PAHALA PUASA-2

Oleh : SULAIMAN.A.GANI

================================

Firman tuhan,  hadist kudsie

Hikayat nabi,  pangulee alam

Tiep – tiep amalan,  sama sekali

Yang dikerjai,  le  aneuk adam

Bandum amalnyan,  tuha  peugah kri

Geubangsa bagi,  ureung kerjakan

Amal puasa,  terkecuali

Keudroe sendiri,  tuhan bangsakan

Disinoe loen boh, soal teukeudi

Pakoen di rabbi,  neupeugah meunan

Sedang ibadat,  sama sekali

Perintah rabbi , dum sekalian

Akan balasan , yang akan neubri

Bandum  bak rabbi,  cit keputusan

Bahan ngoen jaweub,  jinoe u loen bri

Puasa ini,  saboeh amalan

Saboeh ibadat,  yang tersembunyi

Han diketahui,  le hawas insan

Le manusia,  han diketahui

Malingkan rabbi , nyan po amalan

Meunan sit,  fahala puasa ini

Balasan neubri , rasia han ban

Uroe akhirat , nabi peugah kri

Saboeh peureute , umat iseulam

Bagi mareka , sayeub tuhan bri

Ban cicem nuri , kajeut teureubang

Jeut po u manyang,  kian keumari

Sampoe peureugi , syuruga lapan

Oh lheuh kelilieng,  syuruga tinggi

Yoehnyan berhenti , bak saboeh taman

Nyakni bak keubon,  indah han sakri

Peunoeh ngoen isi , buah – buahan

Hana padum trep , sinan berhenti

Yohnyan teuka le,  peunjaga taman

Peunjaga syuruga , yohnyan geusudi

Wahe ya akhi, soe keuh gatanyan

Pue malaikat,  atau insani

Ayeib han sakri , hireuen lon pandang

Jaweub mareka , kamoe ummati

Panghulee nabi , yang akhe zaman

 

Malek ridwan,  yoehyan lom sudi

Khaleuh hai akhi , geuceing amalan

Kahleuh talalu , gata bak titi

Cuba peugah kri , pakriban macam

Jaweub mareka,  waya hai akhi

Hana lon tukri , geuceing amalan

Hana meutumee,  kamoe ngon titi

Bek  an lonturi , lon kaloen pih tan

Peunjaga syuruga , hireun han sakri

Subhanallahi , ucap le yoehnyan

Malek ridwan , yoehnyan lom sudi

Wahe ya akhi , puekeuh amalan

Pue keuh ibadat , gata kerjai

Sampoe tuhan bri , lage nyoe macam

Titi han meupat,  hisab han meuri

Bebas han sakri, neubri le tuhan

Jaweub mareka,  ya wahai akhi

Kamoe berbakti , dengon amalan

Dengoen ibadat , yang tersembunyi

Kamoe hormati,  buleun ramadhan

Oh watee katroek,  buleun nyang suci

Kamoe samboet le, ngoen hatee seunang

Deungeun puasa , yang kamoe isi

Yang disertai , ngoen keikhlasan

Dengon seubabnyan,  wahe ya akhi

Sampoe tuhan bri,  meuno ban macam

Sayeup di kamoe,  langsong tuhan bri

Sampoe keumari , kamoe teurebang

Tuhan peutamoeng , syuruga tinggi

Ngon tersembunyi , hana soe pandang

Oh noe katamat , seujarah nabi

Cuba peurhati , kawom iseulam

 (  Tgk Diyueb Bruek, 23/09/2010 )