FADHILAH BACA BISMILLAH MALAM JUM’AT

=============================

OLEH : SULAIMAN.A.GANI

===================================

Assalammua’laikom, warahmatullah

Alhamdulillah, Rabbil a’lamin

Ban bandum pujoe, muwoe keu Allah

Rahmat neulimpah, keu bandum mukmin

Seulawuet saleum, keu Rasulullah

Yang ba risalah, Rasulmursalin

Nabi Muhammad, utusan Allah

Hadis neukeubah, tuntunan mukmin

Samboet saleum lon, rakan meutuah

Hajat lon peugah, Sabda mursalin

Neucoek mamfaat, neutueng faedah

Haba lon peugah, beungoet neunyakin

Malam jumaat, raya  faedah

Baca Bisminlah, le urueng mukmin

Meunoe ban bagoe, bah lon ci kisah

Lon ci seuleuah, supaya nyakin

Meu insyah allah, rakan  meutuah

Jinoe lon peugah , hai kawoem mukmin

Sibeurang kasoe , baca bismillah

Jiseuboet Allah , ngoen hatee nyakin

Dan loem seulaweut , keu rasulllah

Pangulee yang sah , muhammad amin

Malam jum’at , lee that faedah

Neubri lee Allah , keu ureueng mukmin

Han keunoeng bala , dum hamba allah

Tuhan peusiblah,  ureueng muslimin

Deungki  khianat , Tuhan peusiblah

Di rasulullah , meunan geujamin

Oh uroe dudoe,  tuhan neubalah

Syuruga indah,  jannatunnaim

Dalam syuruga,  na saboeh kubah

Hu meujeureullah,  oh watee tangieng

  

Jeuneh jih bak meuh,  intan meutatah

Puteh ngoen hitam , hijou ngon kuneng

Deungoen hidangan , bermacam ulah

Boh kayee indah , hoe  hoe yang tangieng

Oh troek geutanyoe , pintoe ka teuhah

Ainon marziah , sinan bermain

Jimat bak jaroe,  peutamoeng bagah

Karonya allah,  keu ureueng mukmin

Teuma jitanyoeng,  Ainon marziah

Minta sajalah , apa yang ingin

Meunan keuh mufom , teungku meutuah

Meunan peurintah , rabbon alamin

Keu ureueng baca , nama bismillah

Jiseuboet Allah,  ngoen hatee nyakin

Di dalam kitab , meunan geupeugah

Yang po hikayah,  zainal abiding

Meumada ohnoe, haba lon kisah

Fadhilah Bisminlah, Beu tungku nyakin

Nyan asoe kitab, yang ulon peugah

Neubuka bagah, supaya nyakin

( Tgk diyueb Bruek )