Pages


Sabtu, 04 Mei 2013

“ PERTANYAAN HARTA PUSAKA “



  Oleh : SULAIMAN.A.GANI
=========================================
Alhamdulillah , Pujoe Keu Tuhan
Yang Peujeut Alam, Bansigoem Donya
Yang Peujeut Langet, Hana Meutiang
Yang Peujeut Insan , Lat batat Dumna

Ulat lam bate, Neubri makanan
Yang peuna peutan, Raseuki  Hamba
Oh Lheuh Tapujoe ,Keu Sidroe Tuhan
Seulaweut Salam , Akan Saidina

Pang Ule Nabi , Janjongan Alam
Rasul Khataman , Bandum Ambiya
Yang bri Syafaat, Uroe  Komdian
di uroe Mizan, Blang Padang Masya

Salam a`laikoem , Saleum Loen Tuan
Jaroe loen layang , Ateuh Jeumala
Hajat loen Tanyoeng, Saboeh sualan
Sidroe  droe, padum Pusaka

Bak ma ngoen Ayah, Padum geupulang
Neucuba peutrang, wahe  saudara
Ka nibak Tuhan, padum boh  macam
Geujoek pinjaman, sidroe  droe  hamba

Tatuloeng Jawueb, meunyan Sualan
Padum boeh rakan, tatueng  pusaka
Padum Bak Ayah, deungoen Ma Badan
Padum bak Tuhan, Tatueng  Pusaka

Sangkira hana, dua uruengnyan
Pusaka geupulang, geujoek keu gata
Di Tuhan pih han, geubri pinjaman
Maka  gata tan, sinoe  lam Donya

Meubek  peu mboeng droe, tanyoe hai rakan
Deungoen ma Badan, serta Ayahda
Meutan Pusaka, dua uroeng nyan
Bak Tuhan han, geubri  keu gata

Meumada Ohnoe, Saboeh  Sualam
Deungan harapan, Tajawueb Sigra
Meunyoe tan muphoem, Meunyan sualan
Bak ma tariwang, jak tanyoeng Sigra
( Tgk.Diyueb Bruek/Sulaiman.A.Gani)Tgl,25/01/2013

“ Jawaban ““ HARTA PUSAKA “
=================================
Deungan Iradah, Kudrah bak Allah
Jinoe loen peugah, Harta  pusaka
Peut Bak  Po Ma, Meupeut  Bak Ayah
Tujoeh Bak Allah, Geubri  keu Gata

Meupuet Bak Po Ma, dile  lon peugah
Neudeungoe  Beusah, Wahe  Saudara
Meunyang phoen leumak,keudua  Darah
Po Ma neukeubah, Harta pusaka

Meunyang keu lhe ok, rakan meutuah
Meunyang keu puet sah, nyan Asoe Gata
Meupuet bak Po Ma, Kalhueh lon Peugah
Meupuet Bak Ayah,  uloen Peunyata

Meunyang phoen kulet, keudua Hisap
Bak  Ayah Meuhat, Tatueng  Pusaka
Yang keu lhe  Urat, Rakan Meutuah
Meunyang keu puet sah, Nyan Tulueng  Gata

Meunyan keuh seubab, Rakan Meutuah
Saboeh Ma ngoen Yah, Bekna Sengketa
Meupuet bak Po Ma, Meupuet Bak Ayah
Tujoeh Bak Allah, Jinoe lon nyata

Jalan  meuwet wet, lam gle seulawah
Bak pucak  leumah, Nanggroe  Lam Teuba
Lon coek buhu  an, Meu ah lon keubah
Supaya indah, wate tabaca

Pinjama Tujoeh, Pusaka  Tuhan
Neubri keu Insan, Nyan Sementara
Wate Katroek Had, ka neucoek Pulang
Meunyan hai Rakan, kon milek Gata

Tujoeh Boeh Sifuet, Nyan Milek Tuhan
Neubri Peupinjam, Jiduek Bak Gata
Jiduek Bak Nyawoeng ,Bandum ,Sifuetnyan
Koen Nibak Badan, Lage Takira

Yang Tanyoe Bangga , Uroe ngoen Malam
Tujoeh Sifuetnyan, Koen Milek Gata
Milek Hadharat, Kalikul Alam
Oh Neucoek Pulang, Hanasoe Sangga


Phoen Sifuet Udep, Ka Wahai Rakan
Tupue Barang Ban, Sifuet Keu Dua
Yang Keu Lhe Teuga, Beu Tungku Pham
Nafsu Hai Rakan, Meupeut Boeh Kana

Limoeng Meudeungoe, Samak Geupeunan
Basar Keumaloen, Meunam boeh Kana
Tujoeh Tamariet, Geupeunan Kalam
Bandum Pinjaman , Tuhan Karonya

Oh Wate Troek Hat, Ka Neucoek Pulang
Ka Tinggai Badan, Sinan Teuhanta
Ban Tujoeh Sifuet, Tuhan Coek Pulang
Meu digata Tan, Hanle Sapue Na

Dile Na Nyawoeng , Jinoe Pakoen Tan
Nyan Milek Tuhan, Pinjam le Gata
Meuhoka Teuga, Narit ngoen Kalam
Jinoe Pakoen Tan, Deungoen Suara

Basar Keumaloen , Tupue ngoen Tuban
Samak ngoen Kalam , Pakoen Hanle Na
Meuhoka Nafsu, Pakoen Jinoe Tan
Ka Neucoek Pulang , Milek Rabbana

Adakna Tuboeh, Baloet ngoen Gafan
Nyan Pih Warisan , Meugoeb Poe Atra
Tulueng Keu Tanoeh, di Ulat Badan
Harta yang Tinggai, Wali poe Jeumba

Meutoeh sit Yang na, Gata ba Sajan
Meutan Amalan, Masa lam Donya
Oleh Seubabnyan Geutanyoe Insan
Mita Amalan, Yoh Matoeng Teuga

Yoeh Masa Udep, Lam Bumoe Tuhan
Matoeng Pinjaman, Geubri Bak Gata
Ban Tujoeh Sifuet, Kalheuh loen Bayang
Wasiet Peuneusan, Loen Bri Keu Gata

Sulaiman.Gani, Yang Bri Peuneusan
Tuleh Karangan ,Peusantoek Haba
Teukeudi Salah, Bak Peukhoek Nazam
Harap Meu `afkan Hana loen Saja
(Tgk Diyueb Bruek/Sulaiman.A.Gani )23/01/2013

0 komentar:

Posting Komentar

Komentar FB :