“ ACEH SANG RAB REULE “

   Oleh : SULAIMAN.A.GANI

==============================

Assalammua’laikom, Saleum lon Sapa

Tuha ngoen Muda, Banda deungoen gle

Samboet saleum lon, Kawoem saudara

Saboeh Mustika, Hajat loen Rawe

Katreb ka hajat, cae lon rika

Ka padum masa, goehloem troek sampe

Nibak uroenyoe, Allah Neukada

Sehat anggota, loen Rawi  cae

Seubab loen kaloen, bangoen lam donya

Kaleumah tanda , rata sagoe gle

Sang karab sampoe, kiamat donya

Aceh Mulia, sang karab reule

Takaloen dali, Mudi ngoen Muda

Bak jinoe masa, male hanale

Seuramoe Meukah, tanle hareuga

Hukoem Rabbana, peuduli tanle

Wate Tsunami, Musibah teuka
Dusoen ngoen kota,  ureung dum mate
Seu akan akan ,  kiamat donya
Baroe jiteuka,  inseuh lam hate

Rame dum sadar,  Mudi ngoen muda
Dalam musalla,  meu do'a sabe
Sang han le riwang,  bak buet yang murka
Taubat nasuha,  hana tom pre pre

Tapi  oeh ban troeh. Nyan  ureung lua
Bantuan jiba,  tika ngoen sipree
Jibri ngoen  rumoeh,  sama dum rata
Ureung ka lupa,  keu Rabbol kade

Han le teu tingat,  pujoe Rabbana
Geucoek musalla,  geu ade pade
Gecoek seuleukoem, geutiek coeng para
Kepue lom do'a,  geumpa hana lee

 Beuetoi  that geukhuen,  le ureung tuha
Peupatah lama.  mantoeng meu ukee
Oeh wate saket,  tanyoe meu do'a
Wate na gempa,  meuratep tan pre

Seu akan bala,  karap lom teuka
Adeup tarasa,  kota dengoen glee
Hukoem syari' at,  tapuebuet hana
Pemimpin bangsa,  hana le ade

Hudep ka bebas , mudi ngoen muda
Bak buet yang murka,  soe larang tan le
Ta ue meu uem uem,  di ateuh honda
Sang sang saboeh ma,  ureung peulahe

Bak taloe jalan ,  aurat dibuka
Di aneuk dara,  hana male le
Hana le sayang,  untuk agama
Pakoen menan ka,  adoe boeh hate

Bala lam nanggroe,  pakoen ta hawa
Kalheuh tarasa,  yoeh tam tum bude

Yoeh Masa komplik, Aceh mulia

Kiban seunsara, neucuba pike

Wate Musibah, tsunami geumpa

Kalhueh tarasa, buet rabbul kade

Hanpue ta undang, meuriwang bala

Buet Tuhan Esa, han soe ek  pike

Bek le uroe nyoe,  adoe ta pinta
Kasep yg ka ka, hai Bungong pade

Jinoe tariwang, Taubat  Nasuha

Pujoe Rabbana, jinoe bekle pre

Meukoen lagenyan, hai Mudi muda

Sabe lam bala, tanyoe hantoem pre

Hanpue talake, ta undang bala

Aceh Mulia, bek sampe reule

( Tgk Diyueb bruek 23 Oktober 2013 )