"PERINGATAN ISRA MI'RAJ"

Meukrue seumangat, wahee syedara
Katroek teuka ULTAH seumbahyang
27 Rajab singoh syedara
Soe nyang puasa lee keuleubehan

Harapan kamoe admin PANAH raya
Para anggota ban seuleungkapan
Neutiek karangan nyang meu tema
Nabi neu-Isra ‘oh watee malam

Ca-e tapeugot lagee biasa
Buhu neurika meubaet sinan
Teumpat mengarang sinoe hai syahra
Laju beu sigra ca-e neulayang

Postingan laen keu seumentara
Han kamoe buka harap keumakluman
24 jeum lagee nyoe rupa
Lagee biasa lewat watee nyan

Silahkan tiek karangan di sinoe

  Tgk Diyueb Bruek

“ Maha Suci Allah, yang telah Memperjalakan  HambaNya pada suatu malam dari masjidil Haram ke Al-Masjidil Aqsha yang telah kami  Berkati sekelilingnya agar kami perlihatkan  Kepadanya  sebahagian dari tanda  tanda kebesaran kami ,sesungguhnya Dia adalah Maha mendengar lagi Maha melihat.

( Qs Al-Isra   1 )

  

“ Israk Mikraj ‘

==========================

Alhamdulillah, lon pujoe Tuhan

Yang peujuet Alam, Ban sigoem Donya

Bandum lat batat, peuneujuet Tuhan

Yang peuna peutan, Raseuki keu Hamba

Seulawuet saleum, akan janjongan

Pang ule Alam, Saidil  Mustafa

Nabi yang akhe, Akhirul Zaman

Rasul pilihan,  Khatam Ambiya

Jinoe saleum lon, keu bandum rakan

Dalam Grup Nazam, Tuha ngoen Muda

Jeuoh deungoen toe, inoeng ngoen Agam

Jamak sapaan, hana lon beda

Gantoe ulon bri, kupi ngoen timphan

Saboeh karangan,  nyoepat ulon ba

Yoeh Masa  Mikraj, janjongan  Alam

Jak tueng Seumbahyang, keupada hamba

Lam surat Israk,  Fireuman  Tuhan

Neubaca sinan, nibak ayat  sa
Nabi beurangkat, bak wate  malam

Mesjidil Haram, ke Mesjidil Aqsha

Jibril peusuci, tuboeh janjongan

Peurintah Tuhan, Azawajalla

Yoeh goe meuhadap, Nabi ngoen Tuhan

Ka suci Badan, Rasul Mustafa

Ngoen kandran buraq, Nabi berjalan

Ceupat teureubang, ban kilat  paja

Binatang syuruga, peutroen le Tuhan

Jibril sajan, sampeng  saidina

Mesjidil Aqsha, sampoe janjongan

Yoeh goeh berjalan, Sirantan Muntaha

Dua rakaat, seumbahyang  sinan

Makmum hai rakan, bandum Aulia

Deungoen Jibrail, Nabi berjalan

Hingga troek keunan, Siratan Muntaha

Nabi neukalon, meubagoe macam

Lam perjaalanan, le that pristiwa

Bah kali laen, lon karang bahnyan

Lam perjalanan,  Miraj  Maulana

Nibak jibrail, tanyoeng janjongan

Meubagoe macam, sudi pristiwa

Siratan Muntaha, Nabi Troek keunan

Marit le rijang, le  jibraila

Wahe Muhammad, Geunaseh Tuhan

 Ohnoe batasan, lon  dampeng gata

Keudeh hanjuet le, ulon berjalan

Gata ngoen Tuhan, hanjuet le hamba

Hana neu izin, ulon le Tuhan

Hajuet berjalan, malingkan gata

Nabi beurangkat, sidroe berjalan

Meunghadap Tuhan, Azawajalla

Wallah bi sawab, hantroek tanyoe pham

Hijab le Tuhan, bandum  neubuka

Nabi  peu Esa, sit  sidroe Tuhan

