Pages


Kamis, 09 Mei 2013

HIKAYAT NABI MUSA (KEUNEUBAH AWAI ) BAGIAN ( 4 )



=======================================
Ileumee sihe , meung peureunoe
Bak geutanyoe,  uleh Musa
Nyan meukeusud , teuka keunoe
Jitanyoeng soe , tem beulaja

Cit jroeh sangat,  barang gasoe
Tem meureunoe , keupadanya
Bak loen pih na , hikeumat nyan
Nyang ek lawan , sihe Musa

Supaya that , teumakoet ureueng
Akan uloen,  dum seumua
Meunan jikheun , raja laknat
U bak rakyat,  jipeuhaba

Hingga teuma , bak siuroe
Jikheun meunoe,  u bak Musa
Wahe Musa , deungoe kamoe
Meukeusud jinoe , lawan gata

Bak loen pih na , ureueng sihe
Nyang that ahli , hana nyang sa
Jinoe kuyue,  bak ureueng nyan
Kuyue lawan , sihe Musa

Bak masa nyan,  raja Firaun
Jiyue himpoen , sihe dum na
Dum na sihe , jikrah bandum
Seureuta loem , raja-rajaa

Hingga teuma,  ka meuhimpoen
Keunan bandum,  habeh teuka
Raja-raja , deungoen sihe
Ka meuhimpoen,  ubak raja

Dalam kawan,  sihe bandum
Sidroe ureueng , siblah buta
Nyan keupala,  bandum sihe
Utoeh koenle, hikeumat donya

Tujoeh ploeh ribee , ka meuhimpoen
Keunan jitroen,  ubak raja
Troen Ie sabda,  raja Firaun
Ubak ureueng , sihe dumna
He sigala , sihe bandum
Lhee reutoeh thoen , ku peulara
Macam-macam , nikmat kubri
Wahe sihe , akan gâta

Peue nyang nafsu , hantoem kutheun
Kubri bandum,  peue nyang suka
Ban nyang nafsu , peue nyang hajat
Kubri leugat,  hana dakwa

Teuma jinoe , deungoe Ion kheun
Meukeusud uloen,  nibak gâta
Ta peutroeh ban,  nyang Ion hajat
Lawan leugat , sihe Musa

Ta peutaloe,  Musa sidroe
Lawan jinoe,  uleh gâta
Kareuna Musa,  utoeh han soe
Bak Tuhan droe,  jibeulaja

Meung ek taloe,  Musa sidroe
Kubri jinoe , peue nyang suka
Teuma seuot , hakim sihe
Jipeugah le,  ubak raja

Tujoeh ploeh ribee,  sihe sinaroe
Hakim sidroe , nyang keupala
Deelat ampon,  syahi alam
Kamoe lawan,  sihe Musa

Sihe Musa , kamoe lawan
Bek susahan,  po meukuta
Teuma meunyoe,  kamoe meunang
Peue balasan , nibak raja

Peue tuanku,  bri keu kamoe
Peugah jinoe , po meukuta
Seuot raja , laknat pindoe
Kubri jinoe , peue nyang suka

Gâta nyang duek,  rab ngoen kamoe
Nibak meuntroe , ngoen panglima
Lom sigala , hareuta kamoe
Peugoet jinoe , ban nyang hawa
Peu nyang galak , peue nyang hajat
Tacoek leugat,  kutham hana
Bak masa nyan , sigala sihe
Jipeugoet le , hikeumat donya

Troeh peuet buleuen,  peugoet sabe
Hingga hase , seumuanya
Teuma suroeh , raja Firaun
Jiyue himpoen,  rakyat dumna

Wazi meuntroe , uleebalang
Sikalian , jiseuranta
Troeh le keunan , dum meuree-ree
Meuploeh ribee , nyang ek guda

Laen nyang jak,  deungoen gaki
Leubeh kati , ribee laksa
Han teuhisab , rame ureueng
Keunan bandum , ka troeh teuka
sambongan bagian 23 yang tertinggal (rhoh lon lumpat) :

Dong meusaf-saf, jroh meurintang
Kiri kanan, leuen istana
Han teupeugah ,rame ureueng
Han lot mideuen ,troh u lua

Oh ka hase ,seuleungkapan
Jiyue peusan, Nabi Musa
Troh le Musa, deungon Harun
Ubak mideuen ,keunan teuka

Jiireng Ie, Bani Israil
Hana sakri ,rame raya
Sigala kaum ,Bani Israil
Likot nabi ,dong seumua

Musa neudong, tatkala nyan
Di hadapan , khalayak dum na
Seureuta neungui,  bak uroe nyan
Peukayan , nyang that mulia

