“ TGK.DIYUEB BRUEK “ DI MATA FACE BOOKERS

1. GRUP MUPRANG LAM PANTOEN DAN

2. GRUP PANTOEN, NAZAM DAN HIKAYAT ACEH

====================================================

1.      Musliem Barcelo Nakata

   2.   Akhbar Al-Mutawassila

 3.  Agam Ranto

   4.  Airi Safrijal

   5.  Gunawar Al-Ayubi

   6, Mudas

   7, ASRA –AL KASMI

 

”Asai  Tgk Diyueb Bruek ”

===========================

Asai dan Alamat dilee bak Aras Allah,dudoe geukeubah lam sulbi bapa, lheuhnyan geusinthoeng geubri Arwah, sinan geukeubah dalam pruet poma, ohlheuhnyan lahe lam bumoe Allah,sinan mula sah loen klik that raya,takoet keu dosa meulanggar sumpah, janji ngoen Allah yoeh Kulu bala

 

“TGK.DIYUEB BRUEK” PEUTURI  DROE “

================================

Ngoen kru  seumangat,rahmat Tuhan bri

Yang maha Suci, Azawajalla

Seulaweut saleum, ohlhuehnyan lagi

Pang ule  nabi, Rasul Mustafa

Neubri Tuhanku, beutroek  hajati

Lon  neuk peuturi, aseuli  nama

Tgk diyueb bruek, lon neuk peuturi

Nama aseuli, serta  gampoeng   ma

Tgk diyueb bruek,  samara  geubri

Sulaiman.A.Gani, nama  sibeuna

Di samalanga, nyan gampoeng  ummi

Nyan gampoeng  abi, di jangka buya

Di Banda Aceh, berdomisili

Rumoeh  tsunami, bantuan  lua

Seujak  uroenyoe, maklumat  lon bri

Nama  aseuli, ka lon peunyata

Lon robah profil, gamba  aseuli

Mangat  neuturi, nama  sibeuna

Jampang meurumpok,disana  sini

Meuka  neuturi, kajuet  neusapa

Kajuet  neuhoi  nan, tegoran  neubri

Ngat  tameuturi, samboeng  saudara

lam  donya  nyata, sirahturrahmi

ya  Allah  neubri, beutroek  ban pinta

lam  donya  maya, tanyoe  meuturi

beujuet  Allah bri, lam  donya  nyata

beujuet  saudara, samboeng  family

beujuet  Allah  bri, lage  saboeh  ma

Tgk diyueb bruek, lake  permisi

Selama  ini, mungken  na cupa

Mungken  na salah, meuah  beuneubri

Sulaiman,A.Gani, geugantoe  nama

( Tgk Diyueb bruek  tgl, 12 Juni  2013

 

1. Musliem Barcelo Nakata

                                                                            

“ Tgk Diyueb Bruek  Gure Lon Tuan “
=============================
Sigala pujoe,keu sidroe Tuhan
Yang peujuet alam,ban sigoem donya
Yang peujeut langet,hana meutiyang
Yang peuna peutan ,lat batat dumna

Seulaweut saleum,ateuh janjongan
Pang ule alam,khatam ambia
Nabi yang akhe,Rasul Pilihan
Peujuang islam, Rasul Mustafa

Saleum lon kirem,keu mandum rakan
Inoeng ngoen agam,tuha ngen muda
Hana meubeda,duson ngen peukan
Dalam grup meuprang,admin anggota

Hajat lam hate,nibaknyoe malam
Keu sidroe insan,cuba lon rika
Tgk Diyueb Bruek,nama samaran
Tgk Sulaiman, nama seubeuna

Rab leubeh lhe thoen, kamoe keunalan
Lewat fesbukan,kamoe meusyedara
Kamoe meuturi,dalam grup Nazam
Sinan mulaan, wahe syedara

Hingga sa'atnyoe,ka krap hubungan
Ban adek abang,di kamoe dua
Bah pih u rumoh,golom lon datang
Tapi hubungan, lage saboh ma

Le that ileume,keulon geu tanam
Seureuta peusan ,jai that keu dinda
Awai di ulon,hanjeut keumarang
Tanjeut lon rupang,meu saboh banja

Kadang lon tuleh,tan meuhoe uram
Kadang hai rakan, tan meuhoe punca
Teutapi jinoe,bacut ka reumbang
Kajeut lon karang, meu dua banja