Syahdat disinan, Awai phoen mula

Nyan Syahdat Allah,  Ucap janjongan

Fireuman Tuhan, Syahdat  Saidina

Bandua Syahdat, Mula phoen sinan,

Wate Janjongan, hadap yang Esa

Bak wate Mikruj, jatueng seumbahyang

Peurintah Tuhan, U atueh hamba

Maka  geutanyoe, jinoe hai  rakan

Wate seumbahyang, wajeb tabaca

Ban dua  Tahyuet , tabaca  sinan

Syahdat duanyan , sinan phoen mula

Lhueh peurintah, fireuman  Tuhan

Atueh janjongan ,seureuta  hamba

Tuhan peuwajeb, akan seumbahyang

Umat janjongan, limoeng ploeh kutika

Nabi neugisa, neuwoe le rijang

Meurumpok  sinan , ngoen Nabi  Musa

Musa neusudi, nibak  janjongan

Peurintah Tuhan, taci calitra

Nabi neupeugah, peurintah seumbahyang

Atueh janjongan, ngoen umat  dumna

Limoeng ploeh wate,  Tuhan teutapkan

Musa Masanyan, ka neuyue  gisa

Yue lake kurueng, ka  nibak Tuhan

Supaya ringan, bek brat keurija

Padum goe gisa, meu ulang ulang

Male meunyuem sang, rasul mustafa

 Sit limoeng wate,  tinggai seumbahyang

Atueh janjongan, ngoen umat  dumna

Tapi fahala , saban bandingan

Neubri  le Tuhan, limoeng ploeh kutika

Bacut lon wasiet, keu bandum Rakan

Soal  seumbahyang,  tiang  Agama

Peurintah  langsoeng, nibak janjongan

Hana  hai rakan, ngoen peurantara

Menyoe yang laen,  peurintah Tuhan

Jibrail hai rakan, peusampoe khaba

Meu lewat wahyu, jibrail  sampaikan

Meunyoe seumbahyang,  tan peurantara

Sidumnan peuteng, soal seumbahyang

Nabi neu undang, oleh  Rabbana

Neujeumput keudroe, langsoeng bak Tuhan

Maka jih rajan, bek sagai lupa

Oh uroe dudoe, sideh di Mizan

Yang phoen seumbahyang,  Allah  pareksa

Meunyoe ka leupah, teuntang  seumbahyang

Mudah mudahan,  bandum seujahtra

Israk  Miraj, ohnoe lon karang

Singoeh laen jan, tasamboeng teuma

Meunyoe na salah, Peumeuah Rijang

Keudeh Bak Tuhan, Ampon lon pinta

( Tgk Diyueb Bruek, 27 Ra’jab  1434- 05/06/2013)

Agam Sidroe

Deungoen Bismillah, yang meusifeut Rahman,,
Pencipta 'alam, langet ngeon donya,,
Maha di Raja, yang Po seukalian,,
Uroe ngeon malam, Allah yang jaga,,

Didalam rika, haba peuneusan,,
Peuingat diri loen tuan, rakan semua,,
Seun-seun sibanja, uloen uraikan,,
3 boeh keujadian, dithee le donya,,

27 Rajab, hijriah bilangan,,
Macam keujadian, takaleon nyata,,
Koen pura-pura, haba rikaan,,
Dalam Al-Quran, sinan neu baca,,

Peristiwa utama, wahe e rakan,,
Dalam Al-quran, surah Al-Israa,,
Ayat peurtama, sinan neujeulaskan,,
Allah perjalankan, Rasul Mustafa,,

Na keuh perjalanan, 'oeh watee malam,,
Dari Masjidil Haram, ke Masjidil Aqsa,,
Ke sidratul muntaha, teuma 'oeh leuhnyan,,
Neu teurimoeng seumbahyang, dari Allah Ta'ala,,

Macam teujadi, nibak watee nyan,,
Meunye loen jeulaskan, panyang ceurita,,
Bahle loen rika, Nabi lam cobaan,,
Seugolom badan, u sidratul munthaha,,

