“ TABIAT MANUSIA “

Oleh : SULAIMAN.A.Gani
===============================
Miseue ban neukheun, nyan uleh Nabi
Lafad ulon bri, makna ulon boh
======ANA ABUL ‘ ARWAHI =======
======WAL ADAMU ABUL BASYARI ==

Nabi Muhammad, Indatu nyawong
Adam meukeunong, indatu tuboh
Meuhan neupateh, neujak leh tanyong
Baroh ngon tunong, neusudi beutroh

Meunankeuh sabda, nabi geutanyoe
Nyang ungki dudoe, nuraka pajoh
Peut jeuneh asai, tuboh geutanyoe
Maseng bandum syou, Tuhanku Neuboh

Maseng-maseng, dumna ta’biat
Cietna alamat, bandum bak tuboh
Walee pun jikhem, lagee beungeh that
Ban tameh meuhat, panyang di tuboh

Ta’biat angen, nyang sangat pantah
Beurangsou peugah, hana ji piyoh
Kulet bak badan, meujan tho leupah
Nyankeuh nyang leumah, alamat tuboh

Di ta’biat ie, kebiasaan
Dum perbuatan , ciet hana riyoh
Beurangkapue buet , deungon peuleuhen
Bukan hai taulan. ngon kacah kacoh

Cietna alamat, meuhat bak badan
Leumah ta pandang, bandum bak tuboh
Goet bak jimariet, ngoen perbuatan
Deungon peuleheuen, ciet hana riyoh

Peurangui tanoh, ciet le that saba
Bandum perkara , hana toem gadoh
Bah barangkasou , jipeumulia
Raja ngon bala, jih nyan u baroh

Barangkapue buet, meuhat meusampe
Ciet na ji pike, bukan pue nyang roeh
Nyangkeuh peurangeui, nyang got meusampe
Oh tee jan mate, hana broek tuboh


Nibak donya nyou, le ureung banci
Sideh bak Rabbi, mulia sunggoh
Peurangeui tanoh, aula that suci
Syuruga tinggi, sou- sou nyangna troeh

Nyangkeuh hai sahbat, beugot ta ingat
Peut boh alamat, yang na nibak tuboh
Nyang toeh keuh tatueng, hai puteh lumat
Nyang toeh ta minat, nyang leubeh tanggoeh

Didalam peut nyan , ta cuba pileh
Nyang that beureseh, tatueng aneuk jroh
Beujroh ta ingat, wahe cut puteh
Bek roeh ta pileh, nyang leubeh leusoh

Tabiat apui, bek sagai tatueng
Hai bunggong seupeueng, mubek sagai roeh
Oh tee ka beungeh, kaji ‘ek seu’uem
Beurang pue goeb kheun, hana jipiyoh

Tabiat angen nyang, pantah that-that
Jikheun lee leugat , haba pue nyang roeh
Hana ji uko, deungon jisipat
Nyan buet Hadharat, diaeteuh tuboh

Di tabiat ie , nyang pertengahan
Hana that tajam, bukan ban nyan roeh
Cietna jipike, cawe pikeran
Kahabeh jipham, rab deungon jioh

Tabiat tanoh, nyang that mulia
Tatueng keugata , wahe intan jroh
Kareuna tanoh, lethat-that saba
Jeub-jeub perkara, hana that gadoh

Nibak hadharat, ciet that neu ridha
Ureung nyan saba, jeut luwah lampoh
Nyakni lampoh nyan, dalam syuruga
Bukan lam donya, wahe teungku boeh

Nyangkeuh hai pocut, ban peut perkara
Nyan asai mula , bandum jeut tuboeh
Wajeb beutatueng, nyang mubahgia
Nyan roeh ceulaka, tatiek beujioh.
( Tgk Diyueb Bruek ,28 juli 2013 )