Peukayan , nyang that indah
Ngui akillah,  di keupala
Ngui ceureupu,  nibak gaki
Hana sakri , indah rupa

Nibak jaroe , neumat tungkat
Sangat hibat , hana tara
Bak masa nyan,  dumna sihe
Jitanyong le , ubak Musa

Wahe Musa,  cuba takheun
Jinoe soe tron , dilee mula
Gata dilee , atawa kamoe
Peugah jinoe,  laju sigra

Tatkala nyan,  troh Jibrail
Neupeugah le,  ubak Musa
Bah le j ih tron , dilee jinoe
Teuma dudoe,  tatron gata

Musa deungo , kheun Jibrail
Neupeugah le,  meunoe haba
He sigala , kaum mal'un
Bah le tatron,  dilee gata

Yoh nyan Musa , ka teumakot
Leungo teuot,  jeueb anggeeta
Teuma neukheun,  le Jibrail
Ubak Nabi,  yullah Musa

Wahe Musa , bek teumakot
Tuhan makbud , tulong gata
Harap akan,  janji Tuhan
Bek susahan,  wahe Musa

Bahwa sihe , sikalian
Jimeuiman , deungon gata
Dudoe bandum , jimeuiman
Beureukat deungon,  mulia gata

Meunan neukheun,  le Jibrail
Ubak Nabi , nyang mulia
Bak masa nyan,  dum na sihe
Jiamai le , hikeumat donya

Yoh nyan sinan , dalam padang
Ka jireuntang , taloe dum na
Watee pi katroh,  cot uroe
Amai jinoe , dumna mantra

Uroe tarek , maken suuem
Taloe bandum,  jadi naga
Ka jeuet uleue,  han teubilang
Sihe bandum , hafai mantra

Peunoh padang , deungon huteuen
Uleue bandum,  deungon naga
Ladom raya , han peue tanyong
Na miseue krong , meuploh gunca

Ladom taeu,  sang bak sagee
Panyang teuntee,  meuploh deupa
Taeu j idong , jangak ulee
Taeu lagee,  hibat raya

Padang huteuen , peunoh sarat
Uleue le that,  deungon naga
Raya-raya , lom ngon hibat
Oh talihat,  hate lia

Sigala teuntra , raja Firaun
Surak bandum,  that meutaga
Bandum yohnyan,  ka jisurak
Suka galak , hana tara

Surak deumpek , that meuguncang
Rasa karam,  reuloh donya
Siulah sang ka , meunang prang
Sangat garang,  dum sineuna

Laen nyang gong , deungon canang
Jipeh yohnyan , ngon meutaga
Meusu tambo ,. deungon geundrang
Sare kiam , tango subra

Yoh nyan kaum , Bani Israil
Ka meunyum gli , hate lia
Bak jipike , dum uleue nyan
Han ek lawan , uleh Musa

Pakri untong , dum geutanyoe
Bak uroe nyoe , jeuet binasa
Musa kalon,  dum uleue nyan
Leungo badan , nyang meulia

Padang huteuen , bandum peunoh
Han deuh tanoh , uleue ngon naga
Raya-raya , lom ngon juah
Jisuet lidah dum u lua

Lom ngon mata,  han tajeuet eue
Sang apuj hu,  meucuaca
Nabiullah , ka teumakot
Leungo atot , jeuet angeeta

Tatkala nyan , firman rabbi
Ubak Nabi, yullah Musa
Bek teumakot,  wahe Nabi
Leubeh lagi,  nyang bak gata

Nyang na jinoe , nibak tangan
Leubeh nibak nyan,  wahe Musa
Barangkadum , rame musoh
Bandum jipoh , ek binasa

Lom firman,  Rabbul Izzah
Tarhom tungkat , wahe Musa
Musa deungo,  firman Tuhan
Tungkat yoh nyan,  neugeulawa

Di teungoh padang , rhot Ie tungkat
Sangat kuat , Nabi Musa
Dalam padang , teuglong meuhat
Nibak teumpat , uleue ngon naga

Deungon kheundak,  po Hadarat
Yoh nyan tungkat , jadi naga
Sangat raya , lagi hebat
Sayeuep meuhat,  tujoh ploh dua

Tujoh reutoh , dua gaki
Hana sakri , hibat raya
Raya panyang,  hana lawan
Tan teuladan,  ngon tapeusa

Jipruh bisa,  dum meuhambo
Sang apui hu , di udara
Habeh peunoh , nanggroe Meuse
Hibat kon le , peungeuh donya

 Sangkira jiprueh , ateueh bumoe
Habeh nanggroe , dum binasa
Jihah babah,  luah han ban
Jipeureulan,  uleue dum na

Naga sihe ngoen,  uleue dum
Ka jitaluem , seumuanya
Sigoe jiued,  habeh bandum
Meung bak rukueng,  han mumada

