“ANEUK DARA DIJAK MUNTE “

=======================

“Aneuk dara dijak munte
Jilhat alei icoeng limeng
Jipoet angen rhoet alei
Teukeujoet asei dikab kameng”

=================================

Bukoen sayang cicem pala
Jikarom boh tilamsahit
Bukoen sayang ureung pukaha
Jiseumah po karoeh namiet

Buleun pengeuh takawe eungkoet
Watei ie suroet takoeh bak bangka
Tasuet gleung meuh sok gleung baloet
Buet han patoet bek takeurija

Di langet manyang bintang meujandreng
Di bumoe gaseng meuputa
Wahe e Poma ulei lon ka puseng
Sidroe peundampeng pat lon jak mita

Dicoeng bak manggeh jimeuloet siwah
Dicoeng bak lawah umpueng seureungga
Lethat sam lakoe kahabeh susah
Bak peutimang gah peureulei keu cinta

Donya kiamat alamat kana
Bak aneuk dara tapandang lahe
Ulei han jitop tuoet u luwa
Tangieng uram pha leumah meuble-ble

Dodaidi
Canggueng pong geunteng gaki
Buya krueng ka teudoeng-doeng
Buya tamoeng meuraseuki
Dum manoek toh boh saboh

Rata lampoeh soh meuseurapa
Pinyie jitoeh siribei
Hana jithei le ureung lingka
Hana patoet ta peupatoet

Gaki euntoet ta boeh geunta
Hana layak ta peulayak
Jaroe supak ta boeh gaca
Hareuta na han ta pajoeh

Ta troeh keu umpeun tanoeh
Watei teuga ta jak u gle
Watei saket woe u rumoeh
Jahak ala jahoek

Tame sujoe keunoe kusoek
Bek tasoek rakan dilei
Ta eu dilei lagei gob soek
Jak u pasi pukat panyang

Jak lam sawang pileh boh nga
Jak u gle pileh mancang
Jak hai rakan tameuseunda
Keureuleng kubeu meuheut keu kubang

Keureuleng enggang meuheut keu paya
Meunyoe sinan tan cangguek phang
Pubuet enggang keunan teuka
Khem meuhah-hah saleuk iblih

Khem meuhih-hih saleuk guda
Khem teuseunyom saleuk bak teungku
Khem sigeutu saleuk ulama
Kira keu boh panjoe

Boh meuria masak di bak
Kira keu untoeng gob
Untoeng droe meusak garak
Kulat pak di Meulaboeh

Kulat goh di Meurasa
Ureung rab han meuteumei pajoeh
Ureung jioeh meuteumei rasa
===========================