“HABA NASEHAT “=13

Oleh : SULAIMAN.A.GANI
===============================
Lincah coet uroe, boh panjoe patuen
Asam boh kiyuen, campli ngon sira
Bacut nasehat, nyoepat bak aduen
Beuleuhuen leuhuen, peuseutoet donya

Donya nyoe bangke, meunan Nabi kheun
Peu ingat bandum, umat lam donya
Yang seutoet Bangke, nyan Asee bandum
Meunan lon maklum, Hadis saidina

Hawa lon leupah, lincah coet uroe
Lincah bak adoe, sang leupah sira
Ude lam donya, bek beurangkahoe
Akhirat dudoe, nanggroe kalbaka

Nyan udueng reuboeh, Asam teucicah
Lawan bu kulah, mangat alaihem
Udep lam donya, Nabi neupeugah
Tamse tasinggah, Tawoe hoe laen

Lawan kuwah pliek, boeh itek masen
Ngoen eungkot kareng, ta samalado
Donya Akhirat, bandua peuteng
Lahe ngoen bathen, beugoet tapakoe


Mangat kuwah ie, gule on muroeng
Lawan boh jantoeng, ngoen eungkoet paya
Udep lan donya, meu untoeng untoeng
Yoh goh ta aroeng, Blang padang masya

Blang padang masya, luah meuhayak
Lhe ribe thoen jak, tapasang guda
Ngoen mata uroe, di atueh talak
Pakriban tajak, amai tueh hana

Bu beule le, eungloet beucut cut
Donya ta ikoet, Akhirat geuyue tuntut
Hudep lam donya, wahe tungku cut
Bek tuwoe pubuet, keu pangkai gisa

“ TAMAH BACUT”
===========================
“ Meu supot-supot ‘oh mate lampu
takot keu hantu ‘oh malam jula
leubeh lom supot, didalam kubu
hana soe bantu, Malaikat seksa “
=========================
“Tamita jalan tawoe bak Allah “
==========================
Hareuta Neubri , keu gata le that
Beu na taingat, akan Neubalah
Taingat beukai, uroe akhirat
Haro hara that , bek jeuet keu sosah

Teuma keu donya , pih beutaingat
Bek teuwo meuhat, mita napakah
Lom tapeubuet got, keu ureueng laen
Lagee di-Tuhan , pih got that leupah

Tuhan pih got that , Neubri keu gata
Bek darohaka , di bumoe Allah
Bek peubuet jeuheut, di bumoe Tuhan
Han galak Tuhan, keu ureueng salah
(Al-Qur’an & Terjemahan Bebas Bersajak Dalam Bahasa Aceh)
==============================================
Deungon Bismillah, Allah lon pojoe,
Peujeut tanyoe, Dum asoe donya
Seulaweut Saleum, akan Muhammad
Yang bri syafa'ath, akan geutanyoe

Kagrak teukeudi, neubri le Allah
Hate lon teuhah, ingat keu dosa
Ingat keu mate, lam apoeh apah
Hanjeut lon surah, takoet leupah na

Harus tahudep, wajeb tamate
Tapham lam hate, bek sagai lupa
Wate lheuh mate, singoeh lom hudep
Wate geubangket, di yaumil-mahsyar

Yoeh goh tamate, amai tapeusep
Mangat bek sulet, 'oeh sukreut teuka
Oh troeh lam kubu, hana meusupet
Seubab tan aib, masa lam donya

Meunyo di donya, Amai teuh hansep
Teunte that saket, 'oh geusuet nyawa
Oh troeh lam uruek, tanoh meugampet
Badan meusupet, saket leumpahna

Troeh Malaikat, tanyoe geu seu'eu
Tan pat meungadu, hana saboeh na
Lheuhnyan troeh kala, dua ngon uleu
Jasad meusiseu, ka ji inanya

Astaghfirullah, Allah tuhan ku
Neu ampoen laju , seugala desya
wate teu ingat, keu azeub kubu
beujinoe laju, taubat Natsuhaa
==========================