“ HAN EK TERAWEH “

=================================
We’ bungkoek uyuep , dalam Alqur an
Alef dengoen Lam, meusapat dua
Assalam mu’alaikum, keubandum rakan

Izin lon tuwan, tuleh cerita

Wate meubuka, pajoeh makanan
Kalheh meu idang, di ateuh meja
Kulak boeh ubi, cagruk ngoen bak wan
Bada boeh pisang, kueh meuputa

Teuma aneuk joek , kalang kaleng nan
Meujampue keunan, ngoen boeh keupila
Ie juss saboeh glah, kasiap keunan
Meu macam  macam, di ateuh meja

Wate meubuka, ka sue aleram
Kiri ngoen kanan, kuweh lon raba
Cagruek lon tampoe, ie juss lon hantam
Sampe hai rakan, tuwoe meudoa

Teuka saket pruet, ule kamumang
Reu oeh bak badan, ka buluet ija
Makanan lam pruet, ji goyang goyang
Sang sang hai rakan, ji meu en bola

Di aneuk panah, kaji meulawan
Cagruek ngoen, timphan kaji meudawa
Di kalang kaleng, ji groep groep seunang
Ji beudoeh timphan, ji troem uluwa

Ji beu oet palee’, di bada pisang
Kakenoeng hantam, bak boeh kepila
Di kalang kaleng, ule kamumang
Rhoet babah rijang, teusuet uluwa

Laju ka muntah , di ulon tuwan
Seubab pajoeh makanan, hana keunira
Ka teugloeng mata, rab teuka pangsan
Reubah disinan ,rap hana daya

Seumbahyang mugreb, siteungoeh lapan
Insya hai rakan, siteungoeh dua
Han ek teuraweh, saket lam badan
Le that pajoeh makanan, wate meubuka

Akai lage nyan, wahe e rakan
Bek sagai sagai, ikoet legata
Yang ka terjadi,  bak ulon tuwan
Bek le meu ulang, nibak syedara

Wate meubuka, pajoeh makanan
Beule hai rakan, jeub ie Akua
Seumbahyang teuraweh, bek sampe tinggai
Seubab di sinan, jai that fahala

Dua ploeh raka’at, tanyoe kerjakan
Meunan hai rakan, pendapat ulama
Meunyoe han ek tapuebut, jumlah sidumnan
Tapuebuet lapan, lage khen syahra

Menuyoe chiet han ek, tapubuet lapan
Tapubuet hai rakan, dum sanggoep gata
Asai bek dawa, dua ploeh ngoen lapan
Goep yang seumbahyang, tanyoe yang subra

==================================