“ TUNGKU JAMEUN “

   Oleh : SULAIMAN.A.GANI.

=================================

Teungku jameun , pijuet-pijuet
Di dalam kaluet , pujoe Rabbana
Uroe ngoen malam , di dalam sujud
Allah geuseubut,  tiep tiep kutika

Senang hate,  rumoeh binteh bleut
Tanna geumeuheut , keu rumoeh kaca
Gulee teumon bu,  reuboeh oen eumpeuk
Tanna geumeuheut , leumoe banggala

Lam sutoek watee, al-qur-an geubeut
Tanna geumeuheut , keu surat kaba
Namun lageenyan , gobnyan dumpeu juet
Mata tan teungeut,  hate tan buta

Bak tuhan sidroe,  ka geuleung paleut
Mohon bak ma’bud,  Tuhan karonya
Hadiah donya , hana geumeuheut
Peu nyang geupubut , geuharap ridha

Beuranggahoe troeh , geujak ngon tapak
Hana geu galak , kijang Innova
Lam duri reukom,  pih mangat geujak
Han teutoep tapak , Tuhan kuasa

Geuplueng ateuh Ie,  meu titi pih tan
Geupoe lam awan,  meusayeup hana
Dumnan keuramat , geubri lee Tuhan
Amai al-qur-an , lam suntok masa

Duek bak dayah, geuseumeubuet

Surah dun juet, kitab dumna

Peugoet proposal, goebnyan hanjuet

Hana meuhuet, goebnyan kaya

Tungku jinoe, tumboen  tumboeh

Gadoeh ek troen, lam istana

Lam pendopo, sabe  rawoen

Geu ek geutroen, kanto  raya

Nyan keu umat, hanle pike

Pubuet  jahe, geuteugah hana

Laloe keudroe, tiep uroe sabe

Gadoeh pike, peuseutoet donya

Soek baje jas, koen  ija kroeng

Geu ek geutroen, kijang  Inova

Ngoen proposal, dum geususon

Rumoeh geudoeng, tingkat dua

==========000=============