KEUJADIAN SARAKAH DAN SURAT AL-IKLAS

   Oleh  : SULAIMAN.A.GANI

========================

Tacoek meukeusud , saboeh seujarah

Surat Al-iklas ,mula  neupeutroen                            

Bak wate nabi, teungoeh  hijrah

Nanggroe madinah, keudeh  hai  kawoem

Sikafe kureh, lam  kota  makkah

Jimeusyawarah, mupakat  langsoeng

Bak saboeh  teumpat, darulnaduah                            

Sinan neupeugah, saboeh bale roem

Na  abu jahai,silaknat  tellah

Yang  buka  babah, mula  awai  phoen

Meusoe  yang  ek  poeh, nyan  rasulullah                

Kubri  ngoen  upah, meujuta  liyun

Sireutoeh  unta, yang  bule  mirah

Sireutoeh tamah, guda  yang  teuboen

Sireutoeh  lamit,yang ceudah  ceudah                           

Peut  ploeh  nam gagah, rakyat  nanggroe  roem

Jise ot sidroe, nama  sarakah

Jaroe  dua  blah, ji  angkat  langsoeng

Jikheun  ek jipoeh, nyan  rasulullah                           

Seudia  upah, jinoe  keu  uloen

Ji ek coeng guda ,pahlawan  pantah

Pideung  meu  asah, jisak  lam  saroeng                       

Jiseutoet  laju, nabi  hijrah

Roet  padang luah, laju  ji  aroeng

Wate  karab  troek, toe  rasulullah

Pireuman  allah, malaikat  peutroen                          

Neutroen  jibrail ,laju  le  bagah

Kaneujak  peugahg, kalam  ilahon

Wahe  muhammad,gata  musibah

Bak  bumoe allah, talake  tuloeng

Nabi  neukaloen, katroek  sarakah                      

Nibak  potollah, neulake  tuloeng

Nabi  meulake, ka nibak  allah

Ka uet  sarakah, wahe  bumoe  loen                           

Oh  teuot  guda,  ji  uet  le  bagah

Yoehnyan  sarakah, jilake  tuloeng

 Nabi  meulake, nibak  potallah

Guda  pih kaglah, hanle  teupasoeng                      

Nabi  beurangkat,  laju  hijrah

Yoehnyan  sarakah,  jilet  le  langsoeng

Wate  karab  troek,  bak  rasulullah

Nabi  peurintah, lage  bunoe  phoen                           

Oh  pusat  guda, ji  uet  le  bagah

Yoehnyan  sarakah, jiklik  meu oeng  oeng

Hanle  loen  bunuh, ya  rasulullah

Yang  gata seumah, tapeugah  bak  loen                

Meupue  dari  meuh, yang  gata  seumah

Tacuba  peugah, beu beutoi  beutoi

Jitroen  coeng  guda,  laju  sarakah

Bak  rasulullah, laju  di joeng  joeng                       

Laju  neubaca, dirasulullah

Surat  al iklas, neubaca  langsoeng

Takheun  le  gata,  waya  muhammad

Tuhan  hadharat, sit  sidroe  saja

Hana meu aneuk, tuhan  hadharat                      

Gobnyan  pih  meuhat, bukoen  aneukda

Allah  taa`la, teupat  meuhadap

Puepue yang  hajat, geutanyoe  pinta

Hana  ngoen  bandeng, tuhan  hadharat                

Deungoen  zat  gobnyan, hana  ngoen  peusa

Meunan keuh  neukheun, le  rasulullah

Yoehnyan  sarakah,  hate  karihoen                  

Agama  islam,  jitamoeng  bagah

Iteukeut  beusah, geutanyoe  bandum

Hadis saidina, meunan geupeugah

Dalam  seujarah, loen  coek  hai  kawoem           

Nyan  keujadian,yangka  loen  peugah

Surat  al iklas, bek  salah  muphoem

======================================================

“  QUL HUWALLAHU AHAD, ALLAHHUS SOMAD ,LAMYALID WALAM YUULAD,  WALAM YAKULLAHU KUFUWAN AHAD “
============================================================

Sibeurangkasoe, hamba di Allah

Surat  Al-ikhlash, sabe dibaca

Tuboeh jih han broek, neubri le Allah

Kubu jih luwah, siteuntang mata

 

Dalam Syuruga, peutamoeng leupah

Malaikat Allah, ngoen sayueb geuba

Siratul mustaqim, Tuhan Peuleupah

Kareuna Surah, Al-ikhlash geubaca

Di Hadist laen, pih geupeugah

Di Rasulullah, pih na  Meu Sabda

Peut goe Tabaca, Surat  Al-ikhlash

Saban geupeugah, Qura’n  tabaca

Ka sigoe  khatam,  Nabi  neupeugah

Meunan ban ulah, geuboeh umpama

Sidum nan Dahsyat, Surat  Al-ikhlash

Rakan meutuah, bek sagai  lupa

Meumada  ohnoe, Rawi loen peugah

Meunyoe na salah, peu beutoi  sigra

Sulaiman. Gani, yang  Rawi kisah

Koen Anuek Dayah, sikula pih hana

( Tgk  Diyueb Bruek, 31 Oktober 2013 )