PUET TINGKATAN MANUSIA

Oleh : SULAIMAN.A.GANI

========================

A’uzubillah, lon puphon kalam

Lon pujoe Tuhan, azawajalla

Yang bri Raseuki, yang peuna peutan

Bandum buet Tuhan, yang that kuasa

Seulawuet saleum, akan janjongan

Pang ule alam, saidil  Ambiya

Yang bri syafaat, uroe komdian

Neutiek seureuban, atueh neuraca

Bak ule titi, wate di mizan

Meusapat sinan, deungan  mustafa

Di miyueb payoeng, sajan janjongan

Laen sapat tan, Reulue pih  hana

Jinoe saleum lon, lon boet keu rakan

Ngoen dua tangan, atueh jeumala

Hajat lon kisah, puet boeh tingkatan

Neubri le Tuhan, keu  Manusia

Meupakoen seubab, puet boeh tingkatan

Meusoe khuen sinan, ulon peunyata

Meu seun seun bacut, haba lon karang

Baca  hai rakan, seun seun sibanja

Meukheun Razali,  manusia peut  tingkatan

Maseng maseng , perjalanan uloen peutrang

Peureuta maphoen,  ureueng malem hai tungku droe

Loem geuteupue droe geuh malem,  saboeh bagoe

Yang keudua ,  ureueng malem wahai tengku

Kheun razali , droe geuh malem han geutupui

Teuma yang keu lhee ,  ureueng jahe han  sapue jeut

Loem geutupui,  droe geuh jahe seureuta ngeut

Meunyang keu peut ,  jahe han geuteupue droe geuh jahe

Meukheun razali , jahe meurakap beutapike

Ureueng yang tupue , wahai tungku droe geuh malem

Geupubuet bakti keu po teu Allah,  lam suntoek kayeim

Geupubuet keudroe, geuyue keugoeb dum seukalian

Keu manusia,  hana lupa geubri ajaran

Seubab geu ingat,  droe geuh meuhat wareh nabi

Meunan macam , saboeh golongan wahai akhi

Di ureueng malem,  han geutepue droe geuh malem

Geu pubuet bakti ,  keu poteu Allah lam suntoek kayem

Geupubue keudroe , keugoeb laen han peuduli

Ureueng lagenyan,  wajeb tapoeh kheun Razali

Jipubuet zalem,  keumungkaran dalam nanggroe

Hana geukira , geu ingat saja digoebnyan keudroe

Jipubuet maksiet rata,  jeut teumpat hana peuduli

Meunan Macam , bagoe kedua wahai akhi

Ureueng jahe,  lom geuteupue droe geuh jahe

Soe meureumpoek,  pue peureule laju geusudi

Geujak tanyoeng ,  bak ulama pat han muphoem

Dum eleume,  atawa sit segala hukoem

Di ureueng jahe , hana geutepue droe geuh jahe

Meukheun Razali,  jahe meurakap beutapikee

Ureueng lagenyan , tayue jak dikeu jithoh geuntoet

Jitroem tumet,  meunyoe tayue jak dilikoet

 Dua  ngoen lhe,  wate tatanyoeng jipeugah puet

Meunyoe  takheun koen , laju didawa han dideungoe tut

Dan laen laen,  that le macam loem boeh umpama

Di ureueng jahe,  hana geuthe droe eleumee hana

Watee jipeugah,  le beurangkasoe han jipateh

Meukoen kheun droe , beurangkasoe jipeujaeh

Puet tingkatan manusia, ka  keuh habeh

Baca hai rakan, kalhueh tapham toeh tapileh

( Tgk diyueb bruek Tgl, 20 Desember  2012)