Lheueh nyan jijak,  dalam padang
Ka teureuban , kayee dum na
Rumoh Qubti , nyang rab padang
Hanco yoeh nyan , dum seumua

Wie ngon uneue, dum teureuban
Meukuran ngoen , badan naga
Leungoe bumoe , that meuguncang
Siulah sang , geumpa raya 

Naga jijak , keunan ka toe
Bak meuligoe , Firaun raja
Sangat raya,  nyan meuligoe
Saboh nanggroe , sang-sang rupa

Ban sare troeh , rab meuligoe
Jihah jinoe , babah naga
Bibi ateueh,  pucak meuligoe
Taeu gigoe , tan ngon peusa

Bibi roet yueb , jab bak bumoe
Keumeung 'uet nyoe,  meuligoe raja
Bak masa nyan,  raja Firaun
Laju jiplueng , si ceulaka

Jieu naga,  jihah babah
Jicoek langkah , seun lhee deupa
Teumakoet that,  laknat Allah
Nyum aruah,  ka keulua

Bandum ureueng,  lam meuligoe
Ban sinaroe , jiplueng sigra
Habeh jiplueng,  keudeh keunoe
Jiseumpoen droe , lam-lam paya 

Rakyat laen , pi ka jiplueng
Hana peue kheun , cukoep subra
Ladom reubah , dum teugageueng
Meukaleueng ngoen,  pinto kuta

Ladom teueh,  keudeh lam krueng
Keunoeng reuleueng,  reuloeh muka
Teumakoet that , bandum ureueng
Seurasa nyum,  kiamat donya

Ladoem pangsan , ka teugageueng
Keunoeng ateueng,  dum teuhanta
Bandum jicoek,  langkah jareueng
Ladoem jiplueng , deungon guda

Nyang patah pha,  han soe tudum
Nyang teupluek rueng , han ek kira
Rioh subra , hana peue kheun
Lam-lam huteuen , jiplueng sigra

Ho-ho nyang roeh , laju jiplueng
Apa keumuen,  han le kira
Patah luka,  le that ureueng
Bak meuplueng-plueng , dum binasa

Nyang that gura , raja Firaun
Keunan lam krueng, jiplueng sigra
Sinan jisoem droe , nibak reuleueng
Bek jiteumeung , uleh naga

Yo that hate , kafe bajeueng
Seurasa nyuem , kiamat donya
Adat meungkoen,  sigra jiplueng
Ka jitaluem,  uleh naga

Nyang hana plueng,  Bani Israil
Likoet Nabi,  dum seumua
Naga ka troeh,  bak meuligoe
That seureuloe,  hana tara

Teuma jikab,  nyan meuligoe
Keudeh keunoe,  jigeulawa
Habeh hancoe,  dum sinaroe
Leungoe bumoe,  mise geumpa 

Sang han jitheun , uleh bumoe
Meunan keu proe , geu umpama
Batee di wie , nyan meuligoe
Jiproeh jinoe , uleh naga

Ateueh buket , ji peusampoe
Hana bagoee,  hibat raya
Dumna kayee , bak buket nyan
Ka teureujan , dum sineuna

Saboeh kubah,  di teungoh padang
Sangat manyang,  hana tara
Loem ngon raya,  miseue buket
Firaun peugoet,  dilee masa

Jeuneh batee , dum jipeugoet
Laju jikreut , uleh naga
Habeh hancoe,  miseue teupoeng
Hancoe bandum,  miseue sira 

Troen firman , nibak Tuhan
Ka seb dumnan , wahe Musa
Ka mumada,  dilee dun nan
Tacoek rijang , tungkat gata

Musa deungoe,  firman Tuhan
Surung tangan,  Ubak naga
Sare Musa,  neuteueng tangan
Naga yoehnyan,  ubit sigra

Mulai phoen,  jitoeb babah
Subhanallah,  ajaib raya
Lheueh nyan ubit,  laju keudroe
Hingga meuwoe,  miseue nyang ka

Ka meuriwang , jadi tungkat
Ajaib that,  hana nyang sa
Bak masanyan , dumna rakyat
Keunan leugat,  loem  jigisa

Jieu naga , ka hana le
Jiriwang le,  keunan sigra
Bandum ureueng , hireuen mandang
Jikaloen nyan , dum buet naga 

Bak masa nyan , hakim sihe
Jipeugah le,  meunan haba
Muwafakat , deungoen rakan
Pakri padan , he syeedara

Beuta ingat , wahe rakan
Nyoe peurbuatan , sangat raya
Padum na lë , hikeumat geutanyoe
Ban sinaroe,  ka seurafa

