"INGAT KEU EUNTOENG"

   OLEH : SULAIMAN.A.GANI

============================================
Assalammua’laikom, tangloeng meubhak bhak

Jaroe  uloen grak, tanda mulia

Jaroe lon siploeh, bandum uloen grak

Timang bak talak, lon boet bandua

Hajat lon intat, nasehat dua krak

Nariet mustahak, peu ingat bangsa

Laloe ngoen donya, peuturoet cangklak

Lam bumoe tajak, ibadat beuna

Tajak tajak , geutanyoe tajak
Ta ayoen tapak,  sinoe lam  donya
Meubek that laloe , peuturoet cangklak
Meubek that ladat , peuturoet donya

Hana areuti , dhiet deungoen lagak
Meunyoe akeulhak,  hana mulia
Meu keupeu guna,  wajah That  lagak
Adak pih tajak , deungoen inova

Oh wate mate,  lam tanoeh geusak
Deungoen tanoeh cak,  geuseubee gata
Ka gadoeh tari , ka deungoen lagak
Ka gadoeh cangklak , seureuta  kaya

Masa lam donya , cut bang ngoen cut kak
Beuranghoe tajak , keukai jih hana
U nanggroe page , keudeh tanyoe woe
Lakoe binoe , tuha ngoen muda

Oh katroeh watee , hajat kasampoe
Keudeh nibak poe , geutanyoe gisa
Nyoe tan amalan,  susah han bagoe
Cukop that rugoe,  wahe syedara

Didalam azeub,  malam ngoen uroe
Geutanyoe geupasoe,  dalam neuraka
Hana  soe bantu,  hana soe pakoe
Disinan sidroe , azeub ngoen seksa

 Meuyoe na amai , bandum geutanyoe

Mangat bak tawoe, wate  tagisa
Ta-eh lam kubu , mangat han bagoe
Peungeh ban uroe,  rahmat troek teuka

Rahmat dum ile, malam ngoen uroe
Sit tuhan sidroe, yang that kuasa
Hana le  susah , watee tanyoe woe
Amai sajan droe , ikoet  seureuta

Meumada ohnoe, haba lam rampoe
lon peu ingat droe, deungoen syedara
Meunyoe na salah, meuah sinaroe

Bak tuhan sidroe, Ampon lon pinta
( Tgk Diyueb Bruek, 12/03/2009 )