"ASOE SYURUGA"

   Oleh : Asri/Agam Sidroe

══════════════════
Assalamu'alaikum, syedara meutuah,,
Samboet beubagah, ikhlah lam dada,,
Beu jeuoeh riya, meulindoeng bak Allah,,
Bek roeh meureupah, nafsu keu donya,,

Dzikir lam hate, meuwoe bak nafah,,
Lam tiep2 saah, jeut2 kutika,,
Saboeh mustika, keuneuk loen peugah,,
Ummat Rasulullah, asoe syuruga,,

Asai mula phoen, kata loen kisah,,
Dari Abu hurairah, sahabat mustafa,,
Teumpat mulia, majlis Rasulullah,,
Sinan keuh phoen gah, bak meuwoe haba,,

Teungoeh meu deuk2, sira neu meudrah,,
Ngoen Rasulullah, Nabi mulia,,
Singoeh beungoeh, troeh sidroe hamba Allah,,
Rasul neu peugah, asoe syuruga,,

Sajan gata, seumbah Allah,,
Nyan 'abdullah, asoe syuruga,,
Mandum jama'ah, teuhah babah,,
Meusoe yang meutuah, teuboeh nyan hamba,,

Laju neu kheun, le abu hurairah,,
Seumoga Rasulullah, neu teunyoek hamba,,
Suboeh teuka, goeb nyan phoen langkah,,
Dilikoet Rasulullah, sembah Rabbana,,

Hana neuwoe2, abu hurairah,,
Sampoe neu peugah, meu soe nyan hamba,,
Lam tiba2, teuka sidroe hamba Allah,,
Muka geuh sukla, hitam lagoe na,,

Bajee geu soek, ka beukah2,,
Koen ureung meugah, ban sidroe raja,,
Laju geu peutoe, ubak Rasulullah,,
Deungoen merendah, do'a geu pinta,,

Wa ya saiyidi, ya Nabiyallah,,
Pinta bak Allah, syahid loen rasa,,
Do'a neu pinta, keudeh bak Allah,,
Le Rasulullah, asoe syuruga,,

Nabi meudo'a, diteungoeh jama'ah,,
Dipoet bhee meugah, kasturi syurga,,
Bak tuboeh hamba, lam prang neuk langkah,,
Asoe meutuah, meunyan keuh hamba,,

Leuh nyan neutanyoeng, bak Rasulullah,,
Nyan hamba Allah, yang po syuruga,,
Hana salah le, hai abu hurairah,,
Iradah Allah, Rahmat karunia,,

nyan sidroe budak, bani fulanah,,
Mulia bak Allah, hina bak hamba,,
Demi agama, nyawoeng di ilah,,
Seumangat meuleumpah, asoe syuruga,,

Wa ya Nabiyullah, tanyoeng abu hurairah,,
pakoen han Rasul peuglah, budak merdeka,,
Kiban loen peuglah, jaweub Rasulullah,,
Neu peujeut le Allah, nyan sidroe raja,,

Beuna ta teupeu, abu hurairah,,
Uroe akhirah, pangkat meubeda,,
Ureung terkemuka, lam syurga Allah,,
Budak meutuah, ban sidroe raja,,

Allah Neu gaseh, ureung yang lemah,,
Hate yang ikhlah, suci lam jiwa,,
Yang gleh dada, Allah di seumah,,
Sabe bak babah, dzikir seureuta,,

Yang geusiep pruet, lam ridha Allah,,
Harta meutuah, asoe yang raya,,
Nye geujak bak raja, sabe han leupah,,
Payah meureupah, deungoen penjaga,,

Geu pinang putroe, lam sagoe di ilah,,
Watee tan leumah, hana soe mita,,
Meunye troeh teuka, hana soe papah,,
Meutan le meugah, dalam dunia,,

'Oh teuka saket, sidroe geuh reubah,,
Hana soe papah, kaloen nyan hamba,,
Nyawoeng troeh teuka, neu woe bak Allah,,
Hana yang ilah, rayueng keureunda,,

Sahabat teubingoeng, peunasaran meuleumpah,,
Meu soe ya Rasulullah, sidroe nyan hamba,,
Uwais Alqarany, Nabi neu peugah,,
Manyang meuleumpah, tuboeh nyan hamba,,

Sabe neu tundoek, watee geu grak langkah,,
Ayat bak babah, Al-Qur'an geu baca,,
Wareuna geuh sukla, baho yang luah,,
Cukoep meutuah, meunyan keuh hamba,,

Meunye dibumoe, hina meuleumpah,,
Hana soe ilah, meungoen ngoen hamba,,
Tapi dilanget, Tuhan iradah,,
Pangkat meutuah, dituri ubena,,

Eh noe meumada, haba loen kisah,,
Sahabat Rasulullah, asoe syuruga,,
Hudep mulia, dalam ibadah,,
Sabe di babah, pujoe Rabbana,,

Meu'ah loen lakee, pat2 na salah,,
Nyoe alkisah, AL-HIKAM loen buka,,
Koen rika2, galak2 loen peugah,,
Halaman neu ilah, 24 neubuka,,

Kadang na kata, cupa deuh leumah,,
Saran neu peugah, mangat sempurna,,
Bek sampe meu dosa, hamba ngoen Allah,,
Jeut keu fitnah, ateuh rhueng donya,,
( Agam Sidroe kamis 26 juli 2012M / 6 ramadhan 1433H )