Walau panton lon,gura hana ban
Tapi hai rakan,mangat ta baca
Walau tan arti,panton lon tuan
Teunte han saban, ngoen gure rika

Han ek lon balah,jasa bak abang
Hingga lon tuan, lage nyoe rupa
Ilme yang neubri,ngoen hate seunang
Sudi that abang, peurunoe dinda

Do'a dari lon, lake bak Tuhan Tuhan
Tgk Sulaiman, neubri seujahtra
Tuboh beu sehat,uroe ngoen malam
Beu ek keumarang ,panton meuguna

Budaya seuni,beu ek geu kembang
Panton peuneusan,beu ek geurika
Supaya kamoe,bek salah jalan
Beuna peudoman,bak ureung tuha

Ohno meumada,panton karang
Nibak laen jan,lon smbong sigra
Kadang panton,gura hana ban
Meu'ah hai rakan,sigra lon pinta

(  Musliem Barcelo Nakata ,Lhokseumawe  12/06/2013)

 

 2. Akhbar Al-Mutawassila

TGK DIYUEB BRUEK
=====================
Assalamu'alaikum, saleum lon mula
Lon pasoe rika, dalam group muprang
Tapujoe Allah, Tuhan Nyang Esa
Maha Kuasa, dalam tiep keadaan

Nyang peujeut ‘alam, lahee ngon nyata
Nyang bri keu hamba, iman ngon islam
Nyang Peuna-peutan,di  dalam dunia
Tujoeh peutala, dalam genggaman

Seulaweut Salam, wahee syedara
Ateuh saidina, Nabi yang khatam
Ateuh sahabat, dan keluarga
Nyang seutia, uroe ngon malam

Anuek Tiyoeng klik, ateuh bak jeumpa
Jimeu suara, seudeh hana ban
Muprang lam pantoen, soe pakoe hana
Seungui lagoina, lawet nyoe taulan

Awai group nyoe, watee geupuga
oleh  kakanda, nama Sulaiman
Tgk Diyueb Bruek, geurasi nama
Di dalam maya, meugob turi nan

Dilee ngon lon, meu like-like suka
Status mandua, kamoe "sharing"kan
Dudoe akrab lon, deungoen kakanda
Meutatap muka, bak kediaman

Nibak mengarang, dalam bhah rika
Ka Ahlinya, di droeneuh nyan
Ka meuploeh thon, lam donya sastra
Pujangga Tuha, kanda Sulaiman

Nibak meurika, kamoe phon mula
Meuraba-raba, peugot karangan
Kanda Sulaiman, dudoe peu-ija
Bak  atoe kata, meupakhoek nazam

Hingga terbentuk, group panah raya
kamoe useuha, meurawi sinan
Sinan le lahee, pujangga muda
Geulatih rika, meuprang geupeunan

Rayek that jasa, droeneuh kakanda
Guree meurika, yoh masa nyan
Neubagi ileume, tan neusom punca
Sunggoh kakanda, luwah wawasan

Neubri Ya Allah, keupada Kakanda
Sehat anggota, lam keunyamanan
Beureukat umu, eya Rabbana
Limpah teunaga, waya Tuhan

(  Akhbar Al-Mutawassila ,Lhokseumawe  13/06/2013)

3. Agam Ranto

“ Tgk. Diyueb Bruek”

==================
Deungoen bismillah,  uloen mulai
Syukur keu Rabbi,  nyang Po kuasa
Seulaweut saleum , oh lhuehnyan lagi
Muhammad Nabi,  Rasul Khataman

Saleum loen tuan , keumandum akhi
Bandum ulon bri,  lam pantoen rika
Hana loen peuceeh,  hana loen peukri
Jaweub beuneubri,  wahe syedara

Nibak malam nyoe,  kaloen kunjungi
Ka loen keulai,  peuphoen meurika
Katreep hana deuh,  uloen keusini
Maklum hai akhi,  sibok keurija

Naloen teurimong,  peusan diakhi
Keu uloen geubri , atnyoe ban teuka
Nakeuh peuneusan,  geyue meurawi
Tgk.Diyueb Bruek Akhi, Judul yue rika

Tgk. Diyueb Bruek,  judul loen rawi
Deungo hai akhi , jinoe beurata
Na keuh uloen ploh , dua kreek dali
Lam panton rawi , grup meuprang kita

Kata phoen Teungku,  makna beumeuri
Aceh seurambi , umum nyan nama
Nyang na ileumee,  lakab nyan geubri
Koen keupancuri,  koen keubeulaga