3 boeh peuristiwa, Nabi lam cobaan,,
Khadijah sajan, neuwoe bak Allah Ta'ala,,
Seudeh neurasa, di Rasul Tuhan,,
Oreung neu sayang, awai neu bungka,,

Teuma keudua, meuninggai paman,,
Dalam keubeunaran, sabe neu bela,,
Tuboeh ngeon jiwa, bela perjuangan,,
Rasul diTuhan, sabe neu jaga,,

Ureung nyoe dua, neuwoe bak Tuhan,,
Thoen 10 keunabian, Rasul Mustafa,,
'Oeh leuh nyan Nabi, langsoeng loem lam kerjaan,,
Neu ba ajaran, u thaif nama,,

Sinan peristiwa, seudeh hanaban,,
Hana bantuan, bani Tsaqif nama,,
Sehingga gagal, nabi ba ajaran,,
3 boeh keujadian, yang memilukan dada,,

Oleh seubab nyan, utusan Tuhan,,
Nabi Neu hiburkan, yang luar biasa,,
Meu soe-soe hamba, keunoeng undangan,,
Nabi Shallallahu'alaihi wassalam, meunyan keuh hamba,,

27 rajab 583 hijriah, saboeh seujarah sangat mengagumkan,,
Peristiwa pembebasan, Al-Quds kota,,
Shalaahuddiin al-Ayyubi, sang sultan,,
Bentuk peperangan, terhadap penguasa,,

Sidroe raja, nibak masa nyan,,
Lam kekerasan, diduek lam kota,,
Kaum salibis, meunan panggilan,,
Dalam kedzaliman, rakyat diseksa,,

Buet si uroe, dipoeh ureung islam,,
Di aneuk badan, dipisah ngeon ma,,
Laju diseksa, meusoe jum'atan,,
Keu keuhormatan, dipakoe hana,,

Cukoep meubeda, deungoen sang sultan,,
Shalahuddin Al-Ayyubi, cukoep bijaksana,,
Ngoen hate mulia, rakyat neu bebaskan,,
Hana pemaksaan, rakyat neu bela,,

27 Rajab 1342 Hijriah, dalam seujarah memilukan islam,,
Kheundak Tuhan, awal beuncana,,
Mustafa kemal, yang mat pimpinan,,
Di turki hai rakan, di atoe reuncana,,

Paham liberal, ka diajarkan,,
Peradaban islam, dipeugadeoh teuma,,
Sistem khalifah, ka dihancurkan,,
Sinan keuh mulaan, khalifah ka tinggai nama,,

Langkah2 kemal laknatillah, rame yang menirukan,,
Termasuk sekuler islam, soekarnoe indonesia,,
Maka waspada, e wahe rakan,,
Bek sampe meu aturan, iblih panglima,,

Uloen peumada, wahe e rakan,,
Etnoe keumampuan, izin Rabbana,,
Haba meuguna, neu penyum paban,,
Yang bersalahan, neu tiek lam paya,,

Pat salah kata, dalam rikaan,,
Mohon kema'afan, sebesar-besarnya,,
Bek sampe meudosa, ka deungoen Tuhan,,
Saket that badan, 'oeh tinggai donya,,

Haba lam rika, cuma sekian,,
Laju wassalam, akhirul kata,,
Bandum yang beuna, toek sidroe Tuhan,,
Teumpat keusalahan, sinoe bak hamba,,
Muhammad Asri (mudas) 

 Musliem Barcelo Nakata

=============================
Si gala pujoe,keu sidro Rabbon
Yg maha agong,lagi lom ade
Seulaweut saleum,wajeb ta junjong
Geutanyoe sanjong,keu Nabi akhe

Keumandum rakan,kuta ngen gampong
Salam'alaikom,ulon jok sare
Sambot beu bagah,saleum dari lon
Bek sampe puntong,saleum meu uke

