ACEH LAM BALA .II “

    Oleh “ SULAIMAN.A.GANI

==========================================

Assalammua’laikom,  Kawoem  Saudara

Tuha  ngoen Muda,  Bandum  Sahabat

Samboet saleum lon, tangloeng bungoeng  la

Jaroe  lon dua,  sigoe  loen Angkat

Hajat  lon peugah,  Saboeh  Mustika
Haba keu  PEMDA,  saran  intat

Saran  bak uloen, Rakyat  jeulata

Kadang meuguna, juet  keu  Nasehat

 Nyoe  Tanoeh Rincoeng ,  Jinoe  lam  Bala

Kareuna  Geumpa, Goyang  cukop  brat

Seuramoe  Meukkah, Goyang  buet  Geumpa

Deuri ngoen  bara, meujungkat  jungkat

Nibak  Masanyoe,  Aceh  Mulia

Kajuet  saudara, tameuduek  pakat

Tagantoe  Deuri, ka deungan  Bara

Tampoeng  yang  hana, kajuet  tapeudap

Kajuet  duek  Rundeng,  Ban  Sigom  Donya

Tagantoe  sigra,  tameh  kamue  kab

Meuhan tagantoe,  Takoet  Meubala

Aceh  Mulia,  juet  Bungoeng  Sungkap

Apui  lam seukeum,  leumah  jih  hana

Meubek  saudara, keunan  tapeurab

Oh wate  tabloeh, baro tutoeng  pha

Meunan saudara, lon  boeh  ibarat

Seuramoe  meukkah,  jinoe  lam  bala

Sabe  saudara,  jinoe   jimeukap

Le  yang  cui tumuet, ngoen  ale  neuba

Sabe  Saudara, ji mita  sungkap

Maka  saran lon, keu  Pihak  PEMDA

Alias  Saudara,  Gubernur   meuhat

Kajuet  duek  pakat, Ban Sigom  Donya

Tamita Cara, yoh  goeh  karu  brat

Jinoe  takaloen, Meubagoe  Rupa
Sabe saudara, jimita  Sungkap

Juet bungoeng  pake, ngoen  tan kareuna

Bak  gara  gara,  Beda  Pendapat

Bak  keude  kupi,  Sira  poeh  cakra

Kajuet keu  Dakwa,  sampoe karu  brat

Gadoeh bangga  droe, peureute   PA
Jikhuen  PNA,  nyan Pengkhianat

Pada  Hai  Aceh,  Gob Turi  Nama
Urueng  Meubangsa, Raya  Martabat

Seuramoe  Meukah,  Tanoh  Aulia

Sabe  Saudara,  Pakon  jimeukap

Lage  Umpama, Khuen  Urueng  Tuha
Lam Hadis  Maja,  geuboh  ibarat

Asee  Seumeudroeh, Tulueng  jimita
Oh  wate  kana, yang  laen  bek  Rab

( Tgk  Diyueb Bruek/Sulaiman.A.Gani )

Tanggal  01  Nopember 2012