"JANJI TA IKAT GEUTANYOE DUA"

======================================
Salam'alaikoem,  tanglong malakat
Meutoe deungoen rab,  sigoe loen sapa
Gunoeng seulawah meugah,  manyang that
Siblah roet barat , tanoeh cempaga

Diloen hana pree,  sabe meucen that
Sabe  teu ingat,  keupada dinda
Cinta yang suci , neubri meukeumat
Uloen meuhajat , beutroek ban pinta

Hate rindu , gata peu ubat
Gata yang rawat, tuboeh  meurana
Ngoen tiba tiba , gata beurangkat
Hana alamat,  Keubah  keu kanda

Poma ngoen ayah , hana geu harap
Cinta ta ikat,  geutanyoe dua
Paduem trep sabe,  seutoet alamat
Ulon  ka sisat , lam uteun raya

Saleh u timu , saleh u barat
Hana loen teupat,  alamat dinda
Darah bak beuteh,  abeh keu pacat
Duroe awe mat , ka beukah ija

Tuboeh lon lusoeh,  habeh keurawat
Tuleueng ngoen urat,  rab tanle daya
Ayah ngoen poma , seudeh geu that that
Ulon beurangkat,  sisat lam rimba

Saleh cit mate , hana meupat jeurat
Jak mita ubat , hate yang luka
Loen tinggai poma , ayah di teumpat
Jak mita ubat , seubab loen bungka

Ubat peunawa,  yang that mustajab
Hai bungoeng langsat, bak gata dinda
Meugantoe uroe,  meuthoen lon sambat
Timu ngoen barat,  sabe loen mita

Tuboeh loen pijuet , tulueng ngoen urat
Cut puteh leumat, meuteumeung hana
Watee loen ingat , sang hantroeh hajat
Saket ngoen mangat, kabeh lon rasa

Kaseb keuh ohnoe,  saboeh riwayat
Cinta Meu ikat, dilon ngoen gata
Di dalam pantoen , peusan loen intat
Tawoe keuh siat , jak joek peunawa

“Tamah Bacut Truek”

=====================

Meujak meuraksa , timoeh lam buleun
Patah saboeh dheun , yoeh geumpa raya
Bak loen na saboeh , si dada limpeun
Ban lheuh loen teumeung , malam barosa

Nibak simalam,  loen duek bineh leun
Loen pandang buleun , hate meuraba
Laju teuingat , keu intan buleun
Katrep meusareung , yoeh saboeh masa

Meukeumat gaseh, hate meusareung
Loen duek bineh leun,  teuingat gata
Tapreh loen gisa , e adoe buleun
Kasiap mandum , peunuwoe keu gata

Keu asoe kama,  nyak putroe meugleung
Buleun sikureung , Rencana loen gisa
Katroeh bak janji , lagee yoeh takheun
Loen peutroeh buleun , ban hajat gata

Beurayoek  saba,  e putroe meugleung
Jaroe talintueng, ta lake doa
Beutroeh ban maksud , lagee tanyoe kheun
Beusaboeh mideun , geutanyoee dua

Meuseb keuh oh noe , pantoen uloen kheun
Keu asoe mideun , calon adinda
Meunyoe na umu , hai putroe meuglueng
Gaseh meukaleung , ubat katoe na

Top of Form

Bottom of Form

==============000============