” MEUEN BATE ”

   Oleh SULAIMAN.A.GANI

============================

Assalammua’laikom, saleum lon layang

Keu bandum rakan, tuha ngoen muda

Bandum saudara, Inoeng ngoen Agam

Nibak lon tuan, hana lon beda

Gantoe  ulon bri, kupi sicawan

Geulatoe badan, sawue saudara

Nyoepat na mudah, saboeh karangan

Kirem keu rakan, saboeh peunawa

Neucoek keu ubat, beujuet peudoman

Kisah  lon karang, sira meucakra

Haba lon tuju, keu urueng Agam

Yang seureng meunan, gobnyan keurija

Yang meuen Bate,  tiep  uroe Tuhan

Bak  gelek ek nam, matee ek dua

laloe peutimang,  aci sikupan

tuwoe seumbahyang,  luhoe ngoen asa

Ka gadoh laloe, bak meuen batee

Bak cari ulee, ka gadoeh asa

Ka gadoeh meugreb, syetan peulale

Ka  matee ek lhee, katuwoe  insya

Dipike kiban, hukoem seumbahyang

Jeut meunan meutan, kiban yang hajat

Tuhan geulaknat, ureung lagee nyan

Nuraka jahnam, geukeubah teumpat

Geu peutroen kutok, geutamah bala

Ureung dilingka, pih meunan ulah

Keunoeng bala am, nabi meusabda

Menyoe digata, hana taceugah

Gue yue toet rumoh, nabi neu peusan

Tinggai seumbahyang, sidroe-droe hamba

Oleh seubabyan,  ka wahai rakan

Jaga seumbahyang , oh  troek kutika

Yoeh  masa nabi, na keujadian

 Sahabat gobnyan, sidroe yang buta

Ulon hai Nabi, buta bri tuhan

Hana dueh jalan, soe tuntun hana

Oh troek kutika, wate  seumbahyang

Jamaah kiban, hukoem keu hamba

Seubab hana dueh, lon kalon jalan

Soe tuntun pihtan, ulon dijak ba

Nabi Meusabda, meunoe  ban macam

Neubri  jawaban, tanyoeng  si buta

Neubalek  tanyoeng, nibak masanya

Suara Azan, pue dueh ngoen hana

Meudeuh tadeungoe, suara azan

Meurangkak rijang, ta e’u  le gata

Tajah ngon punggoeng, taseutoet azan

Jamaah sinan, hukom keu gata

Teutapi jinoe, ta kaloen macam

Suara Azan, peureumuen hana

Sideh meuseujid, teungoeh geu azan

Di sinoe ek nam, dua keupala

Bate meuhadu, yang diet yang meunang

Meunan aturan, di bate laga

Jumlah  geunab, dalam hitungan

Han Ganje rakan, nyoe bate  laga

Gadoeh meudawa, peutimang ek nam

Disideh geubang, meubura bura

Hana peuduli,suara azan

Wate  seumbahyang, peureumuen hana

Bek seubab sidroe, meupaloe rakan

Kek sidroe yang plang, laen meulalat

Sidroe yang paleh, habeh goeb karam

Sidroe yang curang, habeh goeb cacat

Bak gara sidroe, ureung puebuet broek

Oh geulhoem kutok ,bandum tarasa

Wate troeh bala,  baro meutumpok

Nyan ban baro siboek ,pujoe rabbana.

( Tgk Diyueb Bruek, 28/03/2013 )