“ PEUJABAT KROPSI “

  Oleh : SULAIMAN.A.GANI

=================================================

Alhamdulillah, lon puphoen  kalam

Lon pujoe  Tuhan, Sidre  yang  Esa

Seulawuet  saleum, akan janjongan

Pang ule alam,  atueh rhueng  donya

Assalammua’laikom, saleum lon laying

Keu bandum  rakan, tuha ngoen muda

Dalam  grup panton, cae   lam  muprang

Inoeng ngoen Agam, bandum Anggota

Hajat lon peugah, saboeh karangan

Lumpoe  lon tuan, malam  barosa

Malam jumeuat, jeum poh  lhe malam

Nibak  watenyan, leumah  rasia

Suloh yang akhe,  oh lhueh  seumbahyang

Teunguet  lon tuan,   na   sikutika

Leumah  lam lumpoe, meunoe ban  macam

Si  ulah sang  sang,  Aceh  seureupha

Aceh  sang hancoe, teupeuroe  leukang

Aceh na nyum sang, jiteuka  bala

Geumpa  meuhamboe, hancoe  dum  karam

Lage na nyum sang, Tsunami  dua

Seuramoe meukah, goyang  buet  geumpa

Deuri ngoen bara, meujungkat jungkat

Aceh  watenyan,  tameh  ka bungka

Deuri  ngoen bara, kabeh  kamue  kab

Aceh lon tamse, seuramoe  raya

Kajuet  saudara, tameuduek  pakat

Tagantoe  deuri, ka deungoen  bara

Tampoeng yang hana, kajuet  tapeudap

Karoh  lam bala, Aceh  mulia

Sigra  jak publa, bek  juet keu  sungkat

Takalon kropsi,  meuraja  lela

Lage  budaya, kajuet  keu  Adat

 Karap  gantoe  thoen,  katroek  kutika

Peujabat  Negara, yang  pajoh peng rakyat

Peujabat  kropsi,  tagantoe  sigra

Bekle  meucuca, jak  peunguet  rakyat

Jujur ngoen  ade, peumimpin   tamita

Ta  lantik  sigra, seujahtra  rakyat

Bek   lage  jinoe, le  that  muruwa

Bandum  jiseuba,  bangke ngoen  ulat

Meunyoe  lagenyan,  Aceh  mulia

Tinggai  preh  bala, kutoek hadharat

Padahai  Aceh, tanoeh  mulia

Pusaka  Bangsa,  nanggroe  keuramat

Meumada  ohnoe,  untuk  sikada

Haba  lon rika, untuk  peujabat

Haba  peu ingat, keu  anuek  bangsa

Sigolom  bala,  kutok ngoen laknat

Tgk  Diyueb  bruek, yang  suson haba

Anuek  barosa, meutitik  pusat
meuah  beurayoek, meunyoe  na cupa

Hana  seungaja,  kon jak  meu  upat

(Tgk  Diyueb Bruek/Sulaiman,A,Gani )

Tanggal, 22   Oktober  2012