MEUKEUSUD BACA BISMILLAH

Oleh : SULAIMAN.A.GANI

=========================================

Assalammua’laikom, waramatullah

Saleum sipatah, bandum loen kirem

Gantoe uloen bri, kupi saboeh glah

Nyoe pat na mudah, kisah lon kirem

Saboeh Mustika, rakan meutuah

Neucoek neukeubah, pasoe lam bathen

Kadang mustajab, ubat  neukeubah

Kadang juet kompas, jipeuguet le jen

Sibeurangkasoe, hamba di Allah

Baca Bisminlah, ngoen hate nyakin

Puet boeh meukeusud, khuen Rasulullah

Deungoe lon peugah, seun seun lon bareng

Peut  boeh meukeusud,  baca bismillah

Deungoe loen peugah,  hai kawom mukmin

Talake tuloeng,  nibak potallah

Yang phoen lon peugah,  ngoen hate nyakin

Neubri beureukat, meunyang keu dua

Nibak hareuta,  dan laen laen

Keu lhee ta ikoet , kalam rabbana

Geuseuboet nama,  qur’an nurkarim

Ikoet kheun nabi , meupeut  peukara

Nabi mulia , muhammad amin

Bak jeut jeut kitab,  meusurat jih na

Ikoet yang beuna , tinggai yang laen

Peurantara jih jinoe, loen peugah

Karonya allah , rabbul a’alamin

Malam neu mekruet, di rasulullah

Sampoe yub arasy,  saidil mursalin

Oh sampoe nabi ,arasy mulia

Geukaloen nyata ,meuligoe gadeng

Jeuneh nibak meuh ,intan mutia

Hana ngoen peusa ,deungoen tabandeng

Pintoe meugunci , ban siseulingka

Bah ureueng jaga ,sabda mursalin

Hai malaikat ,ngoen pue tabuka

Pintoe jroeh rupa ,loen eu meuganceng

Di malaikat, geujaweub sabda

Ta seuboet nama, rabbul alamin

Ayat bismillah, nabi neubaca

Teuhah le  sigra,  pintoe meuganceng

Neutamoeng laju ,di Rasulullah

Geukaloen kubah, indah tan bandeng

Na peut boeh tiang , intan meutatah

Ngoen nama Allah,  sinan meusalen

Bak tiang yang phoen, meusurat bismi

Sinan teubiet ie, puteh meuleng  leng

Nyakni saboeh krueng ,karonya rabbi

Seureuta ngoen ie , leuzat alaihem

Bak tiang dua,  surat Allahi

Sinan krueng ie ,ile mupuseng

Dalam syuruga ,pucoek jisundi

Ngoen manoe cut ti , putroe yang linteng

Bak tiang rahman ,ngoen tiang rahim

Sinan hai mukmin ,meunoe yang lazem

Dua boeh suak, karonya rabbi

U donya ini, saboeh hai polem

Dalam syuruga ,jannatun adnen

Bak tiang rahim , hai tungku malem

Meunan keuh muphoem, wahe saudara

Karonya esa,  rabbul a’lamin

Maka nyan seubab, wahe saudara

Bisminlah neubaca, ngoen hate nyakin

Atueh tiep tiep buet, yang neukeurija

Bisminlah yue baca, Sabda Mursalin

Meumada ohnoe, Haba lon rika

Untuk sikada, haba lon salen

Meunyan keuh kunci, pintoe syuruga

 Kalhueh lon rika, sikada mungkens

(  Tgk Diyueb Bruek  04-09-2010 )