ADAT MEUKAWEN BACUT LON KISAH

Oleh:Tgk.M.Kasim Yahya,

=================================

Assalamu’alaikum/ warahmatullah

Jaroe duablah, ateuh jeumala

Ulon bri saleuem, keu poma ayah

Rakan meutuah,  bandum syedara

Kru seumangat,  rahmat meulimpah

Karonya Allah,  keutanyoe hamba

Hudep lam donya,  beuna ibadah

Bek singoh teulah,  di Padang Mahsya

Lon puphon kalam,  deungon Bismillah

Lakee barakah,  bak Allah Ta’ala

Adat meukawen,  bacut lon kisah

Neubri ya Allah,  beutrok ban pinta

Awai dilee phon,  geu ayon langkah

Raueh geujak cah,  uleh keluarga

Pihak blah agam,  rakan meutuah

Kageujak peugah,  pihak blah dara

Hajat dikamoe. keunoe troh langkah

Sinyak Abdullah. pihka dewasa

Jinoe kameuheut. bungong si ulah

Sinyak Ramlah. soena ka tanda

Teuma geujaweueb, laju le bagah

Sinyak Ramlah, gohna nyang tanda

Meunyoe na hajat, keubungong ceudah

Pinto teupeuhah, neutamoeng sigra

Seunang that hate, Alhamdulillah

Jinoe lon kisah, tahap keudua

Kamoe meugisa, bak buleuen siblah

Meujak khitbah ,deungon me tanda

Supaya yakin ,bek jeut keugundah

Teuntee nyang peugah, na ureueng tuha

Adak jeulamee, sinan pih jeulah

Hana le payah, tanyoe meudawa

Bandum setuju, cit ban duablah

Seunang meuleumpah, hate gembira

Teuma ohlheuhnyan, tahap meunikah

Deungo lon peugah, wahe syedara

Kahana trep le, sinyak Abdullah

Jak sambot nikah ,ngon sidroe dara

Watee lheuh Haji, dua ribee lheeblah

Buleuen duablah, bak tanggai dua

Tgk.KUA Kec, .nyang bri tausiyah

Dalam khutbah,  di Meuseujid Raya

Geubri nasehat,  sangat meungarah

Hudep mawaddah, lam rumoh tangga

Suami isteri, bekna meutingkah

Meunyona salah, beurayoek saba

Meunyoe  jeut tatoep, keupeue tapeuhah

Malee teuh leupah, ngoen ureueng lingka

Hingga seuleusoe, baca khutbah

Langsoeng peunikah, aneuknyan dua

Teuma diwali,  ijab le bagah

Sinyak Ramlah,  nama geubaca

Di ucap qabul, sinyak Abdullah

Nikah pih kasah,  Allah neuridla

Nibak agama,  hana le salah

Hukoem pihka glah,  hanle meudosa

Hana trep lheuhnyan, rakan meutuah

Peugoet walimah, meuhei syedara

Uroe khanduri, cukoep meuriah

Hayeue meuleumpah, geupasang tenda

Di ureueng gampoeng, juroeng geujak cah

Supaya mudah, moto ngon honda

Geu undang jamee, rame meuleumpah

Rakyat barollah ,takaloen teuka

Nyang cukoep gabuek,  pak keuchik Madsyah

Untoeng pih bagah,  na panitia

Ladoem taguen bu,  ka deungoen kuwah

Nyang cang boeh panah,  na apa Baka

Nyang dara-dara,  rumoeh jihiyah

Pocut Khadijah,  ureueng boeh gaca

Keubit that tari,  sinyak Ramlah

Sanghi tapeugah,  peurumoeh Raja

Ngoen pelaminan,  pih cukoep indah

Kuneng ngoen mirah,  takaloen rupa

Geupuduek sandeng,  sidara ceudah

Nyang poet-poet kipah,  adek Nurmala

Rombongan linto,  pih troeh poeh siblah

Geusamboet bagah,  le ureueng tuha

Mubalah pantoen,  naban dua blah

Dalam istilah,  geukheuen seumapa

Ohlheuh nibaknyan,  ka geuyue langkah

Poma dan ayah,  bekle diluwa

Udalam rumoeh,  cit geuboeh batah

Siploh droe ayah,  limong blah bunda

Nyang patoet-patoet,  teumpat geukubah

Miseue tapeugah,  perangkat desa

Meunan cit bisan,  rakan meutuah

Jaga marwah,  tanda mulia

Yoeh goeh geutamoeng,  geudoeng bak terah

Nazam sipatah,  do’a geubaca

Sipreuk breuh pade,  lakee beureukah

Neubri ya Allah,  hudep bahgia

Laen nibaknyan, geulakee meu’ah

Bak teumpat luwah,  dimiyuep tenda

Geuyue pajoeh bu,  gulee boh panah

Suree keumamah,  kuah dalica

Ohlheuh khanduri,  linto geuseurah

Penyambung lidah,  kalheuh geumita

Laju geupeujoek,  sinyak Abdullah

Cukoep that gagah,  muda perkasa

Barang peuneuwoe,  bandum geulimpah

Miseue tapeugah,  bajee ngon ija

Dak ie raminet,  kuweh keukarah

Boh appel mirah,  anggor India

Habeh geuseuboet,  bandum geuseurah

Ureuengnyan ka glah,  kahabeh haba

Mupatna kureueng,  geulakee meu’ah

Kadangna salah , bek jeut keu cupa

Mesjid Raya,  keubit that indah

Tujoeh boh kubah,  saboeh meunara

Adat meukawen,  meusyen sileumpah

Beujeuet keunaskah,  adat budaya

Wassalam dan terima kasih

(Oleh:Tgk.M.Kasim Yahya)

===================================