“ MEUPUE NA TA SIR “

=====================

Alhamdulillah, lon pujoe  Tuhan

Khalikul Alam, Azawajalla

Yang peujuet bumoe, dum seukalian

Jen deungoen insan, lat batat  Dumna

Seulawuet saleum, teuma  oh lhuehnyan

Akan janjongan, Rasul  Mustafa

Yang bri Syafaat, wate  di Mizan

Rasul  pilihan, khatam Ambiya

Lhuehnyan saleum lon, keu Bandum rakan

Dalam Grup Muprang,  Pantoen Meurika

Tuha ngoen Muda, Inoeng ngoen  Agam

Duson ngoen peukan, Hana lon  beda

Nyoepat ulon ba, saboeh Sualan

Mohon jawaban, Bandum  Anggota

Sidroe droe urueng, Tamoeng Seumbahyang

Musalla Rijang, Katroek  geuteuka

Yoeh  goeh Takeubi, Taniet  seumbahyang

Meupue  Sir  Sinan, lam  hate  gata

Kiban  na Ta sir, tacuba  peutrang

Bak doeng seumbahyang, taci  peunyata

Pue ta sir dikeu, bak lon tapeutrang

U likoet  kiban, pue ta sir gata

Siblah di unuen,  ta  sir  pakriban

Blah wie hai rakan, ta sir hoe makna

Teuma  u atueh, ta sir  pakriban

U Minyueb  rakan, ta sir  pue hana

Nyan makna  ta sir, bacut lon peutrang

Taniet pakriban,  Nam  panca  Indra

Neutuloeng jawueb, neubri  jawaban

Neusir  Pakriban, Nam panca indra

Meunyoe han neusir, lagenyan macam

Gata seumbahyang, khusyu’k   jih Hana

Hana soe jaga, gata  seumbahyang

Takoet troek  Syetan, gata di  goda

Meumada  ohnoe, lon bri  sualan

Lon preh jawaban, jawueb le  gata

( Tgk Diyueb Bruek, 15/06/2013 )

 Jawaban :

Alhamdulillah, lon bri jawaban

Urueng seumbahyang, meunoe ban rupa

Seubelum geuniet, kasad seumbahyang

Meunoe ban macam, ta sir le gata

Meu  Ta sir  dikeu, ka’bah baitullah

Tahadap Allah, kiblat di gata

Ta sir u Likoet, nyan malek  mawoet

Gata geuseutoet, geulum  tiep  masa

Meu ta sir  u wie,  Nuraka  Jahannam

Unuen hai  rakan, ta sir  Syuruga

Ta  sir u atueh, bak tilek  Allah

 Atueh gata sah, saban kutika

Ta sir u minyueb, Siratan Mustaqin

Nuraka jahim,  jipreh preh  gata

Meuka keuh habeh, ta sir beunyakin

Kawoem muslimin, mukminat  dumna

(Tgk Diyueb Bruek, 15/06/2013 )