URUENG YANG RUGOE

Oleh : SULAIMAN.A.GANI

================================

Asalamua’laikom, Warahmatullah

Saleum sipatah, keu rakan dumna

Samboet saleum lon, Rakan meutuah

Hajat lon kisah, saboeh  Mustika

Urueng yang rugoe, lam bumoe Allah

Deungoen kisah, seun seun sibanja

Coek Keupeudoman, haba lon peugah

Ngat na faedah, Hudep lam donya

Limong Dro Urueng , Tungku Meutuah

Rugoe Meuleupah,  dalam Agama

Neudeungo jinoe,  lon tuan peugah

Tungku Meutuah,  tuloeng bilueng sa

Peureuta maphon,  wahe Budiman

Keu angan angan,  payang lagona

Teuma kedua,  keu  umu payang

Geu Ibadat tan,  Rugoe leupahna

Teuma yang keu lhe,  urueng Muda That

Meutan Ibadat,  han Sakon Guna

Teuma yang keu peut,  urueng yang jahe

Rugoe Bukonle,   Ibadat Hana

Hana Ibadat,  Meubube pade

Rugoe Bukonle,  dalam Agama

Meuyang keulimoeng,  Tuwoe keu Mate

Sang udep sabe,  di dalam Donya

Hana Ibadat, lam suntoek  sabe

Keu Azeub Mate,  hana Geukira

Asai kale peng, garang bukonle

Hana geupike, hareum ngoen riba

Beu ingat ingat,  ka wahai rakan

Ibadat rijang , Masa lam Donya

Beuna Ibadat,  Uroe ngoen Malam

Keupada Tuhan , Bek Sagai Lupa

Yoeh mantoeng udep, tamita jalan

Tamita beukai, pangkai tagisa

Tapuwoe Amai, gisa bak Tuhan

Pangkai tariwang, nanggroe Kalbaka

 

Meutan lagenyan, rugoe kon wayang

Dudoe meunyesai, Hanjuet  le gisa

Taklik tarangoeng, lake bak Tuhan

Teuka meunyeusai, hanjuet le gisa

Tuhan han geubri, Izin tariwang

Walau alasan, jak taubat  saja

Walau sidetik, han geubri riwang

Kalhueh geupeutrang, masa lam donya

Oleh seubabnyan, ka wahai rakan

Nyoe kesempatan, bek sia sia

Yoeh mantoeng udep, lam bumoe Tuhan

Mita amalan, pangkai tagisa

Mangat bek rugoe, lam bumoe Tuhan

Kalhueh lon peutrang, untuk sikada

Limoeng droe urueng, rugoe kon wayang

Lam bumoe Tuhan, Hudep tan guna

Saban ngoen lumo, Hudep Binatang

Hana amalan, meubube  seuma

Nafsu ngoen eumpuen, Meutan pikiran

Hudep jih saban, ngoen manusia

Meumada ohnoe, haba lon peutrang

Harap maafkan, meunyoe na gasa

Ampon lon lake, keudeh bak Tuhan

Beujuet Amalan, haba lon rika

( Tgk Diyueb Bruek , 7 Juli  2013 )