"5 BOEH MAKSIET YANG SIGRA GEUBALAH LEE ALLAH"

==================================================
Assalamu'alaikum, wareh syedara
Tuha muda, inoeng ngoen agam
Tapujoe Allah, tiep-tiep kutika
Geutanyoe hamba, nyan kewajiban

Seulaweut Saleum, bek sagai lupa
Akan Baginda, Nabi nyang khatam
Ateuh sahabat, dan keluarga
Seupanyang masa, neubri ya Tuhan

Pabrek seumen, di Aceh Raya
Aceh Utara, PIM hai rakan
Ibnu Majah, nyang rawi haba
Hadist sayyidina, Sabda janjongan

5 boeh maksiet, geubalah sigra
Hana Geutunda, meutalakukan
Peureutama phoen, soe yang meuzina
Seucara nyata, teurang-teurangan

Allah geubalah, keu-nyan Hamba
Tha'un jirasa, keupeumbalasan
Peunyaket laen, tamah lom sigra
Nyang hantom teuka, yoh sigoehloem nyan

Nyang kedua, peukureung neuraca
Atau syedara, kurueng timbangan
Meunyan pih  bala, Nabi Meusabda

Meukhueng jiteuka, raseuki pih tan

dan lom Geutamah , deungon bala
Lalem penguasa, tan keadilan
Teuma nyang keu-3, Nabi Meusabda
Nyang meuharta, zakeut jiboeh tan

Han Neubri  hujeun, sipanjang masa
Mangat jirasa, balasan Tuhan
Meukon na binatang, ateuh rhueng donya
Hujeun han teuka, berkelanjutan

Nyang ingkar janji, keupuet peukara
Allah bri kuasa, keumusoeh awak nyan
Akan Jireuboet, seubagian harta
Lee miskin-papa, nibak masa nyan

Keu limoeng maksiet , bak Penguasa
Hukom yang jiba, kon ban  aturan
Kiban meuheut droe, ka jilaksana
Jeuoh that beda, deungon Al Qur an

Juet  prang saudara, Allah bri bala
Aman sentausa, chiet ka teunte tan
Ureung lam nanggroe, lam haroe hara
Le  manusia, yang jeut keukorban

 Meunyoe tapubuet, limoeng  perkara
Teunte  tarasa, balasan Tuhan
Hudep geutanyoe, sabe lam bala
Meunan sayyidina, kalhueh  meukalam

Jinoe ci pike , wahee syedara
Banbandum bala, peuka ta-rasakan
Meusoe teulanjoe, ka neukeurija
Taubat sigra, lakee amponan

Meumada ohnoe , haba lon rika
Hadis Saidina, janjongan alam
Peumeu'ah ulon, Pat na cupa

Peubeutoi sigra, patna salahan

( Banda Aceh, 18 Oktober 2013 )