“ P E U N E U S A N “

=============================

Alhamdulillah, pujoe Tuhanku
Rahmat neutabu, keunoe  u donya

Ngoen Rahman Rahim, sidroe Tuhanku

Neubri beu makmu, Aceh  mulia

Seulawuet saleum, oh lhuehnyan laju

Atueh penghulu, Rasul Mustafa

Atueh Muhammad, Rahmat neutabu

Barat ngoen timu, seulawuet bek lupa

Assalammua’laikom, saleum lon rirue

Ayah ngoen ibu, tuha ngoen muda

Bacut peuneusan, karang sigeutu

Bek salah tuju, peu ingat bangsa

Meunyoe ka salah, neuriwang laju

Nibak Tuhanku, Ampon neu pinta

Seusama insan, meunan sit laju

Keudeh neutuju, meuah neupinta

Wahee rakan lon, Barat ngon timu
Peumeuah laju, nyoe  salah haba
Lon karang Nazam, Panyang sigeutu
Hajat ngoen nafsu, nasehat agama

Keu  ureueng inong, yang phoen tuju
Loen keuneuk curu, dua krek haba
Yoh masa komplik , dile lam karu
Hanjeut peulaku , teumakoet raya

Tinggai dirumoh, meuhat  taguen bu
Dang-dang woe Tungku, mita beulanja
Wate geumeunarit, hanjeut leupah su
Meuhan jeut karu, lam rumoeh tangga

Teuma lawet nyoe, hana le karu
Kajeut peulaku, peu-peu nyang hawa
Kaareuna sibok, Tuwoe Tuhanku
Sang-sang  sit "Aku", han lee binasa

Mangat bu lukat, talhap deungoen u

Pue lom tajampu, meunisan ngoen saka

Lon gantoe pakhoek , lon tuka buhu
Bunoe mate  u, gantoe  mate  an

Jinoe keu bali, haba peuneusan
Beujeut renungan, keu anuek bangsa
Pusaka endatu , dile saboeh jan
Lee geumeungarang, hukom agama

Geutuleh  hukom, didalam Nazam
Supaya jipham, le aneuk bangsa
Sayang geutanyoe, jinoe hai rakan
Han tatem pham, atra yang kana

Meunyoe ka tuwoe, wareh ngon Taulan
Seusabee rakan, peu ingat syedara
Keunarang Endatu, didalam nazam

Juet  keu peudoman, hudep lam donya

Kisah  geususon, indah koen wayang
Asoe Al-Quran, Kalam Rabbana
Sabda  dinabi, lee chiet disinan
Mudah bak tapham, meutatem baca

Meubek peu eleh, tanyoe hai rakan
Haba ureung nyan, chiet peunoh makna
Beutaturi droe, inong ngoen agam
Bek sampe taulan, leupah meuhaba

Meumadah ohnoe, haba lon karang
Pat  na salahan, peu beutoi  sigra
Soe keumeuk sambong, lon peusilahkan
Asai hai rakan, beu sopan haba

================================