Hajat lam hate,meuheut that ulon
Neuk karang panton,ube na ase
Lon lake meu'ah,dile awai phon
Kadang syit puntong,haba lon rante

Kadang panton lon,tan muhoe ujong
Tulong neu maklom,rakan boh hate
Maklum di ulon,aneuk miet duson
Hana that meufom,nibak meu ca'e

Haba yg pokok,laju lon sambong
Sumbah keu Rabbon,yg Nabi lake
Mukjizat Nabi,teukeudi Rabbon
U langet lambong,lam siklep wate

Limong ploh wate,dile geujok phon
Geu anggok lansong,oleh pan ule
Kunoe u donya,Nabi ju geutron
Neuk peugah langsong,bak kawom dile

Di Nabi Musa,laju geutanyong
Seumbah keu Rabbon,padum boh wate..?
Laju Muhammad,neu jaweub lansong
Ulon teurimong,limong ploh wate

Di Nabi Musa,teukeujet langsong
Pakon ju neutron,wahe pang ule..??
Geuyeu balek lom,keudeh bak Rabbon
Yue kureung lansong,limong ploh wate

Wahe Muhammad,meu'ah keu ulon
Han ek di kawom,si dumnan wate
Pajan keurija,jak mita untong
Golom geutamong,katroh lom wate

Sidom kawom lon,yg raya kitong
Bot jaroe lansong,meu'ah di lake
Peulom di Gata,yg ubeut kawom
Ka teunte langsong,sempit that wate

Laju geubalek,di Nabi langsong
Keudeh bak Rabbon,kureung geulake
Sikreureung goe balek,mnye ta hitong
Oeh akhe ujong,jeut limong wate

Laju geu dakwah,u gampong-gampong
Sumbah keu Rabbon,limong boh wate
Na yg meu bantah,na anggok langsong
Seubab di kawom,meumacam lage

Di abu lahab,yg ejek yoh phon
Geukheun keu Saidon,ka saket ule
Haba han mgken,kunoe geu peutron
U langet lambong,lam siklep wate

Dakwah di Nabi,teutap geulansong
Keumandum kawom,mandum geubri the
Hana peuduli,keu preman gampong
Adak di ong-ong,le lahab seude

Alhamdulillah,katroh meuheut lon
Kalheuh lo suson,sikrek dua lhe
Beujeut manfa'at,karangan ulon
Keu mandum kawom,yg na lam jure

Ohno meumada,wahe rakan lon
Singeh ta sambong,pajan na wate
Mnye na salah,haba lon panton
Keumandum kawom,meu'ah lon lake

Akhbar Al-Mutawassila

========================

Isra Mi'raj, saboh peristiwa
Mukjizat Baginda , Nabi yang Khatam
Geumeureumpok, deungon Rabbana
Geujok Ash-Shalata, jeut keuwajiban

Beuna tingat, wahee syedara
Bek mudah saja, tanyoe abaikan
Singoh uroe, meunyoe kuasa
Tanyoe puasa, harap ridha Tuhan

Dalam Mi'rej, adalah baginda
Lee peristiwa, dum lahee sinan
Sangat Ajaeb, leumah nyata
Tanda kuasa, sifeut Ketuhanan

Nakeuh Nabi, didalam isra
dari Alam nyata, geuperjalankan
Sampoe troek, Sidratul Muntaha
Ruhani juga, berperan sinan

Geutanyoe, watee shalata
Peu keuh atra, tanyoe Mi'rejkan
Bek lagee ureung, baca mantra
Seunam juga, arti gerakan
# ASH SHALATU MI'RAJUL MUKMININ

  Saffir Kelana

Dawa-dawi langet ngon bumoe
(pra isra' mi'raj)
====================================
Assalamu'alaikom,warah matullah..
Saleum lon limpah keu gure ngon taulan...
Saboh calitra uloen neuk kisah..
Gure peumeu ah nyoena khifan..

