“ ACEH YOEH JAMEUN “

Oleh : Airi Safrijal

=========================
Alhamdulillah , Pujoe Keu Rabbi
Yang Maha Suci , Allah Ta’ala
Seulaweut Saleum , Akan Rasuli
Pang Ulee Nabi,  Banduem Ambia

Salam'alaikom,  Saleum uLoen Bri
Keu Banduem Akhi , Tuha Ngoen Muda
Tunoeng Ngoen Baroeh , Dusoen Ngoen Pasi
Putra Ngoen Putri , Adoe Deungoen - A

Nibak Uroe nyoe,  Loen Tuleh Rawi
Lam Layeu Fbi,  Dua Lhee Banja
Aneuk Cempala , Ateuh Bak Kupi
Aneuk Keudidi,  Di Dalam Cintra

Judul Lam Ca-E , Buhu Loen Rawi
Tanoeh Seurambi,  Daerah Dista
Aceh Lhee Sagoe,  Keuneubah Sufi
Karoenya Rabbi,  Tanoeh Pusaka

Nanggroe Syariat,  Lam Hukoem Rabbi
Jameun Yoeh Lawi , Dithee Le Donya
Kuat Agama , Dusoen Ngoen Pasi
Lam Hukoem Rabbi , Teudoeng Agama

Yang Duek Keuraja , Pih Hate Suci
Yang Duek Keudoli , that  Bijaksana
Aceh Geupimpin,  Lam Hukoem Rabbi
Aceh Bee Wangi , Troeh Nanggroe Lua

Duem Asoe Nanggroe , Makmu Tuhan Bri
Dusoen Ngoen Pasi , Wase Meujeumba
Le Wase di Gle , Ngoen Wase Pasi
Pade Meuguni , cengkeh ngoen pala

Urueng Lam Nanggroe,  Makmu Tuhan Bri
Dalam Bakeuti,  Pujoe Rabbana
Hana Meulanggeh,  ngoen  Hukoem Rabbi
Leumah  Bukti , Yoeh Saboeh Masa

Masa Keurajeun , Raja Yang Ade
Nama Meu Uke,  Iskandar Muda
Rakyat  That Seunang , Kuta  Deungoen Gle
Raja Pih Ade,  That Bijaksana

Dithee Le Donya,  Aceh Sitangke
Nama Meuble Ble,  U Nanggroe Lua
Teudoeng Agama , Kuta Deungoen Gle
Pasi Ngoen Pante,  Lam Hukoem Rabbana

Teutapi Saat Nyoe,  Aceh Sitangke
Sayang Bukoen Le,  Ka Tinggai Nama
Tinggai Nan Aceh,  Jinoe Bak Tangke
Asoe Nanggroe Hanale,  Ka Gadeoh Wibawa

Duem Asoe Nanggroe,  Kale Dalam Buet Jahe
Kuta Deungoen Gle , Leumah Duem Nyata
Hukoem Agama , Tansoe Le Pike
Moral Kareule,  Generasi Bangsa

Dak Na Pemimpin,  Laloe Bukoen Le
Tanle Geupike,  Keu Nasib Bangsa
Dak na  Ulama ,  Nama Meu Uke
 Hana Geupike,  Keu Ummat Duemna

Laloe Ngoen Donya,  Takaloen Lahe
Nyoe Hana Rupe , Kateupet Mata
Meunan Teujadi ,  Aceh Sitangke
Oh Jameun Akhe,  Takaloen Nyata

Sabe keudroe droe, jitem meupake

Miseu lon tanse,  PNA ngoen PA

Meutueng tueng nyawoeng, bak gara perte

Hana jipike, ingat keu Dosa

Saleh Keuh Pajan ,  Aceh Sitangke
Pemimpin Ade , lage nyoeh lama
Cukop that Rindu,  Keupemimpin Ade
Yang Na Tem Pike , Keu Nasib Bangsa

Yang Na Tem Pakoe,  Keu Ummat Sabe
Bek  Seubab Rupe , juet Pang saudara
Ya Allah Neubri ,  Aceh Sitangke
Pemimpin Ade , lahe u Donya

Beuna Ulama,  Yang Puteh Hate
Yang Geutem Pike , Keu Ummat Duem Na
Yang Na Tem Pakoe,  Lam Hukoem Rabbbe
Ulama Sufe , Karna Rabbana

Bukoen Le Sayang,  Sibintang Awe
Cahya Hana Le , Kagadeoh Warna
Meumada Ohnoe , haba lon  Ca-E
Lam Layeu Fbe,  Buhu Uloen Ba

Loen Lakee Meu’ah,  Haba Lam Ca-E
Ngoen Puteh Hate ,  Bek Nepeudoca
Bak La-En Watee,  Loen Samboeng Ca-E
Lam Layeu Fbe , Gantoe Peugeot Kra