Sigoe jilhan , habeh bandum
Meung bak rukueng,  han mumada
Dum na raya , nyan meuligoe
Sudah sampoe , han meuhoe ka

Han jeuet buet nyoe , tapeumudah
Sibeuna sah ban , kheun Musa
Patoet geutanyoe,  tameu iman
Akan Tuhan , nyang sibeuna

Tuhan Musa , deungon Harun
Nyan keuh Tuhan,  Po Nyang Esa
Nyan geupeujeuet,  dum na geutanyoe
Langet bumoe , dum sineuna

Bek tadeungoe,  raja Firaun
Bukoen Tuhan,  si ceulaka
Jih pih saban , ngoen geutanyoe
Barang gapeue,  hana bida

Makeuen minom , dum sinaroe
Ban geutanyoe , laen dum na
Sifeuet Tuhan , bukoen meunan
Hana saban , miseue hamba

Jih nyan kafe,  laknat Allah
Bek tapateh,  he syeedara
Bek tapateh , raja syeetan
Tameu iman , deungon Musa

Meung tapateh,  raja laknat
Geutanyoe meuhat , asoe neuraka
Hingga teuma , dum ureueng nyan
Jimeu iman , seumuanya 

Tujoeh ploeh ribee,  ureueng sihe
Jisujud pih,  yoehnyan sigra
Ubak Tuhan , Rabbul alamin
Hate yakin , hana tara

Raja Firaun,  kaloen meunan
Dum ureueng nyan,  sujud sigra
Ka jitamoeng,  agama Islam
Jimeu iman , deungoen Musa

Han jipateh,  le jih sidroe
Raja pindoe , beungeh raya
Bak masa nyan , raja laknat
Jiyue ikat , seumuanya

Lheueh nibak nyan,  jiyue gantueng
Nibak cabeueng,  dum keureuma
Tujoeh ploeh ribee , bandum ureueng
Ka jigantueng , yoehnyan sigra

Dum ureueng nyan,  yoehnyan jikheun
He Firaun , nyang ceulaka
Keumbali kamoe , ubak Tuhan
Nyang peujeuet alam,  dum sineuna

Bahwa gâta,  he Firaun
Jeuet keu umpeuen,  apui neuraka
Nyankeuh gata , asoe jahannam
Sitree Tuhan , Po Nyang Esa

He Firaun , nyang that beubai
Hana akai , ngoen bicara
Han ka iman,  akan Allah
Nyang jeuet kah,  he ceulaka

Hingga troeh,  bak watee luhoe
Habeh umu , seumuanya
Mate syahid , seukalian
Woe bak Tuhan , azza wajalla

Seureuta pangkat , wali  yullah
Meunan Geupeugah,  lam calitra
INNA LILLAHI WA INNA ILAIHI RAJIUN
Woe bak Tuhan,  ka troeh masa 

Musa kaloen,  meunan ulah
That amarah,  akan raja
Tat kalanyan,  alaihissalam
Ubak Tuhan , mohon pinta

YA ILAHI WA YA RABBI
Nyang keutahui,  dum peukara
Droe neu sidroe , nyang na Tuhan
Peukeurjaan,  bandum hamba

Dumnan neubri , keu Firaun
Jikeurajeuen , dalam donya
Neukaronya , keukayaan
Keurajaan , nyang that raya

Seureuta neubri,  keubeusaran
Han ji iman,  akan gâta
Han cit jitem,  bawa iman
Kafe jahannam,  darohaka

Jinoe neubri , ya Tuhanku
Keujih laju,  azeueb seksa
Hareuta jihle , han teukhimat
Neubri beujeuet,  keu batee sira

Kareuna hate jih , kreueh sangat
Neubri laknat,  ya Rabbana
Bak masanyan , troen Jibrail
Ubak Nabi,  yullah Musa

Ban sare troeh , saleuem neubri
Seuot Nabi,  Pantah sigra
Ya Nabiyullah , kheun Jibrail
Saleuem Rabbi , keunoe Ion ba

Kaneuk kabul,  uleh Tuhan
Seukalian , doa gata
Tapi uroe , mantoeng lanjoet
Troeh peuet thoen , treuk wahe Musa

Peukeurjaan , deungoen Firaun
Umu peuet thoen,  ka seumporna
Lheueh neupeugah,  firman Rabbi
Jibrail pih,  ka neugisa 

Bak masanyan,  Nabi yullah
Neumeulangkah , loem bak raja
Musa neujak , deungon Harun
Bak firaun , troeh le sigra

Ban sare troeh , laju neukheun
He Firaun , deungoe hamba
Jinoe gata,  tameu iman
Akan Tuhan,  Po Nyang Esa

Nyang peujeuet , sigala alam
Jen ngoen insan , dum sineuna
Nyang bri mate,  deungoen hudep
Nyang bri saket , deungon teuga

