AL-MUZZAMMIL (UREUENG MEUSEULIMBOT)

========================================
Ngoen Nama Allah,  lon puphon surat
Tuhan Hadharat,  nyang Maha Murah
Tuhanku sidroe , geumaseh that-that
Donya akhirat , rahmat Neulimpah

Hai gata ureueng,  nyang meuseulimboet
Beudoeh lam seupoet,  tajak munajah
Takeubah malam,  mantoeng meubacut
Siteungoeh pih jeuet,  mantoeng takeubah

Atawa kureueng,  nibak nyan bacut
Tatamah pih jeuet,  tabeuet qira-ah
Tabeuet Qur'an,  keunoeng makheuroet
Lon meubri nyang goet,  narit brat leupah

Meu tabeuet malam,  mesra jitamoeng
Teupat ngoen keunoeng,  tabeuet qiraah
Meu tabeuet uroe,  gadoeh that gata
Panyang keurija,  mita napakah

Teuma taseuboet,  nan Tuhan gata
Ibadat gata,  khuchu' keu Allah
Tuhan keuh nyang Po,  timu ngon barat
Kon Tuhan meuhat,  meunyo kon Allah

Bak Tuhan gata,  talakee lindoeng
Peue-peue nyang jikheun,  saba that leupah
Tapeujioh jih , deungon cara goet
Tinggai lon meuhat,  ngon jih nyang salah

Jikheun sulet dum,  peue-peue nyang takheun
Nikmat keu jih nyan,  ka le that leupah
Tayue meutanggoeh,  bak jih nyan siat
Bak  kamoe azeub,  ka lheuh meukeubah

Rante nuraka,  keu jih nyan meuhat
Makanan jih that,  tutoeng sileupah
Meuceukiek reukueng,  han ek takarat
Azeub peudeh that,  hanaban peugah

Bumoe ngoen gunoeng,  uroe nyan anco
Gunoeng teupiroe,  jipo dum bicah
Ka kamoe kirem,  rasul bak gata
Keu saksi gata,  beuna ngon salah

Saban ngon dilee,  ka kamoe kirem
Ubak Peura'un,  pih hana ubah
Meukirem rasul,  ubak Peura'un
Karna  pira'un,  maksiet that leupah

Jibantah rasul,  han jitem pateh
Meusiksa treuk jih,  teuma brat leupah
Pakri teuma,  droeuteuh taplihara
Uroe nyan teuka,  takheun hana sah

 
Uroe nyoe puteh , dum ok aneuk miet
Dumnan keuh meugriet,  hanaban peugah
Gata takaphe,  akan uroe nyan
Langet meuguncang,  Neubri le Allah

Janji Tuhanku,  han jeuet han teuka
Anco binasa,  langet dum bicah
Keubit atra nyoe,  jeuet keu peuingat
Barangsoe hajat,  jijak bak Allah

Jalan Po jih nyan,  nyang jijak mita
Keubit Po gata , Neuteupue sudah
Neuteupue gata,  malam tabagi
Dua boh bagi,  tatueng phaedah

Nibak lhee bagi,  tacoek dua boeh
Bacut hana troeh,  tangui keu jatah
Goet pih tabeudoeh,  siteungoh malam
Bagi lhee malam,  tabeudoeh sudah

Ngon rakan gata,  nyang sajan gata
Sit ka Neukada,  bandum le Allah
Han ek takira , Tuhan Neuteupue
Malam ngon uroe,  urusan Allah

Toubat dum gata,  Tuhan teurimong
Tabeuet beu keunong,  peue-peue nyang mudah
Peue-peue nyang mudah,  tabeuet Qur'an
Hana Neuparan,  gata le Allah

Neuteupue gata,  ladom nyang saket
Ladom jiteubiet,  mita napakah
Lam bumoe Tuhan,  jijak keurija
Jimeung jak mita,  karonya Allah

Teuma seumbahyang,  ngon taboeh zakeut
Meunan lom tabeut , peue-peue nyang mudah
Peu utang Tuhan,  deungon buet nyang got
Tapubuet nyang got,  keudroe teuh bagah

Peue nyang tapubuet,  cit na balasan
Neubri le Tuhan,  keu gata upah
Raya that Neubri,  pahla le Tuhan
Talakee ampon,  laju bak Allah

Keubit bit Tuhan.  Maha Pengampon
Lagi  ilahon ,  Maha Pemurah

====================================