“ SAH LAN WA SAH LAN” MARHABAN YA RAMADHAN

    Oleh : SULAIMAN.A.GANI

==============================

Salam 'alaikum , saleum lon layang

Keu bandum rakan, Tuha ngoen muda

Samboet saleum lon, sion karangan

SAH LAN WA SAH LAN, lon tuleh rika

Lon lake meuah, bak bandum rakan

Kadang salahan, haba lon rika
Meukeusud hate, lon tuleh  Nazam
Di ulon tuan,  gohloem biasa

Bak ulon kalon,  hate lon bimbang
Dalam pikiran,  khawatir teuka
Lon takot gadoeh,  wareh ngen rakan
Saleum lon laying, tanda seutia

Beu lupie hate,mameh lam badan
Beujeut minuman,  lepas dahaga
Bek jeut keu racon,  nibak tetesan
Beujeut hai rakan,  keu ie peunawa

Hana trep masa,  ka troh ramadhan
Dalam hitungan , buleun mulia
Peugleh ngen hate,  seureuta  badan
Na kesalahan,  meu'ah beu sigra

Meuteupeh hate , saket hana ban
Adak pih meunan,  meu'ah beusigra
Beulapang hate,  peunoh ikhlasan
Saling ma'afan , Allah neuridha

Lheuh buleun rakjab  ditamoeng Syakban

Buleun Ramadhan pih karab teuka

Meusoe yang samboet oh troek ramadhan

Neubri le Tuhan Rayeuk that Fahla

Deungoen Ikeulas  hate beuseunang

Oh troek Ramadhan hate beusuka

Meusoe ibadat  dalam buleunnyan

Neukheun le Tuhan  Neu ampon Dosa

Fahla Tuhan bri  Dalam buleunnyan

Hana Bandengan Meulipat Ganda

Saboeh Tapubuet, Siploeh  balasan

Rasul  Janjongan  Meunan Meusabda

Sibeurangkasoe  Samboet Ramadhan

Ngoen Dasar Iman, seurta  Taqwa

Tuhan Peu Hareum  Nuraka Jahnam

Tuboeh Uruengnyan  Tuhan peulara

Ngoen Seunang hate  oh troek Ramadhan

Dumnan Balasan  Nibak Rabbana

Pue loem Tapubuet  Lage yue Tuhan

Sunat Kerjakan  Wajeb Geukira

Geutanyoe Jinoe  ka laen macam

Oh troek Ramadhan  Katoe Puasa

Sang sang roet laot jitroen Ramadhan

Inoeng ngoen Agam  jak pesta pora

Bak bineh pante   jak preh Ramadhan

Uroe ngoen malam  jak meudiwana

Deungon buet maksiet samboet Ramadhan

Inoeng ngoen Agam   meusuka ria

Jipeuduek kibot Dansa ngoen goyang

Dijeip minuman  Pesta Narkoba

 Jak manoe  laot  Inoeng ngoen Agam

Sang sang lagenyan  Samboet Puasa

Male That Aceh  Syariat Iseulam

Meunyoe Lagenyan  Samboet Puasa

Seuramo Meukah  Pane Lagenyan

Urueng Iseulam  kon meunan cara

Padahai Nabi kalheuh neupeusan

Samboet Ramadhan koen meunan cara

Tapeugleh hate  Deungki ngoen deundam

Bandum salahan  yue meu ah Dosa

Supaya ngat gleh   Dosa ngoen Tuhan

Seubab  buleunnyan Cukop Mulia

Dosa ngoen Hamba  bek jeut halangan

Ridha bak Tuhan  geutanyoe mita

Jinoe takaloen  oh troeh Ramadhan

Inoeng ngoen Agam   jak mita dosa

Mulai thoennyoe  bekle Lagenyan

Samboet Ramadhan  tabalek cara

  

Kaseb keuh oh noe , bak ulon tuan
Saket ngen badan,  puleh gohlom na
Gantoe cuaca,  khueng deungen hujan
Teuka ngen demam,  pilek seureuta

Adak pih meunan,  kondisi badan
Hajat lon tuan , meu'ah beusigra
Adak ta sambot,  buleun mulyaan
Bek na keh utang , ngen wareh lingka

Salam 'alaikum,  akhirul kalam
Bak ulon tuan , meu'ah lon pinta

=======================================