“AMANAH URUENG TUHA”

==============================
Alhamdulillah,  lon pujoe Tuhan
Syukur that badan,  sehat Allah bri
Seulaweut saluem,  ateuh janjongan
Sidroe panutan,  muhammad nabi

Asslamu alaikom,  wareh ngoen taulan
Bacut karangan,  hajat  lon rawi
Meunyoe na salah,  Peubeutoi Rijang
Neubri  bimbingan , deungoen  koreksi

Le urueng Tuha, keubah peuneusan

Meunoe ban macam, deungoe lon rawi

Geutanyoe hudep, lam bumoe tuhan

Jaga hai rakan, akai ngoen budi

Beujuet peu ingat, ka beurang kajan
Beuna tasimpan , didalam dada
Meuhoe  yang tajak,  taba keu tungkat
Meuyoë nasehat, bak  ureueng tuha.

Meu insyak  Allah , rakan  meutuah,
ngoen  tuloeng Allah,  gata bahagia
Akai teubeujroeh, meubuet bek salah
Beugèot  tapapah,  budi bahasa

Dak gampang tajak, didalam kawan
Ngoen Sabé rakan, yang  muda-muda
Kadang  roeh tajak, meutröeh u peukan
Dak pajan  padjan,  roeh beulanja.

Beutangui sipheuet, meuyang sipadan
Tangui peukayan,  yang sederhana,
Sabe dalam jreoh,  santoen ngoen sopan
Deugoen pikiran,  beubijaksana.

Wate  tamarit,  haba patoet
Ngoen leumoh leumboet,  wate bicara
Wate tayue goeb, bek meudhoet-dhoet
Beu deungoe patoet,  bek narit  gasa.

Wate  tangieng goeb,  bek ta peulikoet
Bek hanan patoet,  tapaleng  muka
Wate  tanyoeng,  beutatem seuoet
Ngoen leumoeh leumbot,  tutoe bahasa

Adak roeh tajak, dalam kawan le
Meubek tatajoe, meuhoe yang suka
Dak  taseumajoeh,  meulam  meu atoe
Bek leumah  buloe, ka  deungoen lubha

Takheum deungoen em,  bek tahe-gante
Bek  lagee  bante, ban  troen dirimba
Adak  talangkah,  be kroeh  meutajoe
Bek roeh meuhamboe, sibak pue yangna

 Peu  yang tapubuet,  bek roeh goeb ubah
Peu yang tapeugah,  bek juet goeb sangga
Deugoen rakan droe,  bek na meubantah
Meutan pa  edah , tapeudoeng dawa

Teukeudi  le eèng, meubek teukaboe
Meudigoeb pih le,  kon meuhat gata
Ujoeb teumeu'a,  riya teukaboe
Disinan yang lee,  ureueng binasa.

Keu ureueng tuha,  beu tahóreumat
Rakanngoen  sahabat,  tapuemeulia
Keu hareuta goeb, meubèk tamat  mat
Meunan keuh bai'at,  khuen ureueng tuha

Meunyoe han tapateh,  nasehat lon nyoe
Tarasa keudroe, Rugoe ngoen laba
Soe  yang meutuah,  pasti  di  ingat
Bandum  amanat,  han tom meutuka

( Banda Aceh, 17 Oktober 2013 )