantoe hai sahbah, lon peu-ingat droe
Mudah-mudahan, jeut keu faedah
Tuhan Geubalah, oh  uroe dudoe

Kadang di Tuhan, geubri musibah
Seucara 'Ammah, didalam nanggroe
Geutilek iman, soe nyang meujeureulah
Dudoe  hikmah, seubagoe geunantoe

Sunggoh lee macam, cobaan Allah
Contoe nyang mudah, ulon hareutoe
Han geupeu kaya, ladoem hamba Allah
Subab meufarqah, atau meucawoe

Bak masa Nabi, neukalon kisah
Kiban tsa'labah, dudoe meupaloe
Bak watee gasien, nyakin jama'ah
'Oh kaya sudah, u masjid tan toe

Haroh tasaba, kutika sosah
Hanya bak Allah, beuta-peujok droe
Bak manusia, bek that tapeugah
Bila masa alah, meutamah kachoe

Tabeudoh malam, mautahajjud sah
Jaroe tatadah, mata beuta moe
Kupue bak FB, ta keluh keusah
Sang-sang masalah, jeut ji seuleusoe

Ladoem takalon, sayang meuleumpah
Ladom ka salah, haba meucawoe
Hana adee, Tuhan jipeugah
Geubri masalah, keu jih tiep uroe

Meumacam bagoe, ureung hadapi masalah
Ladoem peuleumah, kiban teuga droe
Sunggoh bahgia, nyang meureumpok Hikmah
Karna musibah, ngon Allah ka toe

Didalam kulak, geuboh  boh panah
Meunyoe santan pah, mangat han bagoe
Tamatkeuh  'ohnoe, nazam mau'idhah
Meunyoe na  salah, peubeutoi  keudroe
=============000==============