===============================
Alhamdulillah tapujoe Tuhan
Nyang peujeut alam mumacam rupa
Neupeujeut langet mublet-blet bintang
Ohjula malam muble-ble cahya
Neupeujeut laot jipot geulombang
Eungkot didalam dumbe-be raya
Seulaweuet saleuem tanyoe ucapkan
Keupada Janjongan saidil Ambiya
Deungon Bismillah lon puphon kalam
Lakee bak tuhan beutrok banpinta
Lon keumeuk tuleh habeh Ramadhan
Dalam rangkaian meu uroe raya
Geutanyoe bandum ummat Islam
Cok kemenangan lheuh tapuasa
Prediket suci neubri le Tuhan
Kasuci badan beserta jiwa
Geutanyoe kagleh wahe e rakan
Nibak geuratan noda ngon dosa
Ban bayi lahe dapat gelaran
Meunan tamsilan wahe syedara
Tingkatkan amal uroe ngon malam
Watee sembahyang beugot tajaga
Tapubuet suroh peujioh larang
Nyang kejahatan bek takeurija
Tanyoe jigoda mumacam-macam
Lewat makanan miseue narkoba
Dimuda-mudi inong ngon agam
Rot pergaulan cukop bahaya
Oleh sebabnyan mari ya taulan
Tapertahankan bek sampe cupa
Bek keunong tipee bak iblis syaitan
Keunong rayuan bak manusia
Hudep lam donya mita amalan
Buleuen Ramadhan tanyoe puasa
Meunyo tapubuet lagee aturan
Neubri balasan asoe syuruga
Ohnoekeuh mantong bacut lon nazam
Geulantoe timphan kolom menara
Meunyo na umu tuhan bri panyang
Oleh:Ust.M.Kasim Yahya,S.Ag
Lamgugob,13 Agustus 2013
=====================================
0 komentar:
Posting Komentar