Nyang bri seunang , deungon susah
Nyang bri meugah,  deungon hina
Nyan keuh Allah , Poku Rabbi
Nyang bri reuzeuki , dum keu hamba

Neubri keu gata,  keukayaan
Keurajaan , nyang that raya
Nanggroe Meuse,  takeurajeuen
He Firaun,  uleh gata

Neubri meugàh , lam donya nyoe
Teuma jinoe , wahe raja
Tameu iman,  akan tuhan
Hana ban , sibagoenya

Nyang keuh Tuhan,  nyang taseumbah
Nyang keuh Allah,  nyang sibeuna
Meunan sabda , Nabi  yullah
Dum neupeugah , ubak raja

Firaun 'deungoe,  dum haba nyan
Seungab kalam , jaweueb hana
Hana sapeue,  jibri jaweueb
Jiiem seungab , si ceulaka

Tatkala , Nabi  yullah
Neumeulangkah,  neuwoe sigra
Teutap Nabi , ka leupah woe
Raja pindoe,  Ion calitra 

Raja meuhei , meuntroe Haman
Troeh le keunan , teuma sigra
Sabda raja,  ubak Haman
Deungoe lon,  kheun ubak gata

Tayue peugoet,  saboeh teumpat
Nyang manyang that,  hana tara
Jeuneh batee , tayue peugoet
Nyang indah that,  dum wareuna

Taboh wareuna,  macam-macam
Puteh hitam , jeuneh rupa
Hijo kuneng , mirah hitam
Sigala macam , sinan beuna

Teumpat meuen , ngieng tanaman
Teudoeng sinan,  bak meunara
Tayue peugoet,  nyang that indah
Mangat meugah,  ubak Musa

Mangat jieu , keubeusaran
Keurajaan , Ion that raya
Mangat jithee , Ion meugah that
Timu barat , hana nyang sa

Meunan suroeh , raja laknat
Haman peugoet , teuma sigra
Jikrah tukang , dalam nanggroe
Peugoet jinoe,  ban meunara

Jipeugoet le , yoehnyan leugat
Nyang manyang that , hana tara
Jeuneh bate,  peugoet rijang
Uroe malam,  jikeurija

Jiboeh wareuna,  le that macam
Puteh hitam , sigala rupa
Troeh tujoeh thoen , jipeugoet nyan
Sangat manyang , ka lam hawa

Sang han soe,  le ek u ateueh
Goeh loem cit lheueh,  nyan meunara
Troeh tujoeh thoen , peugot sabe
Ka rab hase,  jikeurija 

Firman Tuhan,  bak Jibrail
Neuyue pari , reuloeh sigra
Troeh le keunan , dum na pari
Jireuloeh le , nyan meunara

Jiantoek le , jirhoem batee
Ka meuseubee,  rakyat dum na
Dum na ureueng,  nyang peugoet nyan
Sikalian,  habeh fana

Badum tukang,  ka meuseubee
Deungoen bate,  pari timpa
Hana tinggai , Ie meusidroe
Jieumpoe Ie,  pari dum na

Bak masa nyan,  raja laknat
Susah jih that,  hana tara
Han troeh nafsu , ban nyang hajat
Lom ngen rakyat , ka seurapa

Bermula jinoe , meuwoe kisah
Putroe Asiah , judo raja
Nyang peulara,  Nabi  yullah
Rupa indah , ban meutia

Asiah kawoem , Bani Israil
Hana sakri , indah rupa
Iloek pareh , that juhari
Budiadari , meutapeusa

Putroe Asiah , cit iseulam
Yoeh manyak koen , that taqwa
Ka iseulam , yoeh manyak koen
Tapi neusoem , ubak raja

Putroe Asiah,  jimak han toem
Ngon Firaun , suaminya
Walee Asiah,  judo Firaun
Jimak han toem,  deungon raja

Keureuna Asiah , ureueng Iseulam
Uleh Tuhan,  neupeulara
'Oh jipeurab , ubak putroe
Tuhan gantoe , ngoen jen rimba 

Deungon syeetan , Tuhan gantoe
Peurupa droe,  putroe muda
Peurupa droe , ban Asiah
Meunan ulah,  roek-roek masa

Meunan keuh , hai raja laklen
Jimak ngoen,  jen nantiasa
Putroe Asiah , nyang analan
Mantoeng peurawan , troeh ngon raya

Meunuroet kheun , bak riwayat
Deungoe sahbat,  Ion calitra
Dudoe teuma , oh kiamat
Judo Muhammad,  Asiah muda

Jeuet keu judo , Nabi Muhammad
Di akhirat,  lam syureuga
Meunan teuseubut , lam riwayat
Pham he sahbat , dum beurata

