“ SEUMAHYANG HAN SAH “

   Oleh : SULAIMAN. A.GANI

======================================

Lom puphoen Kalam, deungoen Bisminlah

Alhamdulillah, Rahmat hana pre

Pujoe ngoen Syukur, Sabe keu Allah

Rahmat neutamah, Neucurah sabe

Seulawuet saleum, keu Rasulullah

Utusan Allah, Rasul yang  Akhe

Nabi Muhammad, geunaseh Allah

Yang ba risalah, Troek  uroe page

Assalammua’laikom, Warah matullah

Samboet beubagah, Rakan boeh hate

Geulantoe loen bri, Kupi saboeh glah

Nyoepat na Mudah, lon susoen Ca’e

Bacut lon tanyoeng, Rakan meutuah

Neujawueb bagah, Mangat meusampe

Mupeu keu seubah, Seumbahyang han sah

Neucuba peugah, rakan boeh boeh hate

Urueng Seumbahyang, di Nanggroe Meuse

Nyan urueng mate, di Nanggroe  Cina

Teungoeh Seumbahyang, urueng ka mate

Ka keuh han sah le, Seumbahyang  Hamba

Mupue keuh seubab, seumbahyang  han sah

Keu lon neupeugah, rakan boeh hate

Mupue kareuna, seumbahyang han sah

Kitab neupeuhah, Hukom neupike

Bek Asai jawueb, neupeuhah babah

Nyoe Hukom Allah, Beuna neupike

Neubuka kitab, makna neusurah

Neujawueb bagah, lhueh neutapeuse

Meunyoe sit hanjuet, Kita neusurah

Meuhuet meuleupah, seubab kareuna

Mupue keuh seubah, Seumbahyang han sah

Dalam blog bagah, keudeh  neumita

Kalhueh lon jawueb, Seumbahyang han sah

Sinan lon keubah, Seubab  kareuna

Sinan dalam blog, kalhueh lon surah

Rakan meutuah, tinggai  neubaca

Meunyoe nama blog, rakan meutuah

Keunan neulangkah, ka lon seudia

Meukoen nyan mantoeng, sinan lon keubah

Le masalah,  meubagoe  rupa

Pusaka Indatu, Nazam Hikayah
Ka loen seuleuah, Ube sikada
Ka dalam bungkoh, Rakan meutuah
Katrep lon papah, ngoen lon usaha

Sinan lon baloet, lam Blog lon keubah
Jinoe lon seurah, pulang keu gata
Tatueng Pusaka, Indatu keubah
Keunan talangkah, Tacoek peunawa

Keu ubat hate , dikala susah
Sinan lon keubah, Raja peunawa
Dukon ngoen Tabib, Tungku ngoen Syiah
Dan lom lon keubah, Dokter Jiwa

Sinan dalam blog , jimat lon keubah
Keunan talangkah, ubat tamita
Pinto ulon toeb, gunci lon seurah
Supaya mudah, pajan tateuka

Meunyoe pat gunci, Rakan meutuah
Pintoe Tapeuhah, jan suka gata
Pintoe roet tamoeng, yang phon lon peugah
Rakan meutuah, taklik le gata “Reudok keu Tungkat, Kilat keu Suwa
tgkdiyuebbruek.blogspot.com
( Tgk Diyueb Bruek, Kemis, 20  Juni 2013 )

“ Jawaban “

=======================

Pujoe ngoen Syukur, Milek di Allah

Meupakoen han sah, Seumbahyang Hamba

Sinoe loen Jawueb, ngoen Izin  Allah

Lam blog lon keubah, seubab kareuna

Meunoe terjadi, rakan meutuah

Deungoe lon peugah, seun seun sibanja

Sideh di Meuse, lon mula kisah

Rakan meutuah, na sidroe Raja

Na sidroe Raja, yoeh masa jameun

Geumat keurajuen, Ade leupah  na

Raja Dolisyah, Nama di goebnyan

Sidroe Hambaan, na neupeulara

Siti Jariah, namit  geupeunan

Namit Syahidan, Dolisyah Raja

Syukop that jujur, lagi taatan

Sabe seumbahyang, saban kutika

Nibak si Uroe, Raja Dolisyah

Ngoen Si Jariah, neupeugah Haba

Meunyoe Mate lon, lon woe bak Allah

Gata jariah, kasah Merdeka

Yoeh goeh lon jawueb, Seumbahyang han sah

Bacut lon peugah, Hukom Agama

Seumbahyang lamit, Rakan meutuah

Dijih han payah, Tutoep Anggota

Teubuka Aurat, seumbahyang pih sah

Dijih tan payah, pakek  mukeuna

Han pue seuleukom, Seumbahyang pih sah

Dak  Aurat teuhah, Allah teurima

Meunan lam hukom, kitab geupeugah

Geutanyoe han sah, bek jak  peusama

Tanyoe ngoen lamit, beda meuleupah

Geutanyoe han sah, Aurat  teubuka

Na padum lama, teukeudi  Allah

Raja Dolisyah, saket  jiteuka

Keunoe ngoen keudeh, peu ubat bagah

Raja Dolisyah, meutamah yang na

Keudeh u Cina, geuba  le bagah

Raja Dolisyah, peu ubat  geuba

Hana sit puleh, rakan meutuah

Malah meutamah, leubeh bak yangka

Teungoeh peu ubat, Raja dolisyah

Rakan meutuah, sideh di cina

Raja tan puleh, maken meutamah

Raja dolisyah, meuninggai  Donya

Sideh di Meuse, siti jariah

Dipujoe Allah, Seumbahyang Asa

Teungoeh seumbahyang, siti jariah

Sampoe le bagah, beurita Duka

Raja ka mate, Apoen Dolisyah

Seumbahyang han sah, Mupue Kareuna

Seubab Merdeka, Siti Jariah

Seumbahyang han sah, Aurat terbuka

Seubab yoeh dile, Raja geupeugah

Siti Jariah, geupermardeka

Oh wate mate, Raja dolisyah

Watenyan sudah, dijih Merdeka

Maka seubabnyan, seumbahyang han sah

Siti Jariah, Aurat teubuka

Seubab ka mate, Raja Dolisyah

Siti Jariah, Seubab Merdeka

Meuka Merdeka, Rakan meutuah

Seumbahyang han sah, Aurat  u lua

Lage geutanyoe, Rakan meutuah

Siti Jariah,  jinoe ka sama

( Tgk Diyueb Bruek, 20 Juni 2013 )