Teuma o'h lheuh nyan,  Diyueb Bruek arti
Teusoem maknawi , cukoep lhok punca
Punca nyang keuphon,  roet adat dali
Ban geukheun meuri,  diyueb bruek saja

Han leupah sahoe,  hana glah gaki
Meukhoep meugunci,  hanjeut keuluwa
Peu peu nyang mudah,  nyan keuh raseuki
Wahe e akhi,  meunan keuh makna

Punca keu dua , hakikat dali
Diyueb bruek arti,  aman seuntosa
Hana peungeut goep,  hana korupsi
Hana theun jari,  jeut-jeut kanto na

Hana sentemen,  rata peutinggi
Hana ceumaci , rata manusia
Hana cok hak goep,  lagee pancuri
Hana meujudi,  lagee beulaga

Ilmee geumita,  ban suroeh rabbi
Hukom islami,  geupeusempureuna
Haleu ngon hareum,  beek saboh guci
Geupeulaeen hi,  awak nyan dua

Meunan keuh makna, lon bri arti
Nye salah akhi , bantah sigeura
Beek jeut keudesya,  bak uloen rawi
Beumangat hati , ureung nyang baca

Tgk.Diyueb Bruek,  nama jituri
Sulaiman A.Gani,  aseuli nama
Katreep digoep nyan,  tampil lam efbi
Sayang hai akhi ,  gohlom meujumpa

Nyoe na panyang umu,  geubri lee Rabbi
Beumeutuwah gaki,  beutroek lon teuka
Loen neuk mumat jaroe,  dua ngoen akhi
Beugoet lon turi,  beukrap syedara

Meumada o'h noe,  lon karang rawi
Idin beuneubri,  malam kajula
Uloen bet langkah,  loen neuk keumbali
Wassalam loen bri,  keumandum anggota....

(Agam Ranto,  Malaya 12/06/2013 )

4, Airi Safrijal

“ Tgk Diyueb Bruek “

Meukrueseumangat,  po bintang takat
cahya meukilat , oh malam jula
nibak nyoe malam,  loen tuleh lhee urat
keu sidroe sahabat,  Tgk Diyueb Bruek nama

gob nyan keuh yang poe,  grop nyoe meuhat
grop meuprang lam pantoen,  eo sahbat gob nyan keulola
habeh duem geumeuhei,  timu ngoen barat
sikureung ribee sireutoeh tujoe ploeh dua,  eo sahbat lengkap anggota

gob nyan that hebat , bak tuleh radat
laoet ngoen darat,  jeut bak geurika
geuboeh bak layeu fbi,  jak lam prang geupakat
guda jilumpat,  lam seuh prang raya

peudeung bak jaroe,  jipeunari jilumpat
u ateuh rakyat,  banduem ji seuba
watee loen kaloen,  keubit that hebat
cut bang duk daulat,  lam layeu maya

ateuh pucoek tring gadeng,  teupee meulumpat
ateuh bak langsat,  teupee meuseunda
nibak nyoe malam,  saja loen tuleh radat
tanda horeumat,  bak loen eo kanda

wahe eo cut bang,  beugoet peutimang tungkat
bek sampe rakyat , jiplueng uluwa
beugeot bak neukemudi,  timu ngoen barat
nyang ka meusapat beugeot neu aja

wahe eo rakan loen timu ngoen barat
jak tapeuwoe martabat aceh mulia
budaya aceh,  bek sampe tan meupat
ingat eo sahbat , tan pat tamita

nyoe mate aneuk,  beumeupat jeurat
nyoe gadeoh adat,  tan pat tamita
oleh seubab nyan,  wahe eo sahbat
beugeot taingat,  saban takira

jak tanyoe papah,  budaya nanggro NAD
tapeuwoe martabat,  aceh mulia
lam layeu maya,  taduek meusapat
lam groep meurpang nyoe meuhat,  tapeukoeng budaya

deungoen tgk diyub bruek,  ureung utoeh that
bak tuleh radat,  caroeng lagoena
keunan bak gob nyan,  tameurunoe meuhat
pat yang tan meupat,  peuteupat banja

bak tgk diyub bruek , peusan loen intat
tanda horeumat,  nibak adinda
loen tuleh rawi,  dua lhee urat
geunantoe surat,  loen bri keu gata

kadang na tutoe loen,  yang hana mangat
meuah keu loen eo sahbat , meulipat ganda
kaseb keuh ohnoe , rawi loen intat
singoeh bak la-en hat,  loen samboeng rika

( Airi Safrijal  Banda Aceh, 12/06/2013 )

5. Gunawar Al Ayubi

~~TGK DIYUB BRUEK~~

Deungoen beureukat,  rahmat bak rabbon.
Jinoe loen susoen,  dua krak kata.
Tgk di yub bruek,  nama loen peuphoen.
Ureung peurunoe phoen,  uloen meurika.

