TALUEK PEURUMOEH

  Oleh : Sulaiman.A.Gani

==================================

Alhamdulillah, lon pujoe Tuhan

Yang peujuet Alam, Ban sigoem Donyae

Yang bri Raseuki, keu Bandum Insan

Yang peuna peutan, lat batat  Dumna

Seulawuet saleum, atueh janjongan

Pang  ule  Alam, atueh rhueng Donya

Yang ba risalah, keu Bandum Insan

Rasul yang khatam, Bandum  Aulia

Oh Lhuehnyan saleum, dari  lon tuan

Yang  ba sualan, tuleh  lam rika

Tungku Diyueb Bruek, Nama samaran

Meunoe sualan, saboh  peukara

Nyan Teupin Raya, toe ngoen lueng  putu

U Timu  Paru, keude trieng  Gadeng

Kalhueh meunikah, dilon  hai  tungku

Kalhueh buet Abu, lon geupeukawen

Ngoen  sidroe dara , cut bungoeng meulu

Kalhueh hai tungku, Mat jaroe  malem

Teutapi  sayang,  Tungku boeh Hate

Dijih ka lon cre, malam  barosa

Oh lhueh lon taluek, Tungku  Meutuah

Jiteuka teulah,  di dalam  dada

Hajat  lon gisa, tungku  meutuah

Jalan neupeugah,  hukom  Agama

Hajat lon Ruju”k,  bak  putroe  ceudah

Tungku Neupeugah, Pakriban cara

Nyan Hukom Ruju’K,  Tungku peujeulah

Tungku Neupeugah, Padum Peukara

Bek  Asai jawueb, ka  meuhah babah

Kitab  neupeuhah,  Hukom  Neumita

Kareuna  jinoe,  le  anuek  miet mirah

Hukom  Jipeugah, Pue pue  yang  suka

Kareuna dilon, jinoe that  susah

Jiteuka  gundah, di dalam  dada

Siploeh  Uroe Truek, ka sampoe iddah

Ruju”K mangat sah, Hajat lon gisa

Tungku Neutuloeng, Hukom neupeugah

Mangat bek salah, deungoen Agama

Meumada ohnoe, haba lon peugah

Meunyoe na salah, meuah beuraya

( Tgk Diyueb Bruek, 15/06/2013 )

Jawaban :

HUKOEM RUJU’K

Yang phoen (1) wajeb beutaturi

U bak isteri ruju’k digata

Wajeb taturi wahai akhi

Giliran bagi gohloem seumpurna

giliran wate gohloem seip tabri

u bak isteri taleuk le gata

keudua (2)  hareum la wahai akhi

meunyoe iseuteri taneuk elanya

Taneuk peusaket hatee isteri

Hareum hai akhie bek roeh keurija

Yang keu lhee (3)  meukroeh neukheun le nabi

U bak isteri han le tagisa

nibak taleuk sa (1) taleuk lhee (3) neubri

sangat geubenci oleh rabbana

yang keupeut (4)  jaes hukoem aseuli

ruju’k isteri ka uleh gata

Keu limoeng (5) sunat neukheun le nabi

Meunyoe isteri takeuneuk aja

Takeuneuk didek sinyak puteih  di

Taperbaiki lam rumoeh tangga

tabri nasehat la wahai akhie

mangat jituri salah ngoen beuna

mangat jitu’oh khazam suami

supaya leupie lam rumoeh tangga

(5) limoeng boh hukoem habeh lon rawi

Meunyoe na sangsi jeut napeureksa

Meunan keuh muphoem hai gure kami

Yang ka loen rawi du lhee banja

( Tgk Diyueb Bruek,15/06/2013 )