YANG WAJEIB GEU INGAT LE UREUENG ISEULAM

 Oleh : SULAIMAN. A.GANI

========================

Pujoe ngoen syukur, Muwoe keu Allah

Yang ka neulimpah, Rahmat keu Hamba

Geutanyoe hudep, lam gaseh Allah

Tunduk peurintah, Sidroe yang  Esa

Ulat lam batee, Raseuki bri Allah

Hanpue tagundah, janji Rabbana

Sangkira hana, geunaseh Allah

Sabe musibah, jitimpa bala

Seulawuet saleum, ulon peuseumbah

Keu Rasulullah, Khatam Ambiya

Nabi yang Akhe, utusan Allah

Yang ba Risalah, ban sigoem Donya

Samboet saleum lon, Rakan meutuah

Hajat lon kisah, saboeh mustika

Geutanyoe hudep, lam bunoe Allah

Lapan boeh surah, wajeb tajaga

Bek lage jinoe,  seuramoe meukah

Dalam  musibah , saban kutika
Karna salah droe, tuwoe Allah
Suroeh ngoen tegah, tapubuet hana

Jinoe Tariwang, lage peurintah
seuramoe meukah, Taubat Nasuha
Bek sampe hancoe, kutoek bak Allah

Ta'at  peurintah , geutanyoe dumna

Nyoe Hadis Nabi, saboeh lon surah

Neucoek beubagah, pasoe lam dada

Nabi peu Ingat, lapan boeh surah

Lapan peurintah, Rasul Mustafa

Peureuta maphoem,  gaseh meugaseh

Ngoen ahli wareh , saudara lingka

Ka lagee nabi,  gaseh keu umat

Meunan hai sahbat, gaseh lee gata

Meunyang keudua , tuloeng meunuloeng

ngoen ureueng gampoeng,  saudara lingka

tatuloeng laju,  pat pat yang alang

tuloeng beurijang,  saudara gata

 

Teuma yang keu lhee , tameubri saleum

Beurangri ureueng,  meureumpoek gata

Kareuna saleum,  nabi kheun sunat

Jaroe ta mumat,  syarat mulia

Geulantoe tabri,  kupi sicawan

Keu rakan rakan,  sahabat gata

Teuma yang keupeut , tajaweub saleum

Beurangri ureueng,  yang bri keu gata

Meunyang keu limoeng , tajak undangan

Atawa rakan,  nibak keurija

Neujak oh beungoeh,  wahe tungku droe

Masalah tawoe,  oh lheuh acara

Teuma yang keu nam , hai tungku abet

Bak ureueng saket,  saweu le gata

Neubeudoeh neujak,  wahe tungku droe

Keu bungoeng jaroe,  ube kuasa

Keu tujoeh  mate,  ureueng meu iman

Beudoeh hai taulan,  kunjoeng le gata

Oh lheuh ta intat,  manyet u  jeurat

Baroe hai sahbat,  gata jeut gisa

Lapan  amanah,  beutroek ta intat

Titipan sahbat,  rakan digata

Ureueng yang intat,  neubri syufa’at

Uleh hadharat,  yang maha Esa

Meuka keu habeh, ulon riwayat

Wajeb ta ingat, bandum le gata

Meunyoe lagenyan, tanyoe hai sahbat

Gaseh Hadharat, peujeuoh  bala

( Tgk Diyueb Bruek, 23 Maret 2013 )