Masa Musa , deungoen Harun
Bak Firaun , phoen troeh teuka
Neuyue meu iman,  akan Tuhan
Nyang peujeuet alam,  dum sineuna

Putroe Asiah,  bak masa nyan
Neumeu iman , deungon sigra
Asiah masoek,  lam Iseulam
Neumeu iman , deungon Musa

Padum lawet , teuma dudoe
Bak siuroe , putroe muda
Bak siuroe , Asiah duek
Neuseugoet  oek , aneuk raja

Aneuk Firaun , nan Masitah
Teukeudi Allah , Po Nyang Esa
Nibak jaroe,  rhoet le sugoet
Ka teukeujoet , putroe muda

Sare putroe, ka teukeujoet
Rhoeh neuseubut,  meunoe haba
He Firaun , laknat Allah
Paki di kah , lam neuraka 

Neucoek sugoet,  teuma pantaih
Deungon bismillah,  loem neubaca
Ban jideungo , le Masyitah
Tanyoeng pantah,  jipareksa

Wahe bunda, ku Asiah
Peue neupeugah , nyang kon haba
Peue na Tuhan,  loem nyang laen
Nibak Firaun , ayah hamba

Loen deungoe bunda , meunan takheun
Ka neutamoeng,  agama Musa
Jih nyan musoeh,  ayah ulon
Deungon Harun,  nyan ban dua

Bukoen bunda ,nyang peuhudep
Padum na treb , neupeulara
Cit keumeung poeh,  uleh ayah
Neutham pantah,  uleh bunda

Macam-macam , neupeudaleh
Ngat bek jadeh , neupoeh Musa
Ek troeh hate , he ma badan
Neutueng jih nyan , pangulee gata

Jaweueb putroe,  Ti Asiah
Rahmat Allah,  keupadanya
He Masyitah , deungo lon kheun
Raja Firaun , ayah gata

Jih nyan kafe , laknat Allah
Haram jadah , soem cilaka
Jih pi saban , he Masyitah
Hamba Allah , miseue hamba

Bahwa hana , laen Tuhan
Meulaenkan , Allah Taala
Nyang peujeuet,  sigala alam
Tuhan Harun , deungon Musa

Ban jideungoe,  le Masyitah
Putroe Asiah , meuseurapa
Jibeudoeh le , yoehnyan pantah
Jijak peugah , bak ayahda
Firaun deungoe,  meunan ulah
That amarah,  si cilaka
Bak masanyan,  laknat Allah
Bak Asiah, jikheun sigra

He Asiah , pakoen meunan
Ka tatamoeng,  agama Musa
Meuhan ta ubah,  iktikeued nyan
Kuyue rajam , jinoe gata

Kupoeh mate,  he Asiah
Meuhan ubah , iktikeued gata
Seuot putroe , Ti Asiah
Ngon amarah,  meusuara

He Firaun , kafe beubai
Hana akai , ngon bicara
Ka dakwa droe , kah nyan Tuhan
Kafe jahannam , asoe neuraka

Han kapateh , Rasul Tuhan
Jinoe karam,he ceulaka
Dumnan tarek , dum mukjizat
Nibak tungkat , jadi naga

Han cit katem ,bawa iman
Akan Tuhan, nyang sibeuna
Kreueh that hate, kah he laknat
Teukaboe that , hana nyang sa

Ka meulawan,  he Firaun
Tuhan harun,  deungon Musa
Nyang peujeuet kah,  he binatang
Han ka iman,  he ceulaka

Nyang peujeuet , sigala alam
Jen ngoen insane,  dum sineuna
Asiah beungeh , meupoet-poet
Ka neucaroet , hana reuda

Bit pi meunan , Asiah kheun
Di Firaun , khem teurtawa
That jigaseh , keu Asiah
Ka jipeugah,  laen haba 

Firaun bujoek,  putroe Asiah
Meunoe ulah , jibeurkata
He keukasehku,  Asiah
Goet takeubah , agama Musa

Tapateh Ion , wahe putroe
Meuligoe nyoe,  milek gata
Sigala na , hareuta dum nyoe
Pulang jinoe,  akan gata

Ulon pulang , ban sinaroe
Ban suka droe , takeurija
Tuan putroe,  laju seuot
Han ku ikot,  haba gata

Agama Musa , nyang kuturoet
That kutakoet,  keu Rabbana
Kutakoet that , murka Tuhan
Nyang peujeuet alam , dum sineuna

Meung ku ikot,  kah he laknat
Ulon meuhat , asoe neuraka
Adat tabri,  nyan meuligoe
Hareuta dum nyoe , han kubawa

Di akhirat , Tuhan gantoe
Leubeh bak nyoe,  lam syeureuga
Leubeh indah, lagi keukai
Han kutinggai,  agama Musa