Alhamdulillah,nibak phoun kalam..
Pujoe keuTuhan,azza wajalla..
Ateuh rahmat ,nyang poe curahkan..
Syukor hai taulan bek sagai lupa...

Rahmad seujahtra,ateuh janjongan...
Rasul khatam,panghule nabi..

Al-kisah dawa, langet dengon bumoe..
Meupegah2x droe,paleng mulia..
Langet bit cangklak,jikheun bak bumoe..
Mulia that lonnyoe, bandeng ngon gata..

Seu ot bumoe, laju ngon rijang..
keubit that lancang,langet meuhaba..
peusebab langet ,tutoe teuh meunan..
Peugah rijang, dali pih beuna..

Jiseu ot langet, sira teukhem.
Wahe dzalem,bouh dingoe haba..
Mata uroe,bintang ngon buleun..
Bak lon nyan mandum, bak gata hana..

Alahai langet jiseu ot bumoe..
nyan mata uroe, gata peu bangga..
Takalon gunong,ateuh rueng lonnyoe..
Pasie meu anoe, laot sigala..

Keubit bakoe,gata hai bumoe..
Dengoen ulonnyoe,beuhe meudawa..
Laukhmahfudz a'rasy,mandum disinoe..
Malaikat bak lonnyoe,pujoe rabbana..

Bandum hai bumoe bak lon meusahoe..
Takaloen keudroe, bak gata hana..
Meunan keuh tutoe, langet bak bumoe..
Mangat that asoe,jiteuka bangga...

Teuma jiseu ot bumoe oh lheuhnyan..
Bak langet manyang ,meuno jipeugah..
Maleikat mandum,meusapat sinan..
Bak langet manyang, sabe ibadah..

Tapi na sipu ,hai langet beu ingat..
Nabi muhammad hana bak gata...
A'rasy louhmakhfud dum malaikat..
Karna muhammad Allah neucipta..

Hana uloen, hana pih gata..
Hana sigala Allah neupeujeut...
Mandum kerna, Muhammad rasulla..
Teupu le gata, wahe e langet..

Langet habeh su,gadoeh guransang...
jideungoe kalam,nibak bumoe...
Jiteuka seudeh ,weuh ngon bimbang..
Muhammad nyan,hana bak lon nyoe...

Keubit seudeh,meucureh hate...
Langet pike, akan muhammad..
Sira jiklik,raya bukenle..
Langet meulake, nibak hadharat..

Ya Allah tuhan yang ade..
Seudeh that hate,bukenle wayang...
keu nabi Muhammad,rasul yang akhe...
Rindu that hate,nging rupa badan...

Bouhka hai langet neukheun le Tuhan..
Muhammadnyan,lon rafa' bak gata...
Bah takaloen,muhammad rupawan...
Ngak na puasan, dihate gata...

Maka bak 27 buleun ra'jab..
Nabi neu isra', ulanget teuka...
Meunan calitra nyang ulon lakap...
Uloen meuharap, ek jeut meuguna...

Meunyoe na kureng, neutamah ee gure...
nyoe salah teunte, tgk peubeuna...
Neumaklum keuh lon, paneuk ileume...
bak merika hai gure, lon coba-coba...
(Saffir kelana)  06-06 -2013

 Alhadi Andika

*Mumaddimah*

===================
alhamdulillah lon pujoe allah.
nyangka neu limpah, rahmat keu hamba.
seulaweut salem keu rasul allah.
nyangba risalah, ateuh rueng donya.

salam "alaikum rakan lam panah.
tajalen ukhwah, taloe syedara.
keu bulen rajab mi'raj rasulullah.
lon cuba kisah, riwarat lon ba.

kisah lon dingoe ka nibak dakwah.
haba geupeugah, oleh syaikhuna.
meu sambong-sambong ulon meu kisah.
maklum meutuah, laptop lon hana.

tgk perati pattoh na salah.
peubeutoy bagah, nyang ulon rika.
ulon tan bakoe dalam meukisah.
aneuk miet mirah, ileume hana.

