“ ANUEK ABG “

   Oleh : Teuku Mahli Yuni

===============================
Alhamdulillah, kisah lôn rika.
Nasaboh haba ,lôn tuan rawé.
Peukateuen Aneuk ,Dara ngön Muda.
Aneuk ban raya ,geukheun ABG.

Istilah gaul ,dumna Remaja.
Meuraja lela ,dusôn deungön glé.
Bak pergaulan, soe larang hana.
Ayah ngön Poma,  han ék lé pike.

Peue lom nyang hana, Iman lam dada.
Rusak Etika ,Moral hana lé.
Bacut tan muphôm ,hukôm Agama.
Salah Yah ngön Ma ,bak Beuet tan geubi.

Meunyö uroe jéh, meucéh di kota.
Agam ngön Dara, dijak meurabé.
Jinoe takalon, u dusôn kana.
Aneuk Miet Muda ,di pubuet jahé.

Peukeuh Dônya, jinoe katuha ?.
Katrôh bak masa,  teuka nyang ganjé.
Meunyö buet maksiet ,cit di meulomba.
H'ana dikira,  Désya ׳oh akhé.

Bukon lé sayang, bintang kamala.
Hana deuh cahya , seupôt pucak glé.
Anuek jameun nyoe ,jeuet sagoe kana.
Galak buet Désya, keurija sabé.

Όh watèe ta eu ,prilaku Remaja.
Ulèe meuputa ,meunyö tapiké.
Pakaian disôk ,budôk lagoena.
Kiban nyang hawa, seulèra haté.

Nyang ladôm arat ,got that meurasa.
Aurat ulua , hana di piké.
Selèra kapah, leumah boh dada.
Teuduek meubanja,  ladôm kacayé.

Sileuweue sumpét, meulilét bak pha.
Bentuk anggota ,leumah meu uké.
Soe-soe nyang pandang, sumang lagoina.
Kadikeue mata, kiban tapiké.

Adak pih leumah, tubôh anggota.
Malèe pih hana ,Iman kareulé.
Aqidah reuloeh, teuboh lagoena.
Akhlaq Remaja ,jareueng soe piké.

Tanlé pedoman ,ajaran Agama.
Asai ka gaya , kaseunang haté.
Keu suai Hareuem, peureumeun h'ana.
Nyö tanyoe langga , beungèh bukon lé.

Όh dijak meu èn , angèn di mita.
Dara ngön Muda,  meu-èn di pantè.
Honda di pasang , seunang meurasa.
Cukôp that mesra,  sinyak ABG.

Adèk ngön Cut Bang, meupasang dua.
Diduek meuwa-wa ,teukhém meu hé-hé.
Tiep uroe ta-eu , kadikeue mata.
Bukon keu gura , haba lôn rawé.

Watèe takalon , bangön nyan cara.
Sang-sang hi rupa , nikah kahasé.
Padahai Hareuem , mandum keurija.
Nyö tan soe langga,  saléh keuh pakré.

Woe dijak meu-èn , angèn di mita.
Bak piyôh kana , peuleupie haté.
Adèk pih ka grah,  leupah dahaga.
Abang pih hawa,  ruti meu seulé.

Peue lom masa nyoe,  jeuet sagoe kana.
Bak duek meuhaba,  cit kale kafé.
Sira jéb-jéb ie , nyang leupie rasa.
Meu ayang seunda , seunang bukonlé.

Teuma nyang ladôm,  laén lom cara.
Lalè ngön gamba,  di dalam HP.
Gamba pih seudèe,  bajèe pih hana.
Sinan keuh mula , teuka buet jahé.

Peue lom woe meu-èn,  kamalam jula.
Nafsu jiteuka , Syèthan peurabé.
Nyang hana mungkén,  ditém keurija.
Birahi teuka,  karôh buet jahé.

Buet nyö ka malam , soe tham pih hana.
Peue di keukija, cuba neupiké.
Peue-peue nyang meuheut , di seunuet saja.
Mandum dikheun ya,  hana meutheun lé.
Astagfirullah,  bèk leupah haba.
Neuci peunyat,  kuta deungön glé.
Le Aneuk ubeut,  nyang pubuet Désya.
Ka dikeue mata,  soe teugah tanlé.

Meunan peukateuen , jameun nyoe kana.
Meunyö tarika , panyang bukon lé.
Beuna taingat,  Sahbat Syédara.
Tugah bersama , tateugah jahé.

Tabina Akhlaq , Sinyak nyang Muda.
Bina Agama,  mantong ABG.
Ayah ngön Poma,  beuna geu jaga.
Harapan Bangsa,  beuna tapiké.

Tugah tanyoe syik , didik yôh muda.
Lam rumöh tangga, di phôn beuhasé.
Akhlaq Aneuk Miet,  wajéb tabina.
Meunyö karaya , hana guna lé.

Generasi tanyoe , bèk dhoe Agama.
Sayang leupah na,  nyö rôh lam jahé.
Nanggroe teuh malang,  rijang trôh bala.
Allah tan Ridha , nyö hamba bakhé.

====================================