“ MEUNYOE YOEH DARA “

======================================

BUKOEN LE SAYANG sipade leukat
Dikab le ulat ,yoeh mantoeng muda
Yoeh mantoeng dara,  badan teuh sehat
Timu ngoen barat,  kumbang troeh teuka

Oh ban kalayee , tanle dihajat
Kumbang di beurangkat,  la-en dimita
Meunan Umpama,  hai  bungoeng langsat
Beuget ta ingat , yoeh goeh loem mala

Meunyoe yoeh dara,  mantoeng bee mangat that
Ramee yang hajat , keu gata dara
Meumacam cara,  rayuan  surat
Oh ban troeh hajat ,  hanale guna

peuloem kalaye,  bee hanale mangat
Gadoeh meukilat,  mahkota gata
Watee nyan keuh masa,  baroe teuingat
 Taklik raya that,  hanale meuguna

Alah hai adoe , poe bungoeng langsat
Beugoet ta ingat,  harapan yah ngoen ma
Di dalam pantone,  haba loen peuingat
Seubagoe nasehat,  keutanyoe dumna

Kaseb keuh ohnoe,  saboeh amanat
Di dalam radat,  loen rawi haba
meunyoe na umu,  meubri le hazarat
Samboeng riwayat,  jan watee teuma

===============================