buhu ngoen pakhok meu ubah-ubah.
lon lake meu'ah, gura lagoina.
hana lon teu'oh bahasa luah.
kata nyang ceudah, jahe andika.

memada etnoe, lon mukaddimah.
jinoe lam kisah, lon tamoeng sigra.
kisah lon suson, meupisah-pisah.
lon lake meu'ah kadang na cupa.

na lhe boh bulen, neu mulia allah.
kepada ummah, ateuh rueng donya.
nyang phoen rajab syahru di allah.
bulen rasulullah, sya'ban nama.

bulen ramadhan bulen di ummah.
meulimpat rahmah, kepada hamba.
lhe bulen nyoe pahla geutamah.
ka oleh allah, nyang poe kuasa.

bulen rajab troeh ta peugleh tuboh.
sya'ban tgk beh, ta peugleh hate.
bulen ramadhan, ibadat beu teugoh.
hate ngoen tuboh, jiwa suci le.

kalimat rajab lhe boh haraf.
ulon ci surah, hikmah dalam nya.
huruf RA rakan makna jih RAHMAH.
neubi leu allah, rahmat meuganda.

JUMURUL ABDI makna nyang luah.
huruf JIM teuhah, di sinan punca.
dosa neu ampon ka oleh Allah.
meusoe nyang ikhlah, taubat di hamba.

teuma huruf BA akhe kalimat.
makna tersirat, BUKHRON keu hamba.
bulen kebaikan nyankeuh faedah.
ganda leu allah, amal di hamba.

Ra Jim Ba Rajab, bulen di allah.
pubut ibadah, ta lipat ganda.
bulen kebaikan serta rahmat.
ampon hadharat, dosa di hamba.

faedah rajab ka lheh meu surah.
jinoe lon kisah, laen cerita.
yoh goh neu mi'raj rasul di allah.
na padup kisah, akan lon rika.

Duka Rasul Dan Langet *

=======================
yoh goh neu mi'raj di rasul allah.
bagoe musibah, rasul neu rasa.
kejadian duka, hate sang bicah.
karna khadijah, meninggai donya.

istri tercinta neuwoe bak allah.
ureng nyang papah, suka dan duka.
teuma oh lheh nyan, sambong musibah.
neucok le allah, paman tercinta...

di abi thaleb paman nyang gagah.
reula roe darah, nabi geu bela.
insan tercinta neuwoe bak allah.
keubiet meudarah, hate saydina...*

*yoh goh neu mi'raj nabi geutanyoe.
langet ngoen bumoe, ka di meudawa.
di kheun leu langet ka nibak bumoe.
leubeh ulon nyoe, ka deungon gata

gata di miyup ulon di manyang.
bulen ngoen bintang, nibak ulon na.
di mata uroe, karonya tuhan.
bak ulon tuan, bak gata hana.

di seu'ot bumoe laju le legat.
lebeh that pangkat, ulon ngoen gata.
gunoeng ngoen laot, geudong meu tingkat.
bak lon meusapat, bak gata hana.

ka'bah baitullah suci that tempat.
arah menghadap, pujoe rabbana.
mandum manusia keunan meusapat.
qudrah hadharat, bak gata hana.

langet di seu'ot laju le legat.
lebeh lon pangkat, meunyoe ngoen gata.
arasy kurusy kalam malaikat.
bak lon meusapat, bak gata hana.

laju di seu'ot ka uleh bumoe.
leubeh ulon nyoe, ka deungoen gata.
na sipu nyang na nibak ulon nyoe.
jinoe ka dingoe, ulon peu nyata.

hana meu arti arasy ngoen kalam.
bulen ngoen bintang, hana hareuga.
nabi muhammad rasul pilihan.
bak ulon tuan, bak gata hana.

sangkira hana rasul mustafa.
keubiet keuh hana mandum ata nyan.
lebeh lah pangkat, ulon ngoen gata.
sebab mustafa, bak ulon tuan.