Gata kafe,  nyang that beubai
Hana akai , ngoen bicara
Han tathee droe , peuneujeued Tuhan
Jinoe karam,  he ceulaka

Pasoe teumpat , lam jahannam
Keukai sinan,  roek-roek masa
Firaun deungoe,  kheun Asiah
Yoeh nyan susah,  hana tara

Sabab jigaseh , keu Asiah
Habeh ilah,  jibicara
Jihei bunda , deungoen ayah
Putroe Asiah , keunan sigra 

Yue bri nasihat , keu Asiah
Nibak ayah , deungon bunda
Supaya Asiah , beuneu ikot
Beu neuturoet , si ceulaka

Troeh le bunda , putroe Asiah
Deungoen ayah,  keunan teuka
Jak peureunoe,  putroe Asiah
Geuyue ubah , iktikeuednya

Geuyue ikot,  raja Firaun
Ban nyang jikheun,  bek tadakwa
Lagee iblih,  peureunoe Adam
Yoh saboeh jan , dilee masa

Han neupateh , putroe Asiah
Han neu ubah,  agama Musa
Asiah sangat , kuat iman
Ubak jalan , nyang sibeuna

Hingga teuma,  he teungku droe
Tuan putroe,  Asiah muda
Sabab hana,  pateh Firaun
Bak masa nyan,  ka jiseksa

Ka jipateng,  deungon beusoe
Paleuet jaroe,  putroe muda
Jipeu bleut , bak matauroe
Sayang putroe , ka jiseksa

Lom jiyue coeh , ubak cicem
Sangat lalem,  si ceulaka
Mata uroe,  pih that seuuem
Yoeh nyan neukheun , putroe muda

Putroe seubut , yoehnyan leugat
Ahad-ahad,  lhee goe saja
Yakni makna , neukheun ahad
Rabbul  Izzah , sidroe saja

Lheueh nyan teuma,  putroe indah
Ubak Allah,  mohon pinta
Ya Tuhanku , Po di kamoe
Neubri jinoe,  akan hamba 

Neukaronya , akan Ion nyoe
Saboeh meuligoe,  dalam syeureuga
Neupeulara , jinoe ulon
Nibak Firaun , nyang ceulaka

Meunan pinta , putroe Asiah
Ubak Allah,  zat nyang Esa
Bak masa nyan , keuheundak Allah
Hijab teuhah,  nibak mata

Putroe kaloen,  yohnyan pinto
Cit deuh leumah,  lam syeureuga
Asiah kaloen , saboeh meuligoe
Indah han soe , neukaronya

Karonya Tuhan , keu Asiah
Sangat indah , hana tara
Sare leumah,  putroe lihat
Masa nyan that,  sukacita

Tuan putroe , yoehnyan lazat
Neu eu teumpat , lam syeureuga
Dum na seksa , bak Firaun
Hana meunyuem , neupeurasa

Hana saket , putroe intan
Beu that dumnan , azeueb seksa
Keureuna putroe , sangat lazat
Neungieng teumpat,  lam syeureuga

Meunan keu hai,  tuan putroe
Hingga sampoe , ajai teuka
Keumbali , keu rahmat Allah
Habeh langkah , dalam donya

INNA LILLAHI WA INNA ILAIHI RAJIUN
Woe bak Tuhan,  ka troeh masa
'Oh ka hanle,  putroe Siti
Yoehnyan Nabi,  yullah Musa

Lakee doa,  hana khali
Akan Siti , Asiah muda
Teutap putroe , dalam lazat
Raja laknat,  Ion calitra 

Bak masa,  nyan ka teupike
Kupoeh mate,  jinoe Musa
Agama Ion , ka jireuloeh
Bah le kupoeh,  jinoe sigra

Agama laen,  jipeureunoe
Miseue putroe,  Asiah muda
Bah le kupoeh , Musa sidroe
Meuhat paloe , akhe masa

Meunan pike,  kafe asi
Kaum Qubti , jikrah sigra
Troeh le teuka,  lasyeuka Qubti
Ka ji ile , ubak raja

Sabda raja,  nibak Qubti
Kapoeh mate , jinoe Musa
Teuma beudoeh , nyan biek Qubti
Meung droeb nabi,  nyang mulia

Lingka taman,  raja Firaun
Meu ikat dum , rimueng bangka
Bak masanyan,  teukeudi Allah
Teuploeh bagah,  rimueng dum na

Habeh bandum , teuploeh ikat
Jikab leugat , dum lasyeuka
Dum na lasyeuka,  biek Qubti
Nyang meupoeh Nab,  yiullah Musa

