“ Hikayat Tikoh “

   Oleh : Tgk Diyueb Bruek

===================================
Assalammua’laikom, Saleum lon peutroeh

Meutoi ngoen jeuoh, bandum lon sapa

Hajat lon kisah, Hikayat Tikoh

Supayah bek roeh, tanyoe  keurija

 

Meuroeh geutanyoe, tabiat tikoeh

Hudep dalam broeh, teumpat yang hina

Oh Uroe dudoe, nuraka pajoeh

Tabiat tikoh, bek roh keurija

 

Saboeh riwayat,  kisah  lon peutroeh
di nanggroe jeuoh , na saboeh bangsa
Jiduek lam uruek , ji eh dalam broeh
Keu bangsa tikoh , haba lon rika

Keu tikoh di blang,  atawa di lampoeh
Wajeb taparoeh, ngat bek  binasa
Tagloeng jeuneurob,  tapageu lampoh
Taleet beujeoh,  bekle  ji teuka

 

Dilee koen hudep,  di bangsa tikoh
Teupat peuniyoeh,  lam uruek raya
Meu aneuk binoe , sinan dalam broeh
Sinan seumajoeh,  pue-pue yang hawa

Tapula ubi , golom troeh tanggoh
Kalheuh dijak kueh , peureudei jiba
Pade tatabu , keubu ta pajoh
Troeh bangsa,  tikoh ka jijak seuba

Leupah sengsara , menyoe na tikoh
Habeh ji sampoeh,  jagong keupila
Harkat ta hudep , sabe hana troeh
Tabiat tikoh , lage nyan rupa

Jinoe  hai rakan,  jipeugah katroeh
Rame that tikoh,  dalam istana
Jicoek hareukat , bak luwah lampoh
Ka jijak peuroeh,  bak peutron keunira

 

Hak Aneuk yatim,  jitem jak sampoeh
Jitem jak pajoeh , hak inoeng janda
Hai pak Peumimpin , neumat peujampoeh
Bagah neuparoeh,  tikoh bekle na

Kameunyoe teulat,  neumat peujampoeh
Geutanyoe kiroeh , sama sibangsa
Seubab  ji  adu,  tanyoe meusoeh-soeh
Nyan cara tikoh , bak reubot kuasa

Kadang e rakan,  neujak u lampoeh
Meureumpok tikoh,  neuturi hana
Neu eu peulandoek , neupeugah tikoh
Mungken syit lapoeh,  sisat lam paya

Ulee jih tincu , iku jih  haloh
Bule bak tuboh,  haloh  lagoina
Misee jih panyang,  bagah that luroeh
Tanda nyan tikoh , bekna le dawa

Gigoe jih blah keu , tajam dua boeh
Bagah bak jikoeh,  makanan raya
Punyueng ji rayeuk , ruhueng diteungoh
Mangat bagah troeh,  info bahaya

Neujak u Calang ,  Gureute neupiyoh
Troeh u Meulaboh,  uroe ka Asa
Bek bri jabatan , keu bangsa tikoh
Habeh ji pajoeh , harta neugara

Meu di glee Maheng ,Ureung meulampoh
Ateuh Gunoeng Goh , ureung meurusa
Hai pak peumimpin,  beuteugoeh-teugoeh
Mantoeng le tikoh , dalam istana

Pemimpin Aceh,  jinoe beu sunggoh
Jak paroeh tikoh , dalam istana
Suwa neu peuhu , tatoet ngoen suloh
Cara let tikoh , kon dengoen TAKPA

 

Istana beugleh, bek seumak ngon broeh
Han jiduek le tikoh , ka jiloep peunjara
Sayang that rakyat , ekonomi  putoeh
Kadang syit rumoh , pat jiduek hana

 

Angen sinja,  jipoet u Meulaboh
Wate oh beungoh , jipoet u Banda
Mumada ohnoe,  hikayat tikoh
Hana meutanggoh , lon sambong haba

========================================