SYARI’AT ISLAM JINEUK PEUDAYA

=============================

Assalamu’alaikum kaom Islam

Inong ngon agam tuha dan muda

Kru seumangat rahmat meukuyan

Karonya Tuhan keutanyoe hamba

Deungo lon kisah saboh khabaran

Haba lam koran cukop that gura

Lagee tabaca kasus di Sabang

Cukop that sayang wahe syedara

Jiyue jak uko anggota badan

Supo pikiran lageenyan rupa

Kajipeugah droe mentri kesehatan

Peureulee ukuran ubeut ngon raya

Hanjeut teurimong nyonyan alasan

Sangat bertentangan deungon etika

Hana hubungan ngon pendidikan

Citna tujuan peumalee bangsa

Peulom di Aceh wahe ya rakan

Syari’at Islam jineuk peudaya

Citka jiato uleh kafe plang

Jipeugot program jimita cara

Supaya karu ureueng Islam

Lageenyan seunang kafe ceulaka

Leubeh-leubehlom nyotatem muprang

Sesama Islam jiadu domba

Sideh di Langsa pihsaboh macam

Jahe hanaban watee takira

Jimeu en kybord peugot hiburan

Ohjula malam mabok narkoba

Ohtrok petugas kageujak larang

Laju jilawan le aneuk muda

Dikeuchik gampong geubri dukungan

Ureueng disinan kureueng agama

Kiban tapike wahe e rakan

Beu ek talawan musoh agama

Bak pemerintah tanyoe harapkan

Beuna pikiran untuk bela agama

Ohnoe keuhmantong sipatah kalam

Bacut nasaran bak kamoe hamba

Kadangna salah harap ma’afkan

Lamgugob,11 september 2013

Oleh:Abu Kasim Bandar Dua

==============================