“ KEULILENG ACEH “

===========================

Assalamu'alaikom , kaom iseulam
Inong ngon agam,  haba lon kirem

Jeuoh ngon toe , binoe dan agam
Saleum lon tuan , tukang seumalen

Nyoe pat na bacut,  ranup lam puan
Pajoh hai rakan , sira neukhem khem
Bek neukheun sapeue,  tabeu ngon masam
Kadang na reuhang , atawa masen

Nibak siuroe,  hai adoe badan
Di ulon tuan , lon jak keulileng
Phon Banda Aceh,  lamno ngon Calang
Teunom 'oh leuh nyan,  awai padang kleng

Meulaboh simpang peut , sampe seunangan
Blang pidie leuh nyan , sampoe u manggeng
Labuhan haji,  troeh Tapaktuan
Kota Faja kandangan,  keunan hai cut lem

Hingga adoe beuh , troeh u Bakongan
Sibadeh lheuh nyan,  ulon jak kayem
Troeh ladang rimba , sireuta Krueng tuan
Sampe u medan , ulon keulileng

U Aceh Timu , laju tujuan
Kuala simpang,  langsa ngon birem
Sampe ulon jak,  Peureulak yoh nyan
U Ranto panyang,  jareung ulon tren

Peudawa Idi , lagi hai rakan
U Bagok yohnyan , keunan ulon tren
Kuta Binjee , Arakundo sampo lon tuan
Simpang Ulim lheuhnyan , keunan bak cut lem

U Panton labu,  lon tuju rijang
Lhoksukon rakan,  ngon simpang meulieng
Geudoeng ngon Bayu , Peunteut ngon Kandang
Lhoksemawe sinan,  tari alaihem

Krung gekuh krung mane,  gerugoek kuta blang
Cot le ju Matang , Bireun lon bareng
Peudada jeunib,  keubit lon peusan
U simpang mamplam,  pih na lon tren tren

U samalanga, teuma 'oh lheuh nyan
Tukang keumarang , ka geukeulileng
Ulee Gle Meuredu,  laju 'oh lheuh nyan
Hingga lon tuan,  troh u treinggadeng

Lueng putu Beureunun,  bandum lon peutrang
U sigli keunan, ulon jak kayem
Sampoe u Grong Grong , lon tren meujan jan
U Tiji padang,  haba lon kirem

U Padang tiji,  lagi le Rijang
Seulimum lampisang , di lon hai cut lem
Indrapuri sibreh , teuntee lon tuan
Lambaro timbangan , sinan nyang kayem

Keunoe u Banda  , katroek lon riwang
Ulon keumarang , sira lon khem-khem
Rumoh ulon duek , ube bruek sinan
Saboh karangan,  bak lon goeb kirem

'oh ban lon baca,  haba kireman
Laju lon karang,  sigra  lon salen
Sinan saudara,  haba lon karang
Cukop that reumbang , sira lon khem khem

Sinan lon suson , panton lon karang
Meu meja pih tan,  ulon seumalen
Cong aleu papeun , lon leung lon karang
Dum nan lon tuan , seudeh alaihem

Pengarang laen , salen tulesan
Meja pih timang,  kursi meuweng weng
Nasib di ulon,  sedeh hana ban
Meurumoh pih tan, bak lon seumalen

Di Banda Aceh, lon sewa sinan
Lhee mete panyang, peut mete sampeng
Sinan ulon duek,  ban cangguk lam blang
Lon jak lam kawan , dum gob keureuleng

Di gob ngon Honda,  ngon moto sedan
'oh toe lon tuan , peuplung di niren
Di lon ngon tapak , lon jak bak jalan
Sipatu hitam,  tumet ka mireng

=============000==========