JEURITAN HATE SIDROE HAMBA "

====================================
Assalammu’alaikom, Po  ceudieng pade

Banda deungoen gle, bandum lon sapa

Saboet saleum lon, Bintang meuble ble

Hajat lon cae, saboeh  mustika

Didalam rika, kisah loen uke,
Rasa lam hate, gundah lam jiwa

Tijoeh  ie mata, wate lon pike
Ya  Rabbul Qadhe, neu ampoen dosa

Hudep lam donya, laloe ngoen jahe
Sang  sang han mate, nibak di rasa
Iman lam dada, lipeh beukoen le
Tan meusipade, meu beukas lam jiwa

Lon  kalon le wareh, meutuah beukoen lee
Padahai  lahee, tan troek  lam dada
Malee that mata, rasa lam hatee
Pajan keuh akhe, lagee nyoe rupa

Cuma lam rika, kata lam cae
Meujroeh that lahe, bak wareh lingka
Mantoeng lee cupa, iman lam hatee
Golhom meu hase, lagee ban pinta

Meukoen neusayang, di Rabbul Qadhe
Sunggoh hana lee, hamba lam donya
Hamba yang hina, teubaloet rantee
Sideh dalam gle, apui nuraka,,

Karena tutoep, Tuhan peusampe,
Neu toep dum jahee, bak wareh lingka
Nibak keuluarga, rakan boeh hatee,
Maka jroeh lahe, neu pandang mata,

Dumna ka murah, Allah peu hasee,
Mantoeng han sampee, sadar jiteuka,
Pajan keuh sadar, insan jroeh pikee,
Seugolom mate, tamoeng keureunda,

Wate teubayang, Rahmat Tuhan bree
Ie mata dilee, malee lam jiwa,
Seumpurna teuboeh, nikmat seumikee,
Iman lam hatee, golom seumpurna,

Bah loen boet langkah, keudeh dalam glee
Loen peuseh hate, bak wareh lingka
Bek le ngoen donya, laloe lam jahee,
Walau bak lahee, meujroeh that rupa

Loen lakee meu'ah, rakan boeh hate
Kadang na hatee, yang tan get rasa
Beuleun mulia, goh teuka akhee,,
Ngoen Rabbul Qadhe, loen peutroe jiwa

Teurimoeng geunaseh, guree boeh hatee,
Neu tem peulahee, ilmee agama
Iman lam dada, rap tan meuho lee
Keubiet rap reule, deuroeh lam fana,
A( Agam Sidroe : 4 Agustus 2012M / 15 Ramadhan 1433H )