Ureung that di thei,  nibak meupantoen.
Ca'e geususon,  le that meumakna.
Haba nasehat,  pieh dum geuhimpoen.
Dalam grup pantoen,  jeut2 keutika.

Rata grup pantoen,  kaleuh geupapah.
Juga le sudah , ca'e gerika.
Dalam grup meuprang,  dilei that parah.
Di thei that meugah,  tgk di yub bruek nama.

Yang bri nasehat,  rata grup pantoen.
Juga aduen loen,  teuga meuseunda.
Walaupih rupa,  umu katuha.
Meunyoe meurika,  ban aneuk muda.

Meumada oeh noe,  ca'e loen karang.
Cuba neupaham,  dan neupeu makna.
Meunyoe na salah,  yang ka uloen pham.
Teugor hay rakan,  peubeutoi bersama..~~

( Gunawar Al Ayubi, Malaya 13/06/2013 )

6, Mudas

.Asoe hate dari loen tuan.
==========================
Assalamu'alaikom, kaom lam rangkang,,
Meu'ah e cut bang, teulat loen teuka,,
Beuklam beurita, bak uloen datang,,
Susoen karangan, meunan acara,,

Keu Tgk Diyueb Bruek, aduen loen sayang,,
Teumpat mengulang, seujarah lama,,
Ilmee budaya, tamse meulabang,,
Bak tameh rangkang, meugese hana,,

Adoe deungoen A, meunan panggilan,,
Ban saboeh rangkang, tamse saboeh ma,,
Cukoep seutia, peunoeh ngeon sayang,,
Meunan di cut bang, loen kaloen fakta,,

Cukoep geugaseh, ban adoe badan,,
bak sang loen kawan, meuturi lama,,
Padahai baroe sa, dalam sapaan,,
Jaroem geu reugam, badan geu wa-wa,,

Jujur loen tuan, seunang hana ban,,
Ingat keunangan, lam saboeh meja,,
Sira beulaja, dalam candaan,,
Beuthat ka malam, hana peukara,,

Ban nyum di rasa, lam kekeluargaan,,
Sang aduen badan, katroeh geu gisa,,
Ngoen Akhbar Al Mutawassila, masa saboeh jan,,
Adi Gitulhoh hai rakan, kamoe meusama,,

Beutoi lagee kheun, di ureung awam,,
Aceh meurakan, cukoep seutia,,
Beuthat droe hana, tanyoe geu paban,,
Malee loen tuan, haru diteuka,,

Leo that ileumee, yang ka loen simpan,,
Seubagoe peumbelajaran, hudep lam donya,,
Beuthat lam maya, ka kureung sapaan,,
Teutap di cut bang, loen ingat jasa,,

Loen pinta do'a, keudeh bak Tuhan,,
Aduen loen tuan, sehat anggota,,
Allah karunia, seulamat iman,,
Mangat pikiran, ngeon meusahaja,,

Eh noe meumada, rika loen tuan,,
Pat na keusalahan, meu'ah beu raya,,
meu'ah bak hamba, ampoen bak Tuhan,,
Seusama Islam, saboeh keuluarga,,
(Mudas/Agam Sidroe  : 5 Sya'ban 1434 H/13/06/2013 )

7, ASRA –AL KASMI

Tgk. Diyub Bruek"
====================
assalamu'alaikôm, saleum lôn sipreuk.
keu rakan bak fesbuk, yang ol ngon hana
nyoekeuh caé ,yang na dua neuk
tgk.diyup bruek, yang ulôn rika

geular teungku, ilmee meugruk-gruk
hantom na gaduek ,deungon syedara
tapi yang gawat, geuduek diyup bruk
info meusipreuk, tinggai hana

dumpeu geuteupeu, kejadian di lua bruek
tanna meusineuk, ketinggalan beurita
takalon status, meuakuek-akuek
haba yang geucruek, soai agama

meunyoe ngon tanyoe ,yang di lua bruek
cit lalee gaduek, peutimang gaya
adak status, update di fesbuk
kadang meusireuk, faedah hana