langet ka taloe, ka male keudroe.
laju ka dimoe, ngoen ube raya.
nibak po tallah di meungadu droe.
ulanget sigoe, beuna mustafa.

langet yu peu'ek nabi geutanyoe.
nibak sidroe poe, langet meminta.
allah neu janji hajat peu sampoe.
hana leu dimoe, langet bahgia.

dua ploh tujoh, tanggai hijriah.
lam rajab meugah, mi'raj terjadi.
allah neuhibur hate habibah.
serta geu peuglah, langet geu janji.

nibak malaikat allah perintah.
jak cok rasulullah, yuba bak rabbi.
saboh kendraan neujok le allah.
buraq nyang ceudah, bak kilat lari.

oh lheh neu dingoe perintah allah.
berangkat bagah, geujak tung nabi.
jibril mikail ngoen buraq ceudah.
bak rasul allah, sigra peuregi.

wate lheh isya haba lam kisah.
bak rasul allah, geutroen jibra'i.
nibak mon zam-zam geuba rasulullah.
dada geubedah, oleh jibra'i.

dengoen ie zam-zam hate ka geurah.
di rasul allah, hate ka suci.
oh lheh nyan teuma laju neu langkah.
ateh buraq ceudah, geuduk di nabi..

nabi neu isra' perintah allah.
dr mukarramah, tempat di nabi.

dalam perjalan neu piyoh siat.
di yasrib meuhat thayyibah negri.
sinan neupiyoh sembahyang sunat.
lheh nyan berangkat, lanjut lom nabi.

na siklep perjalan piyoh lom siat.
sembahyang sunat, di bukit tursina.
tempat meukalam musa ngoen allah.
lheh nyan langkah, lanjut saydina.

lheh nyan neu piyoh, di baitul lahmi.
tempat maulidi nabi nan isa.
lheh sembahyang, berangkat nabi.
laju pergi u masjidil aqsa.

sinan di nabi sembahyang sunat.
serta malaikat, ngoen para nabi.
nabi sembahyang neu pujoe allah.
al hanifiyyah syariat ibrahimi.

*tamsilan*
=================================
masa neu isra' rasul panghule.
sinan na lahe, tamsilan hamba.
nyang phoen neukalon nyang gulam kaye.
han ek geupangke, geutamah lanja.

kaye nyang ubiet han ek geupangke.
geutamah kaye, nyang leubeh raya.
sabe geutamah kaye lam pangke.
hingga panghule, hireun di mata.

nabi neutanyoeng nibak jibra'i.
pakoen insani meunan that cara.
teuma neuseu'oet uleh jibra'i.
yg nyan hay nabi, tamsilan hamba.

ummat di gata wahay muhammad.
nyang cukop tamak, pangkat di rihoen.
hana di syukur pada hadharat.
pangkat di karat, han ek di tanggong.

teuma neukalon uleh panghule.
ureung koh pade, dalam blang raya.
pade ka geukoh laju timoh le.
meunan keuh sabe khendak rabbana.

jibril neu surah bak rasul allah.
nyankeuh di ummah, nyang beu bahgia.
ummat di gata nyangtem sedekah.
pahla geutamah rizki geu ganda.

meuhat oh lheh nyan na laen bagoe.
na sidroe binoe, umu that tuha.
pakaian that ceudah bak tuboh binoe.
indah sang lakoe binoe di raja.

nabi neutanyoeng nibak jibra'i.
soe nyan hay akhi, laen that rupa.
pakaian badan indah han sakri.
tapi di wajhi umu that tuha..

tamsilan donya seu'ot jibra'i.
umu that lawi, wahay saydina.
hiasan donya indah han sakri.
tapi umuri keubiet that tuha.

oleh sebab nyan wahe e rakan.
ta pujoe tuhan, sedekah beuna.
bek that ta laloe deungoen jabatan.
singoeh hay rakan, meunyesal gata..
wallahu a'lam  Alhadi Andika.
09-06-2013 malaya.