Habeh mate,  sikalian
Jikuran le , rimueng bangka
Firaun kaloen,  meunan macam
That syugoilan,  hana tara

Meutamah-tamah,  susah hate
Habeh mate,  lasyeuka dum na
Meukeusud jih , hana hase
Rakyat han le , ka binasa

Lheueh nyan,  teuma loem jipike
Bani Israil , rame raya
Kadang-kadang,  dudoe meuhat
Jimupakat,  deungan Musa 

Jimupakat , jiprang nanggroe
Ulon sidroe , jeuet binasa
Keureuna Imran , kaum Bani
Ayah Nabi,  yullah Musa

Meunan pike,  kafe asi
Biek Qubti,  jihei sigra
Suroeh raja ,nibak Qubti
Kapoeh mate , aneuk dum na

Sigala aneuk , Bani Israil
Kapoeh mate , seumuanya
Mangat bek le,  kaum Bani
Rab bek tabri , ngoen judonya

Bek tabri rab,  lakoe binoe
Larang jinoe,  laju sigra
Nyang jipeugah,  uleh nujum
Sitree ulon , nyan keuh Musa

Aneuk cut-cut , kapoeh bandum
Bek le ureueng , kaum Musa
Meunan jiyue,  le Firaun
Ubak kawoem , Qubti dum na

Bak masanyan,  Bani Israil
Meuhimpoen le,  ubak Musa
Ya Nabi  yullah,  pakri kamoe
Hana bagoe , that seungsara

Seulama troeh , Nabi keunoe
Le That bagoe , keunoeng seksa
Macam-macam , azeueb jibri
Lawet Nabi , keunoe teuka

Nyang goet jinoe , ya Nabi yullah
Minah pantaih , sinoe gata
Minah leugat,  lam nanggroe nyoe
Bek le kamoe , keunoeng seksa

Jaweueb Musa , kalamullah
Dum neupeugah , bak kaum dum na
Bandum gata,  bek Ie susah
Insya Allah , akan teuka 

Akan datang , keusukaan
Nibak Tuhan,  Po Nyang Esa
Neupeubinasa,  uleh Tuhan
Sikalian,  musoeh gata

Neupeulupoet,  nibak sitree
Rab troeh watee,  jih binasa
Bak masa nyan,  alaihissalam
Ubak Tuhan,  mohon pinta

Ya tuhanku , neubri jinoe
Keu sinaroe,  kaum raja
Qubti lapar , neubri jinoe
Sitree kamoe , nak binasa

Tuhan kabui , pinta Nabi
Masa nyan le,  susah teuka
Bak masa nyan , meuseuke that
Hana sapat , makanan na

Ka meuhai that , dum makanan
Nyang baroe koen,  murah raya
Raja Firaun,  bak masa nyan
That susahan,  hana tara

Keureuna Firaun,  seuntoek watee
Jipeujamee , manusia
Na tujoeh ploeh,  laksa ureueng
Jibri makeuen,  uleh raja

Nyan keuh sabab , kaum nyan dum
Jipateh kheun,  si ceulaka
Tiep-tiep uroe , dumnan ureueng
Sinan umpeuen,  nibak raja

Hingga sampoe , troeh padum thoen
Raja Firaun,  ka rab fana
Ka susah that,  raja laknat
Jijak leugat,  ubak Musa

Wahe Musa , ulon harap
Mohon leugat , bak Tuhan gata
Qubti lapar,  beu ek hilang
Ubak Tuhan , lakee doa 

Meunyoe mudah , dum makanan
Lon meu iman , deungoen gata
Seureuta jinoe,  ulon pulang
Nyan nanggroe Syam,  gata raja

Sigala kawoem,  Bani Israil
Jinoe kubri , hukoem gata
Musa deungoe,  haba meunan
Ubak Tuhan , mohon pinta

Neumeulakee,  ubak Tuhan
Seureuta neuleueng,  jaroe dua
Nyang kheun amin , Nabi Harun
Sinan neudoeng , likoet Musa

Teukeudi Allah , bak masa nyan
Teuka hujeuen , sajan raya
Hingga karam,  nanggroe Meuse
Hibat koen le , hujeuen teuka

Jeueb-jeueb gampoeng , ie ka peunoeh
Yoehnyan susah , rakyat dum na
Bandum ureueng , sangat susah
Jijak bagah , ubak Musa

Wahe Musa , mohon rijang
Ubak Tuhan , uleh gata
Beu surot ie , jinoe bandum
Bek ngoeb gampoeng , kamoe dum na

Hingga suroet , bandum ie nyan
Mumeu iman , deungoen gata
Bandum kamoe , mumeu iman
Akan Tuhan , dan Nabinya

========Meusamboeng Bagian 5

0 komentar:

Posting Komentar

Komentar FB :